Génesis 28

1Tsayno niptinmi tsurin Jacobta qayaykur Isaac bendicionta qoshpan kayno nirqan: <<Cananea warmiwanqa ama tankitsu, hïju. 2Padan-aram markaman ayway awkiluyki Betuelpa wayinman. Tsaychömi mamaykipa turin Labánpa tsurinkunapita akranki tänaykipaq. 3Dios El-Shaddai#28.3 El-Shaddai ninanqa lapanpaq munayniyuq Dios ninanmi. bendicionninta qoykuläshunki tsurikikuna atskaman mirananpaq y paykunapita miraqkuna atska nacionkuna kananpaqpis. 4Papänï Abrahamta Tayta Dios bendicionninta qoshqannöla#Gén. 17.4-8. qamtapis bendicionninta qoykuläshunki y qampita miraqkunatapis bendicionninta qoykulätsun. Tsaynöpami kanan qorpanöla taykashqantsi jalqakunapis y raqrakunapis qampita miraqkunapaq kanqa. Tsayno kananpaqmi papänïta Tayta Dios promitirqan>>.

5Tsaynöpami Isaac tsurin Jacobta despacharqan Padan-aram markaman. Tsaymi Jacob chayarqan tiyun Labánpa wayinman. Labánqa karqan Rebecapa turin y Betuelpa tsurinmi. Betuelqa arameo runami karqan. Rebecanami karqan Esaúpa y Jacobpa maman.

Esaú juk warmiwan tashqan

6Esaúmi musyarqan wawqin Jacobta papänin bendicionta qoshqanta, nirkur warmita ashinanpaq Padan-aramman despachashqanta. Tsaynöpis musyarqan cananea warmiwan mana tänanpaq nishqanta. 7Tsaynöpis musyarqan papänin maman nishqanta wiyakur Padan-aramman Jacob aywakushqanta. 8Tsaynöpami Esaú tantiyarqan cananea jipashkunata lumtsuyninpaq papänin mana munashqanta. 9Tsayta tantiyarmi Esaú aywarqan tiyun Ismael kaqman. Ismaelqa karqan Abrahampa tsurinmi. Tsaychönami warminpaq ashirqan Ismaelpa warmi tsurin Mahalat jipashta. Tsay jipashqa karqan Nebaiotpa paninmi. Tsaynöpami ishkay cananea warmikunawan taykarpis jananman juk warmita ashirqan.#Gén. 26.34-35.

Bet-elcho Jacobta Tayta Dios yuripashqan

10Beersebapita aywakurmi Haránman aywaq nänipa Jacob aywarqan. 11Tsayno aywaykarmi juk partiman chayarqan. Tsaycho tsakäpakurmi rumita jawnakurkur punurqan. 12Sueñuyninchömi rikarqan pampapita jana patsayaq escalëra ichiraykaqta. Tsaynöpis rikarqan tsay escalërapa Tayta Diospa angilninkuna witsaykaqta y uraykämuqta.#Juan 1.51.

13Tsaynöpis Tayta Diosta rikarqan escalëra puntancho ichiraykaqta. Paymi kayno nirqan: <<Noqami kaykä awkiluyki Abraham y papäniki Isaac yärakushqan Tayta Dios. Kanan punuykashqayki pampataqa qamta y qampita miraqkunatami qoykushaykipaq.#Gén. 13.14-15. 14Qampita miraqkunami polvunöraq yupaytapis mana atipaypaq kanqapaq. Tsurikikuna mirashpanmi maytsaypapis mashtakanqapaq. Qampita y tsurikikunapita miraqkunapitami lapan nación runakunapis bendicionnïta chaskinqapaq.#Gén. 12.1-3; 13.14-15; 15.18-21; 22.16-18; 26.3-5. 15Noqa imaypis qamwanmi kaykäshaq. Maypa aywaptikipis noqami rikashaykipaq. Maypitapis kay partimanmi kutitsimushaykipaq. Mana qonqaypami qamta lapan promitishqäkunata cumplishaqpaq>>.

16Punuykashqanpita rikcharkamur Jacob kayno nirqan: <<Tayta Diosqa rasunpami kaycho kaykan. Kaycho kaykashqantaqa manami tantiyarqätsu>>.

17Tsaymi mantsakashqa kayno nirqan: <<¡Kay partiqa sagrädumi kaykan! ¡Kayqa Tayta Diospa wayin kar jana patsa punkumi kaykan!>>

18Tsaka tsakala sharkurnami Jacobqa jawnarashqan rumita jawirqan señalpaq. Nirkurnami Tayta Diosta adorashpan tsay rumi jananman aceitita jichaparqan. 19Nawpataqa tsay cercancho kaq markapa jutin karqan Luz. Jacobnami tsay markapa jutinta churaparqan Bet-el#28.19 Bet-el ninanqa Diospa wayin ninanmi. jutin kananpaq.

20Tsaychömi Tayta Diosta Jacob manakur kayno nirqan: <<Kanan aywaykashqäpa ali puriykamunäpaq yanaqaykalämay, Tayta. Mikunäpaq y röpata jatikunäpaqpis kamaripaykalämay. 21Papänïpa wayinman kawaykar kutimuptïqa qamlami Tayta Diosnï kankipaq. 22Kay ichitsishqä rumimi señal kanqa qamta kaycho pïmaypis adorashunaykipaq. Lapan kamaripämashqaykipitami diezmuta qampaq imaypis churamushaq>>.

Currently Selected:

Génesis 28: qvmB

Highlight

Copy