Éxodo 3

Moisésta Tayta Dios qayashqan

1Moisésnami suedrun Jetrupa#3.1a Jetrupa jukaq jutinmi karqan Reuel. Tsayta musyanaykipaq liyinki Éxo. 2.16. uyshankunata y cabrankunata mitsiq. Jetruqa madianita runakunapa cüranmi karqan. Juk kutimi Moisés mitsikuq aywarqan chunyaq jirkapa. Tsayno aywarmi chayarqan Tayta Dioswan tinkuna Horeb jirkaman.#3.1b Horeb jirkapa jukaq jutinmi kaykan Sinaí. 2Tsaychömi Tayta Diospa angilnin Moisésta yuriparqan shiraka rupaykaqcho. Moisés tantiyaykunanpaqqa tsayjina rataykarpis manami shirakata ruparqantsu. 3Tsawraqa kayno nirqan: <<¡Imaraq taqay! Mä aywashaq jinanman rikamunäpaq. ¡Imanirtaq nina ratarpis shirakata mana ushantsu!>>

4Moisés rikaq aywaykaptinmi nina rupaykaqpita Tayta Dios qayakurqan kayno nir: <<¡Moisés, Moisés!>>

Tsawraqa Moisés nirqan: <<¿Imata, Tayta?>>

5Tsawraqa Tayta Dios kayno nirqan: <<Ama witimuytsu. Kay ichirashqayki patsaqa sagrädumi kaykan. Tsayno kaykaptinqa lanqikita jorquy>>.

6Mastapis kayno nirqan: <<Unay ayluykikuna Abrahampa, Isaacpa y Jacobpa Diosninmi kaykä>>.

Tsayno niptinmi Diosta rikayta mantsakushpan Moisés qaqlanta tsapakurqan.

7Nirkurnami Tayta Dios kayno nirqan: <<Kuyashqä runakuna Egiptucho fiyupa lakikur kawarkaykaqtami rikashqä. Tsaynöpis mayashqä capatazninkuna pasaypa nakatsiptin quejakamar manakamashqanta. Tsaynölami musyaykä amatar nakarkaykashqanta. 8Tsaymi noqa shamushqä Egipto runakunapa makinpita jorqamunäpaq. Jorqarkamurmi pushashaq maypis täkuypaq jatunkaray partiman. Tsaychöqa lëchipis abëjapa mishkinpis yakunöraqmi atska kaykan. Tsay markakunachömi tarkaykan cananeo runakuna, heteo runakuna, amorreo runakuna, ferezeo runakuna, heveo runakuna y jebuseo runakunapis. 9Noqa mayashqämi Israel runakuna manakamashqanta. Tsaynöpis rikashqämi paykunata Egipto runakuna fiyupa nakaykätsishqanta. 10Tsaymi Faraón kaqman kanan kachashayki kuyashqä Israel runakunata jorqamunaykipaq>>.#Hech. 7.30-34.

11Tsayno niptinmi Tayta Diosta Moisés kayno nirqan: <<Noqa manami valurätsu Faraónpa nawpanman aywayta, Tayta. Tsaynöpis manami valurätsu Israel runakunata Egiptupita jorqamuyta>>.

12Tsawraqa Tayta Dios kayno nirqan: <<Noqami qamwan kaykäshaq. Egiptupita Israel runakunata jorqarkamurmi kay jirkaman shapäkamunki noqata adoramänaykipaq. Tsaymi qamwan kaykashqäta musyankipaq>>.#Hech. 7.7.

13Tsayno niptinmi Moisés kayno nirqan: <<Egiptuman chayaykur Israel mayïkunata kaynömi nishaq: <Unay ayluntsikuna yärakushqan Tayta Diosmi qamkunaman kachamashqa>.#Éxo. 6.2-3. Tsayno wilaptï paykuna kayno nirmi tapumanqa: <¿Imataq paypa jutin?> Tsayno tapumaptin ¿imatataq nishaq?>>

14Tsawraqa Tayta Dios kayno nirqan: <<Noqaqa: <Noqami Kä>.#Juan 8.24, 58; 18.5-6, 8. Israel runakunata kayno ninki: <Noqami Kä niqmi qamkunaman kachamashqa> >>.

15Tsaynölami Moisésta Tayta Dios kayno nirqan: <<Israel runakunata kaynöpis ninki: <Yahwehmi kachamashqa. Payqa unay ayluntsi Abrahampa, Isaacpa y Jacobpa Diosninmi kaykan> >>.

Mastami Tayta Dios kayno nirqan: <<Noqapa jutïqa Yahwehmi imayyaqpis kanqa>>.

Israel runakunata jorqamunanpaq Moisésta tantiyatsishqan

16<<Egiptuman chayaykushpayki Israel mayor runakunata shuntaykur kayno ninki: <Unay ayluntsi Abraham, Isaac y Jacob yärakushqan Tayta Diosmi yuriparkamar kayno nimashqa: <<Noqa rikaykämi Israel runakunata Egipto runakuna fiyupa nakaykätsishqanta>>.

17<< <Tsaynöpis nimashqa nakaykashqaykipita jorqushushpayki cananeo runakuna, heteo runakuna, amorreo runakuna, ferezeo runakuna, heveo runakuna y jebuseo runakuna tashqan nacionman pushashunaykipaq kashqanta. Tsaychöqa lëchipis abëjapa mishkinpis yakunöraqmi atska kaykan>.

18<<Tsayno niptikiqa Israel mayor runakuna cäsukushunkipaqmi. Tsawraqa paykunawanna aywanki Egipto nacionpa mandaqnin reywan parlanaykipaq. Chayaykurna kayno ninki: <Hebreo runakunapa#3.18 Hebreo runakunaqa Israel runakunami karqan. Tsaymi Moiséspis hebreo runa karqan. Tayta Diosninmi noqakunata yuripämashqa. Tsaymi chunyaq jirkaman kimsa junaq aywayta munarkaykä sacrificiuta rupatsir payta adorapäkunäpaq>.

19<<Tsayno niptikipis Egipto nacionpa mandaqnin rey manami kachapäshunkitsu yarqupäkamunaykipaq. Fiyupa nakatsiptïraqmi kachapäshunkipaq. 20Tsaymi Egipto runakunataqa munayniyuq kashqäta musyatsishaq mantsariypaq castïgukunawan. Tsaynöparaqmi Faraón kachapäshunki yarqupäkamunaykipaq.

21<<Yarqamuptikimi Egipto runakuna imatapis qarashunaykipaq#3.21 Wakin runakunaqa regalashunaykipaq nipäkun. shakyätsishaq. Tsaynöpami jinaylaqa mana yarqamunkipaqtsu. 22Tsaymi warmikunapis vecïnankunata y vecïnancho taq warmi mayinkunata manakärinqa imatapis qellaypita kaqta o qoripita kaqta qarananpaq. Tsaynölami röpakunata manakärinqa wawankunata jatipänanpaq. Tsaynöpami Egipto runakunapa imaykantapis apakärinkipaq>>.#Éxo. 12.35-36.

Currently Selected:

Éxodo 3: qvmB

Highlight

Copy