Éxodo 4

Moisés imano rurananpaqpis tantiyatsishqan

1Tsayno niptinmi Moisés nirqan: <<Wilapaptïpis Israel mayïkuna manami criyimanqatsu ni cäsumanqatsu. Tsaypa trukanqa kaynömi nimanqa: <Qamtaqa ¿imanöpataq Tayta Dios yuripäshunkiman?> >>

2Tsayno niptinmi Tayta Dios kayno tapurqan: <<¿Imatataq aptaraykanki?>>

Tsawraqa Moisés kayno nirqan: <<Tukrütami, Tayta>>.

3Niptinmi Tayta Dios kayno nirqan: <<Pampaman jitay>>.

Pampaman jitaykuptinmi culebraman tikrarqan. Tsayta rikaykurmi Moisésqa mantsakar witirkurqan.

4Tsawraqa Tayta Dios kayno nirqan: <<Chupapita tsariy>>.

Chupapita tsarirkuptinmi tukruna rikakurqan.

5Tsaypitana Tayta Dios kayno nirqan: <<Tsayta rikarmi Abrahampa, Isaacpa y Jacobpa Tayta Diosnin qamta yuripashqäta paykuna criyinqapaq>>.

6Mastami Tayta Dios kayno nirqan: <<Kananqa oqlaynikiman makikita jatiy>>.

Niptin makinta oqlayninman jatirqan. Jorquriptinnami leprawan rashtano yoraqashqa kaykänaq. 7Nirkurmi Tayta Dios kayno nirqan: <<Yapay makikita oqlaynikiman jatiy>>.

Tsawraqa Tayta Dios nishqanno rurarqan. Makinta oqlayninpita jorquriptinna sänuna kaykänaq.

8Tsaykunata rurarkatsirnami Tayta Dios kayno nirqan: <<Punta kaq señalta mana criyirpis qepa kaq señalta ruraptikiqa criyishunkipaqmi. 9Ishkay kaq señaltapis mana criyiptinqa mayupita yakuta chaqarkur pampaman jichanki. Pampaman jichaptikimi yawarman tikranqapaq>>.

Moiséspa trukan Aarón parlananpaq kashqan

10Niptinmi Moisés kayno nirqan: <<¡Ay, Tayta Dios! Noqaqa rimaytapis manami shumaq yachätsu. Manami kananlaraqtsu tsayno kaykä, sinöqa unaypita patsami. Tsaymi parlarpis shumaq tantiyatsiyta mana kamäpakütsu>>.

11Tsayno niptinmi Tayta Dios nirqan: <<¿Pitaq runapa shiminta kamashqa? ¿Pitaq kamakätsin upa kananpaq, wiyaq kananpaq, qapra kananpaq y ali rikaq kananpaqpis? ¿Manaku noqa kaykä? 12Tsayno kaykaptinqa Egiptuman ayway. Parlashqayki höra qamwanmi kaykäshaq. Imano parlanaykipaqpis noqami tantiyatsishayki>>.

13Moisés yapay kayno nirqan: <<¡Ay, Tayta Dios! Noqapa trukä jukta kachaykulay>>.

14Tsayno niptinmi Tayta Dios rabyakushpan kayno nirqan: <<Mana valuraptikiqa Leví trïbu wawqiki Aarónmi yanapashunki. Shumaqmi runakunata tantiyatsin. Paymi taripashunaykipaq shamunqa. Qamwan tinkurmi pasaypa kushikunqa. 15Paytami tantiyatsinki imata parlananpaq kaqtapis. Noqami paytapis y qamtapis yarpayta qoshayki ali parlanaykipaq. Tsaynömi tantiyatsishayki imata rurapäkunaykipaq kaqtapis. 16Lapan parlapashqäkunata Aarónta wilanki. Nishqaykikunatanami Israel runakunata Aarón parlapanqa. 17Tukruykita apanki. Tsaywanmi espantaypaq kaqkunata rurankipaq>>.

Egiptuman Moisés kutishqan

18Tsaypitanami Moisés kutirqan suedrun Jetrupa wayinman. Chayaykurmi kayno nirqan: <<Egiptucho aylükunata watukuqmi aywayta munaykä, papä. Aywä musyapakaramushaq imano kaykashqantapis>>.

Tsawraqa suedrun Jetro kayno nirqan: <<Ayway ari, hïju. Alila puriramunki>>.

19Madiánpita manaraq aywaptinmi Moisésta Tayta Dios kayno nirqan: <<Egiptupa kutiy. Wanutsishunaykipaq yarpaqkunaqa lapannami wanur ushakashqa>>.

20Tsaymi Moisésqa warminta wamrankunata bürruman muntarkatsir tukrunta apakurkur Egiptupa aywarqan. 21Nirkurna Moisésta Tayta Dios kayno nirqan: <<Qamtami podernïta qoshqä Egiptuman chayar Faraónpa nawpancho mantsariypaq kaqkunata ruranaykipaq. Tsaykunataqa lapanta ruranki. Noqami Faraónpa shonqunta chukruyätsishaq Israel runakunata mana kachananpaq. 22Tsawraqa Faraónta kayno ninki: <Tayta Diosmi kayno nin: Israel runakunaqa qechpa tsurïmi kaykan. 23Tsurï adoramaq aywananpaq niykaptïpis manami kachayta munankitsu. Tsaymi qechpa tsurikita wanutsishaq> >>.#Éxo. 12.29.

24Egiptuman aywaykashqanchömi tardiyäpakur patsakärirqan. Tsay tsakaymi Tayta Dios yuriparkur Moisésta wanutsiyta munarqan. 25Tsawraqa Séfora qetsqa rumiwan kutsurqan wawanpa chiwlakunanpa punta qaranta. Nirkur tsay kutsushqan qarata Moiséspa chakin jananman laqaykur kayno nirqan: <<Kananqa yawarwan señalashqa runämi kanki>>.

26Tsayno ruraptinmi Moisésta Tayta Dios mana wanutsirqannatsu. Wawanpa chiwlakunanpa punta qaranta kutsushqanpitami Séfora kayno nirqan: <<Yawarwan señalashqa runämi kanki>>.

27Aaróntanami Egiptucho kaykaptin Tayta Dios kayno nirqan: <<Moiséswan tinkunaykipaq chunyaq jirkaman ayway>>.

Tsawraqa Aarón aywar Moiséswan tinkurqan Tayta Dioswan tinkuna jirkacho#Éxo. 3.1.. Moiséswan tinkuykurmi wamayashpan mutsarqan. 28Tsaychömi Aarónta Moisés wilaparqan Tayta Dios nishqankunata y espantaypaq señalkunata rurananpaq kashqantapis.

29Egiptuman chayaykurnami Moiséswan Aarón aywarqan Israel mayor runakunata shuntananpaq. 30Paykuna juntakaykuptinmi Moisésta Tayta Dios nishqankunata Aarón wilaparqan. Tsaynöpis criyipäkunanpaqmi Tayta Dios nishqannöla paykunapa nawpancho mantsariypaq señalkunata Moisés rurarqan. 31Tsaymi lapan runakuna kayno nipäkurqan: <<Tayta Diosqa rikaykämashqantsichaq imano nakar kawaykashqantsitapis>>.

Tsayno nirmi qonqurpakuykur Tayta Diosta adorapäkurqan.

Currently Selected:

Éxodo 4: qvmB

Highlight

Copy