Génesis 38

Tamar wachashqan

1Tsay witsanmi wawqinkunawan taykashqanpita Judá aywakurqan Hirapa wayinman. Hiraqa Adulam markapitami karqan. 2Tsaycho taykarmi Súa jutiyuq cananeo runapa tsurin jipashwan reqinakurkur warminpaq ashirqan. 3Warmin qeshyaq rikakurmi olqu wamrata wacharir jutinta churaparqan Er jutin kananpaq. 4Tsaypitanami yapay olqu wamrata wacharir jutinta churaparqan Onán jutin kananpaq. 5Tsaypita yapaypis juk olqu wamrata wacharir jutinta churaparqan Sela jutin kananpaq. Quezibcho Judá taykaptinmi tsay tsurinkuna yurirqan.

6Qechpa kaq tsurin Ertami Judáqa tätsirqan Tamar jutiyuq jipashwan. 7Erqa fiyu runa kashpan manami Tayta Dios munashqannötsu kawarqan. Tsayno mana cäsukushqanpitami Tayta Dios kamakätsirqan wanunanpaq.

8Tsawraqa shulka tsurin Onánta Judá kayno nirqan: <<Wawqikipa viüdanwan täkuy, hïju. Paycho tsuriki yuriptin wawqikipa tsurinnömi kanqapaq>>.#Deut. 25.5-6.

9Onánqa musyarqan tsurin yurirpis wawqinpa tsurinno kananpaq kashqantami. Tsaymi cuñädanwan punushpan ruraykashqan höra jorqurir juk läduman juturatsiq. Tsayno rurarqan wawqinpa tsurinno kananta mana munarmi. 10Tsayno Onán ruraptinmi Tayta Dios fiyupa rabyakur paytapis castigarqan wanunanpaq.

11Ishkan tsurinkuna tsayno wanuptin Judáqa yarparqan tsurin Selapis Tamarwan tashpan wanunanpaq kashqanta. Tsaymi Tamarta kayno nirqan: <<Tsurï Sela mözuyashqanyaq taytaykipa wayincho viüdala täkuy>>.

Tsayno niptinmi Tamarqa taytanpa wayinman kutikurqan.

12Tsaypita atska wata pasarkuptinnami Judápa warmin wanurqan. Tsay warmi karqan Súapa tsurinmi. Warminta lütuyta cumplirkurnami Judá aywarqan Timnatman. Tsaychömi minkayninkuna uyshankunapa milwanta rutuykarqan. Paytami Adulam markapita reqinakushqan Hira yanaqarqan.

13Timnatman milwa rutuq suedrun aywaykashqantami Tamarta wilarqan. 14Tsaymi lütu röpata trukakurir vëlunwan cäranta tsapakurqan pipis mana reqinanpaq. Nirkurnami Enaim marka yaykunaman jamakuykurqan. Tsayqa karqan Timnatman aywana nänichömi. Tamarqa tsayno rurarqan Sela poqushqa mözuna kaykaptinpis suedrun mana tätsiptinmi.

15Qaqlan tsapashqa warmi jamaraykaqta rikarmi Judá yarparqan wayrapakuq warmi kashqanta. 16Tsaymi nänipa aywaykashqanpita parlapaq aywarqan. Lumtsuynin kashqanta mana musyarmi kayno nirqan: <<¿Manatsuraq punukushwan, mamïta?>>

Niptinmi kayno nirqan: <<Punuptintsiqa ¿imatataq pägamanki?>>

17Tsaymi Judáqa kayno nirqan: <<Juk manta cabratachari apatsimushaq>>.

Tsawraqa warmi kayno nirqan: <<Rasunpa juk cabrata apatsimänayki kaptinqa imalatapis prenda kachapämay>>.

18Tsayno niptinmi Judá kayno nirqan: <<¿Imata kachapänätataq munanki?>>

Tsaymi kayno nirqan: <<Sëlluykita watuntinta y aptaraykashqayki tukruykita kachapämay>>.

Tsayno niptinmi tsaykunata kachapaykur paywan punurqan. Punushqanpitami Tamarqa qeshyaq rikakurqan. 19Nirkurnami Tamarqa wayinpa kutiykur jatirashqan vëlunta jorqurir lütu röpanta yapay jatikurqan.

20Tsaypitanami Judáqa amïgun Hirawan manta cabrata apatsirqan prendankunata shuntamunanpaq. Cabrata apakurkur aywarmi tsay warmita mana tarirqantsu. 21Tsaymi tsay markacho taq runakunata tapukurqan kayno nir: <<Tapukuläshayki, tayta. Kay Enaim markaman yaykunacho jamaraq wayrapakuq warmita ¿manaku rikalashqanki?>>

Tsayno tapukuptin tsay runakuna kayno nipäkurqan: <<Kaychöqa manami ima wayrapakuq warmitapis rikapäkushqätsu>>.

22Runakuna tsayno niptinmi Judá kaqman kutiykur wilarqan kayno nir: <<Manami tsay warmita tarishqätsu. Tsay runakuna nimashqa imaypis tsaycho wayrapakuq warmi mana kashqantami>>.

23Tsawraqa Judá kayno nirqan: <<Mana tarishqa kaykaptikiqa imanäshuntaq. Yapay ashiptintsiqa runakuna asipämäshunmi. Prendata kachapämushqäkunata jina apakutsunpis>>.

24Tsaypita kimsa killatanömi runakuna shamur Judáta kayno nirqan: <<¡Lumtsuyniki Tamar runawanmi punushqa kanqa! ¡Tsaymi kanan qeshyaq kaykan!>>

Tsawraqa Judá fiyupa rabyashpan kayno nirqan: <<¡Tsay niraq warmitaqa wayinpita jorqurir rupatsipäkuy!>>

25Wanutsinanpaq aparkaykaptinmi suedrun Judáman Tamar wilakatsirqan kayno nishpan: <<Prendata kachapämashqan runapatami qeshyaq kaykä. Kanan reqiykulay kay watuntin sëllu y tukru pipa kashqantapis>>.

26Tsaymi Judáqa kikinpa kashqanta reqirkur kayno nirqan: <<Payqa manami jutsayuqtsu. Noqami jutsayuq kaykä tsurï Selawan mana tätsishqäpita>>.

Tsaypita patsa Judáqa lumtsuyninwan manana punurqannatsu.

27Killan aypämuptin Tamar wacharqan milïshuta. 28Wachayta nakaykaptinmi jukaq wamrapa makin yarqamurqan. Tsaymi partëraqa puka hïluwan wataparkur kayno nirqan: <<Kay kaqmi qechpa kaykan>>.

29Nirkurmi jinan höra makinta kutitsikurqan. Tsaypita wawqin puntata yuriptinmi partëra kayno nirqan: <<¿Imanöparaq kayqa jukaqta yalimushqa?>>

Puntata yurishqanpitami tsay wamrapa jutinta churaparqan Fares#38.29 Fares ninanqa kichaq ninanmi. jutin kananpaq. 30Tsaypitaraqmi puka hïluwan makin watashqa kaykaq yurirqan. Tsay wamrapa jutintami churaparqan Zara#38.30 Zara ninanqa atsikyaq ninanmi. Tsayno jutinta churaparqan puka hïluwan watashqa kashqanpitami. jutin kananpaq.

Currently Selected:

Génesis 38: qvmB

Highlight

Copy