Maaruku 9
9
1Khusala alupa theenya yoori: “Kiniwuuzani khweele yoori, khwa apa ariiye apha, akina khanfwa ahooneeni Ofwalume wa Nluku otaaka na owahi.”
Yinsa, Munsa na Aliyaasi
2Ziviriyeevo siikhu sitha, Yinsa khunthuula Pheeturu, Tiyaaku na Yaahaya paasi, khuwaalawana vamwaako woolepa woohiivo hatha ntthu nkina. Attaaphale Yinsa khuzukulisiwa vakatthi vaya. 3Kuwo zawe khwiiya zoottakattha nkhama etthu yawaara ameenaatho ahinwahaaye ofula khuttakatthisa nkhama toowo. 4Khuwaapuwelela Aliyaasi na Munsa, khusala attakhulana Yinsa. 5Aphano Pheeturu khumuuza Yinsa yoori: “Mwaaliimu, ti yooshapweya wiikhala attaapha. Nintta ojeka heema ttatthu, moote yawo, moote ya Munsa na kiina ya Aliyaasi.” 6Pheeturu khaari ojuwa etthu yoolupa, maana yo aari wa woova. 7Elottelanaka khupuwa liwiku khuwaafinikha, nttumpho khupuwamo huula yaari oraaye: “Otu Mwanaka wompheta; mwinsiileze.” 8Nasaapiru, wakathi eekesiyeeyo nkerekhere, khuhimooni hatha ntthu nkina theenya woohiiyi Yinsa.
9Eettaka wiishukha vamwaako aphale, Yinsa khuwaaruma yoori mwihimuuze hatha ntthu etile mooniyeeyo, mpakha Mwaana wa Pinaatamu asisimuwe muufwa. 10Mwaasa opule khuthokorela atthaaporu paasi, khusalana okheetisana maana a “osisimuwa muufwa”. 11Khumuuzela yoori: “Mwaasa aya niini, anamanozela a kano alupaka wiiya yoohithajiya Aliyaasi ota khapula?” 12Yinsa khuwaajipu yoori: “Khweele Aliyaasi ona ya ota khapula, amana ata onrutisela opheeya vitthu zooshi. Khi mwaasa aya niini yaatikhiwaka yoori Mwaana wa Pinaatamu ona ya ohoowa channu, okatthaliwa na otarawiwa? 13Ila, miiyo kiniwuuzani yoori Aliyaasi ata, yo khunrettela zooshi aatakhiyeeyo nkhama zaatikhiweezo monkoni wa ye.”
Ovonisiwa wa shaapu aariina sheethwani
14Wakathi afiyeevo aphale aariivo anakhiyoni apale akina, khoona khuntti khuluyeene ewaazukuleliye apale na anamanozela a kano eettaka okheetisana na anakhiyoni. 15Atthu apale paata ya omoona Yinsa, khwiiya ooshanka khutthirela khunchelisa. 16Yinsa khuwoozela yoori: “Mwinkhetisana niini?” 17Mwinyi mmote aari vakatthi wa khuntti etile khujipu yoori: “Mwaaliimu, miiyo kootisela mwanaka ariina sheethwani aninkhattazaaye ottakhula. 18Wakhula vahali aninsikanaavo, ontta onkwisela vathi. Khusala alaza maphovu na owina meeno, na ojookola. Kawaavekela anakhiyoni awo yoori amwiikare sheethwani aya oto, ila yo khuhinkhitiri.”
19Aphano Yinsa khujipu yoori: “Oo, atthu oohaamini, mpakha lini kiiyaka vamote na mweeyo? Mpakha lini kuuvilelakani? Mwikitiisele shaapu oto.” 20Aphano yo khuntiisa. Wakathi sheethwani amooniyeevo Yinsa, nasaapiru khuntothela mwaana otule ozoromowa woohusutivo khukwela vathi, khwaaza ojuupurusha alazaka maphovu. 21Yinsa khumuuzela paapa wa mwaana otule yoori: “Zamwaaza lini epi?” Papaawe mwaana khujipu yoori: “Thanku avokoliwe. 22Swaafu zawaatta, sheethwani oto, ontta onkwisela vamoottho na mmaati yoori amuule. Ila nkhama onwahi oretta etthu, noonele huruma onaawuni.” 23“Nkhama kinwahi?” Alupaka Yinsa. “Zooshi zinwaheya khwa otule ankhupalaaye.” 24Nasaapiru paapa wa mwaana otule khunyakula araka: “Kinkhupali; okaawuni muuhikhupali mwaka!”
