NINGPAWT NINGHPANG 19
19
Sodom Hte Gomora Hten Mat Ai Lam
1Dai lamu kasa yan gaw nrim e Sodom mare de sa du ma ai; Lawt gaw Sodom mare chyinghka lam e dung nga ai: shaloi Lawt gaw dai yan hpe mu nna, sa tau la na nga rawt sa nhtawm, shi a myi man ga de dagup let, 2“Madu yan e nan a mayam a nta de shang nna, dai na tup nga nga marit; nan a lagaw shin mu; hpawt de jau jau rawt nna, lai sa wa mu,” ngu nna hkap tsun wu ai. Dai yan gaw, “An n shang na ga ai, dai na tup mare lam hkan e nga nga na ga ai,” ngu nna htan mu ai.
3Shan hpe akroi anoi nga nna saw mu ai majaw, shan gaw shi hpang de kayin nna nta de shang ma ai; shan a matu shi poi galaw nna, matsi n rawng ai muk kabaw ngut jang, shan sha ma ai.
4Dai yan garai n yup yang, Sodom mare shara shagu hkan na sa ai lasha kaji kaba nlang hte gaw, dai nta hpe grup di wang da nna, 5Lawt hpe shaga let, “Dai na nang kaw du ai manam yan, kanang nga ma ta? Dai yan hte anhte kanawn lu na matu shapraw ya mi,” ngu mu ai.
6Shaloi Lawt gaw chyinghka shinggan de shanhte kaw pru nna, shi a shingdu de chyinghka la tawn nhtawm, 7“Nye a hpunau ni e, ndai hte wa n shawp ai amu gaw hkum galaw myit. 8Yu mu, ngai kaw la garai n chye ai shayi sha lahkawng nga nga ai; dai yan hpe nanhte hpang de shapraw ya na hkraw ya mi, shan hpe nanhte kam ai mi di mu; ndai yan chyawm gaw nye a nta a magaw shingnip hta sa shingbyi nga ma ai majaw, shan hpe hpa mung hkum di ya myit,” ngu nna sa tsun wu ai.
9Rai timung shanhte gaw, “Ndai wa gaw nang e she sa shingbyi nga ai mi, tara agyi tai mayu nga ai; ya ndai yan hpe di ai hta, nang hpe chyawm grau nna n hkru ai hku di na de ai,” ngu mu ai. Shing rai shanhte Lawt hpe jawm adip nna, chyinghka adawt hpaw kau na nga, sit sa wa ma ai. 10Dai lamu kasa yan chyawm gaw lata shawn dat nna Lawt hpe nta nhku de shan kaw dun jashawn la nhtawm, chyinghka la kau mu ai. 11Dai hta kaga shan gaw, dai chyinghka shinggan e nga ai masha kaji kaba nlang hpe myi shamak kau ya mu ai rai nna, shanhte gaw chyinghka lam tam nna ba mat ma ai.
12Ya dai lamu kasa yan Lawt hpe tsun mu ai gaw, “Ndai yang nang hte seng ai ni naw nga ma ni? Na a nhkri nsha ni hpe mung, na a shadang sha ni hte shayi sha ni hpe mung, ndai mare hta e nang lu malu hpe, ndai yang na woi shapraw u: 13shara ndai hpe an jahten kau na rai nga ga ai; kaning rai nme law, ndai yang na masha ni a jahtau ai gaw Yehowa a man e nachying kaba nga malu ai majaw, ndai hpe jahten kau na Yehowa gaw an hpe shangun dat ma ni ai,” ngu mu ai.
14Dai majaw Lawt gaw pru nna shi a shayi sha ni hpe la ai kahkri ni e, “Rawt mu, ndai yang na pru wa mu; mare ndai hpe Yehowa jahten kau na da,” ngu nna hkan tsun wu ai. Kahkri ni chyawm gaw, shi shatu ai sha rai nga ai, nga nna myit ma ai.
15Nhtoi htoi ai shaloi dai lamu kasa yan gaw Lawt hpe shadut nna, “Rawt u; ndai mare a yubak hta nang n hten lawm n ga, na a madu jan hte nang e nga ai na a shayi sha yan hpe woi nna pru wa u,” ngu mu ai. 16Shi chyawm gaw a ganyi nga ai, rai timung Yehowa shi hpe matsan dum nga ai majaw, dai lamu kasa yan gaw shi hte shi a madu jan hpe mung, shi a shayi sha yan hpe mung lata hta dun nna shapraw nhtawm, dai mare shinggan e woi tawn mu ai. 17Shing rai shanhte hpe shapraw tawn nhtawm, langai wa mi gaw, “Na asak lawt lu hkra hprawng u; hpang de hkum katin yu et, ndai pa garai n tawng tawng gaw hkrum hkring et; nang hten bya ai n hkrum hkra, bum ga de hprawng u,” ngu wu ai.
