Génesis 33

Jacob wawqin Esaúwan tinkushqan

1Chusku pachak (400) runakunawan Esaú yaykuykaqta rikarmi tsurinkunata Jacob rakirqan wakinta Leawan aywananpaq, wakinta Raquelwan aywananpaq, wakinta Bilhawan aywananpaq y wakintana Zilpawan aywananpaq. 2Puntata aywananpaqmi ashmaynin kaq ishkan warminkunata wawankunatawan churarqan. Paykunapa qepanta aywananpaqmi churarqan Leata y wawankunatapis. Tsaypita mas qepanta aywananpaqnami churarqan Raquelta y wawan Joséta. 3Nirkurnami Jacobqa paykunapa puntanman churakarkur aywarqan. Wawqinwan tinkunanyaqmi urkunpis pampaman töpashqanyaq qanchis kuti qonqurpakur aywarqan. 4Tsayno aywaykaptinmi wawqin Esaúqa warakayla aywaykur makalakurkur mutsarqan. Tsaychömi ishkan wamayänakushpan waqapänakurqan.

5Warmikunata y wamrakunata rikärirmi Esaúqa tapurqan kayno nir: <<¿Pitaq paykunaqa?>>

Tsayno tapuptin Jacob kayno nirqan: <<Tayta Dios qomashqan wamräkunami kaykan, papä>>.

6Tsaypitanami Jacobpa ashmaynin kaq ishkan warminkuna wawankunawan nawpanman aywapäkurqan. Paykunapis Esaúta respitashpan urkunpis pampaman töpashqanyaq qonqurpakurqan. 7Tsaynölami Leapis chayaykur wawankunawan Esaúpa nawpanman qonqurpakurqan. Tsaypitana Raquelpis chayaykur wawan Joséwan Esaúpa nawpanman qonqurpakurqan.

8Nirkurmi Esaú kayno nirqan: <<¿Imanirtaq punta punta rakiykur uywaykikunata qatiykätsimunki, wawqi?>>

Tsayno niptinmi Jacobqa kayno nirqan: <<Walkalatapis qampaqchaq qatitsimushqä, papä>>.

9Tsaymi Esaú kayno nirqan: <<Wawqi, noqapapis atskami uywäkuna kaykan. Qaramänaykipaq#33.9 Wakin runakunaqa regalamänaykipaq nipäkun. qatitsimushqaykiqa kikikipaq kaykulätsun>>.

10Tsayno niptinnami Jacobqa kayno nirqan: <<Qaranäpaq apamushqä uywakunata chaskiykalämay, papä. Chaskimaptikimi musyashaq ali shonquykiwan chaskimashqaykita. Ali chaskimashqaykipita Tayta Diosta rikaykuqnöraqmi kushishqa kaykä. 11Qampaq apamushqä uywakunata chaskiykalämay. Tayta Dios yanapamaptinmi rïcuyashqä>>.

Jacob tsayno yaparir yaparir ruwakuptinmi Esaúqa chaskirqan qarashqan uywakunata.

12Chaskirkurnami Esaúqa kayno nirqan: <<Aywakushunna. Noqa aywashaq qamkunapa nawpaykita>>.

13Tsawraqa Jacob kayno nirqan: <<Rikashqaykinöpis wamräkunaqa pishilaraqmi kaykan. Uywäkunapis wawayuqmi kaykan. Chayanantsiyaq juk junaqlacho qatiptïqa utikashpan uyshäkuna cabräkuna capazchari wanuykunmanpis. 14Tsaypa trukanqa nawpakuy, papä. Uywäkuna wamräkuna aywashqanman tupuylami shamushaq. Tashqayki Seirchönami yapay tinkushunpaq>>.

15Tsayno niptinmi Esaúpis kayno nirqan: <<Tsayno kaptinqa pushamushqä wakin runakunata kachapäshayki yanapashunaykipaq>>.

Tsaymi Jacob kayno nirqan: <<Ama afanakuytsu, papä. Ali chaskimashqaykipitami kushishqa kaykä>>.

16Tsawraqa Esaú tsay junaqla Seirman kutikurqan. 17Jacobnami aywakurqan Sucotman. Tsaychönami wayinta ruraykur uywankunapaqpis ramädakunata rurarqan. Tsaymi tsay partipa jutinta churaparqan Sucot#33.17 Sucot ninanqa ramäda ninanmi. jutin kananpaq.

18Tsaynöpami Padan-arampita kutimur Canaánman ali chayapäkurqan. Siquem marka tsimpanman chayaykurmi patsakärirqan. 19Tsay patsakushqan partitami Jacobqa rantirqan pachak (100) qellaywan Hamor runapa tsurinkunapita. Hamorpa jukaq tsurinpa jutinmi karqan Siquem.#Jos. 24.32; Juan 4.5. 20Tsaychömi altarta Jacob perqarkur jutinta churaparqan El-Elohe-Israel#33.20 El-Elohe-Israel ninanqa Tayta Dios Israelpa Diosninmi kaykan ninanmi. jutin kananpaq.

Currently Selected:

Génesis 33: qvmB

Highlight

Copy