25Wakathi Yinsa ooniyeevo yoori khuntti khuluyeene yeetta okusanyeya, khunsukisa sheethwani araka: “Sheethwani woohittakhuli na woohisiili, miiyo kinuuruma yoori onlikhe na ohinrutele theenya.” 26Sheethwani khunyakula, khunsakhinya woohusutivo khusaruwa, shaapu khwiiya nkhama ntthu woofwa, khufiyelela atthu akina olupa yoori: “Afwa.” 27Ila Yinsa khunkhola nkhono awe khunlansa, khweemela.
28Paata ya Yinsa orutela owawe, anakhiyoni awe khumuuzela othetekele yoori: “Mwaasa aya niini nahaakhitireliyeeyo omwiikara?” 29Ye khuwaajipu yoori: “Jaati yaya eto, eniikareya khwa lompa na ofuka paasi.”
Yinsa onlupa theenya ofwa wawe na osisimuwa wawe
30Yo khulaawo okhule aariiwo na khulokhela Kalileya. Yinsa khaatakhiye atthu ojuwa ohali aariiwo, 31maana eetta owaasomisa anakhiyoni awe na awoozaka yoori: “Mwaana wa Pinaatamu onsaleela winkheleliwa mmakhono wa anaatamu. Yo anlawa amuule, ila siikhu ya ttaatthu onlawa asisimuwe.” 32Ila yo khayaaweleyiye etthu aari otakhaaye olupa na khusala oova omuuzela.
Nwulu muufwalume wa pinkuuni paani?
33Khufiya Kafwaranaawu. Ari owawe, ye khuwoozela anakhiyoni awe yoori: “Ntarikhi mwaari okheetisana niini?” 34Ila yo khuhilupi hatha etthu, maana aari okheetisana yoori anjuwe paani eeyiyeeyo nwulweene channu vakatthi vaya. 35Eekhaliyeevo, Yinsa khuwaakhuwela apale khumi na awiri khuwooza yoori: “Nkhama ntthu ontakha wiiya wa mwanzo, ona ya wiiya wawiishela na eeye karumeya wa ooshi.” 36Khunthuula mwaana mmote khunttha vakatthi vaya, khunkholela nkhono awe na khuwooza yoori: 37“Wakhula otule animpwekherelaaye nsimaana nkhama otu, khwa nzina laka, onikipwekherela miiyo, na otule anikipwekherelaaye khanikipwekherela miiyo, ila onimpwekherela otule akiperekhiyeeyo.”
Otule ahiniiphiriwaaye ti fweeyo ori khwa fweeyo
38Yaahaya khunkhuwela Yinsa khumuuza yoori: “Mwaaliimu, namoona mwinyi mmote eekaraka masheethwani khwa nzina lawo, fweeyo khunkhattaza mwaasa woohiiyi wa khuntti yeetthu.”
39Yinsa khumuuza yoori: “Mwihikhattaze, maana khina anrettaaye minjuza khwa nzina laka, elottelanaka khukittakhula wootakhalavo. 40Maana otule ahinuumananaaye fweeyo, ori khwa fweeyo. 41Nakataalikha, kiniwuuzani khweele yoori, otule aniwinkhaanini maati oonywa, koopho moote khwa nzina laka, mwaasa wa mweeyo wiiya atthu a Al-Masiihu, weekhweele khinteela omwaashikha phakari yawe.”
Okwiselana ntwampi
42“Amana ntthu ankosisa mmote wa asimaana apa akikhupaliyeeyo miiyo, afwataali ofukeleliwa liwe loovalaza mmwisiko khutupweeziwa nkhilintti ya pahari. 43Na nkhono awo amana wuukosisa, oshije. Afwataali weetta muuhaayi ori woorakala, ehiiyeeni wiiyana makhono awo mawiri khweeseleliwa motthooni, ohali oriiwo moottho ohinzimaaye. 44Ottuukho nyunku yaya ehinfwaaye wala moottho aya ohinzimaaye. 45Na muulu awo amana wuukosisa, oshije. Afwataali weetta muuhaayi ori woorakala, ehiiyeeni wiiyana moolu mawiri khweeseleliwa motthooni, 46ottuukho nyunku yaya ehinfwaaye na moottho aya ohinzimaaye. 47Na liisho lawo limote amana luukosisa, olazemo. Maana afwataali weetta muufwalume wa Nluku na liisho limote paasi ehiiyeeni wiiyana maasho oomawiri ila khweeseleliwa motthooni, 48ottuukho nyunku yaya ehinifwaaye na moottho aya ohinzimaaye.
49“Maana wakhula mmote onlawa alukaniwe moottho. 50Mwiinyu pi wooshapweya; ila mwiinyu aya amana olikha onyuunya, onrutiseleya toovi onyuunya waya? Mwiiye mwiinyu mweeyo ena, na mwiikhale na heeri mmote na nzeenu.”
Currently Selected:
Maaruku 9: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