18Law tsun wu ai chyawm gaw, “Nye a Madu e, shing n rai u ga: 19Yu u, na a mayam wa na a man e myi man pa ni ai rai nna, nye a asak hkrung nga lu na matu ngai hta nang galaw ya ai matsan dum ai chyeju wa kaba la salit dai: dai yubak ngai hpe lep nna ngai n si n ga, bum ga du hkra wa ngai n dang hprawng nngai: 20ya, yu u, wora mare gaw hprawng lu na daram ni nga ai, kaji mung kaji nga ai; nye a asak hkrung nga lu hkra dai de hprawng wa shangun e; dai gaw kaji nga ai n rai ni?” Ngu wu ai. 21Dai wa mung, “Yu u, ndai lam hta mung nye a man e nang myi man pa nit dai rai nna, nang tsun ai mare hpe ngai n jahten ni ai. 22Dai de lau hprawng wa u; nang dai de garai n du yang ngai hpa mung n galaw lu nngai,” ngu wu ai. Dai re ai majaw mare dai hpe Zora ngu nna shamying mu ai.
23Lawt gaw Zora mare de du shang jang, ga ntsa e jan pru sai. 24Shaloi Yehowa gaw lamu de nna Sodom hte Gomora ntsa de kan hte grung ai wan jahtu dat wu ai: 25shing rai shi gaw dai mare yan hte nawng ginwang ting hpe mung, dai mare yan hta nga ai masha mahkra hte ga e tu matu hpe mung galau ka-up kau wu ai. 26Lawt a madu jan chyawm gaw hpang de kayin yu nna jum shadaw tai mat lu ai.
27Ya Abraham gaw manap jau jau rawt nna, shi Yehowa a man e tsap ai shara de sa wa yu wu ai. 28Sodom hte Gomora maga de mung, dai ginwang ting de mung shi mada yu wu yang, yu u, wan nhkut gaw wan nmang hta na hku ai wan hkut zawn dai mung ting hta nna mawng lung nga ai.
29Karai Kasang gaw dai ginwang na mare ni hpe jahten kau wu ai shaloi Karai Kasang Abraham hpe dum wu ai rai nna, Lawt nga ai mare ni hpe galau ka-up kau wu ai shaloi, dai galau ka-up kau ai hta na Lawt hpe dat dat wu ai.
Lawt Hte Shi A Kasha Ni
30Shaloi Lawt gaw Zora mare hta nga hkrit ai majaw, shi a shayi sha yan hte rau Zora mare na pru nna bum ga e wa nga nga ai; shan wa ni gaw lungpu langai mi hta rawng nna nga nga ma ai. 31Ya kana mahtang kanau jan hpe tsun wu ai gaw, “An a kawa dingla mat sai; dai hta kaga ga ntsa ting hta, ga ntsa hking hte maren an hpe la na lasha langai mi muk n nga sai; 32law, an gaw wa hpe tsabyi jaw shanang gaw, an a kawa amyu matu shapraw na shi hte yup ga,” ngu wu ai. 33Dai shana e shan gaw kawa hpe tsabyi jaw nhtawm, kana jan mahtang shang nna kawa hte rau yup wu ai; shi yup lawm ai mung, shi rawt wa ai mung kawa gaw n chye wu ai.
34Hpang jahpawt e kana gaw, “Yu u, mana e ngai wa hte yup ni ai; dai na mung shi hpe tsabyi jaw nna wa a amyu matu shapraw lu hkra nang shi kaw shang yup lawm u,” ngu nna kanau jan hpe tsun wu ai. 35Dai shana mung shan gaw kawa hpe tsabyi jaw nhtawm kanau jan mahtang shang nna kawa hte rau yup wu ai; shi yup lawm ai mung, shi rawt wa ai mung kawa gaw n chye wu ai. 36Dai rai nna Lawt a kasha yan gaw kawa hta na kasha kap ma ai. 37Kana jan shadang sha shangai ai rai nna, dai ma hpe Moba ngu nna shamying wu ai: dai wa gaw ya du hkra Moba masha ni a kawa rai nga ai. 38Kanau jan mung shadang sha shangai wu ai rai nna, dai ma hpe Ben-ammi ngu nna shamying wu ai: dai wa gaw ya du hkra Ammon a kashu kasha ni a kawa rai nga ai.
Currently Selected:
NINGPAWT NINGHPANG 19: JHVT3
Highlight
Share
Copy
Want to have your highlights saved across all your devices? Sign up or sign in
Jinghpaw Hanson Version Bible © Bible Society of Myanmar, 2009.
