Génesis 45

Wawqin kashqanta José wilashqan

1Judá tsayno wilaptinmi Joséqa mana awantakurqannatsu wawqin kashqanta wilayta. Tsaymi ashmaynin runakunata kayno nirqan: <<Lapayki kaypita yarqukäriy>>.

Ashmayninkuna yarquriptinnami wawqinkunalawanna José quëdarqan.#Hech. 7.13. 2José qaparayparaq waqashqantami Egipto runakunapis mayapäkurqan. Tsaynölami Faraónpa palaciunchöpis musyapäkurqan.

3Tsaypitanami wawqinkunata José kayno nirqan: <<Josémi kaykä. ¿Rasunpaku papänï kawaykanraq?>>

Josépa nawpancho kaykashqanta musyaykurmi wawqinkunaqa pasaypa ukakashqa rikakärishpan ima niytapis mana kamäpakurqantsu. 4Nirkurnami José kayno nirqan: <<Mana mantsakamaypa nawpäman witipäkamuy>>.

Nawpanman witiykuptinnami kayno nirqan: <<Noqaqa Egiptuman rantikamashqayki wawqiki Josémi kaykä. 5Rantikamashqaykipita amana lakikäriytsu. Tsaynöpis jitapänakur nanaq nawikipa ama rikapänakuytsu. Tayta Diosmi puntaykita kayman kachamashqa runakuna muchuywan mana wanupäkunanpaq. 6Ishkay watanami maytsaychöpis fiyupa muchuy kaykan. Tsaynöpis pitsqa wata masraqmi muchuy kanqa. Runakuna muruptinpis manami mikuy wayunqatsu. 7Tsayno kananpaq kaptinmi Tayta Dios qamkunapa puntaykita kachamashqa muchuywan mana ushakänaykipaq. Tsaynöpami qamkunapita miraqkunapis ushakanqatsu. ¿Piraq ichiklatapis yarpanman karqan Tayta Dios tsayno kamakaykätsishqanta? 8Tayta Dios munaptinmi qamkunaqa mana tantiyarpis rantikäramarqayki. Tsaymi kay nacioncho noqata churamashqa Faraónta mandäshinäpaq, wayinta rikanäpaq y lapan Egipto runakunapa gobernadornin kanäpaq.

9<<Kananqa papänintsi kaqman jukla kutiykur kayno wilanki: <Tsuriki Josétami Tayta Dios churashqa Egipto runakunapa taytanno kananpaq. Juklashi aywashun tinkunaykipaq. 10Wanunaykiyaqpis José yanapashunaykipaqshi imaykantsitapis apakurkur lapan wilkaykikunawan y uywaykikunawan Gosén partiman aywakärishun. 11Tsay nacionchöshi imapis mana pishïmänantsipaq mikuyta kamaripämäshun. Pitsqa wataraqshi muchuy tsaynöla kanqapaq>.

12<<Tsayno niykashqätaqa wawqï Benjamínwan lapaykimi mayarkaykämanki. 13Egiptucho lapanpis respitamashqanta papänintsita wilapäkunki. Tsaynöpis wilapäkunki kaycho lapan rikashqaykikunata. Kananqa jukla aywapäkuy papänintsita pushamunaykipaq>>.

14Nirkurmi Joséwan Benjamín makalanakurkur waqapänakurqan. 15Tsaynölami wakin wawqinkunatapis mutsashpan makalakurkur José waqarqan. Tsaypitaqa mana mantsakuypanami wawqinkuna Joséta parlaparqan.

Egiptucho tänanpaq Jacobta Faraón qayatsishqan

16Josépa wawqinkuna chayamushqanta musyarmi Faraónqa lapan mandäshiqninkunawan kushikurqan. 17Tsaymi Joséta Faraón kayno nirqan: <<Wawqikikunata niy bürrunkunaman cargakurkur Canaánman kutinanpaq. 18Nirkur papänikita y lapan aylunkunata kayman pushamutsun. Chayamuptinnami alinnin partita rikatsishaq tsaycho tänanpaq. Tsaynöpis kay nacioncho alinnin mikuytami mikupäkunqapaq. 19Tsaynöpis niy kaypita carrëtakunata aparkur warmikunata, wamrakunata y papänikitapis apamunanpaq. 20Imaykantapis apamuyta mana kamäpakushqanpitaqa ama lakikäritsuntsu. Egiptucho mas ali kaqkunatami chaskipäkunqa>>.

21Israelpa#45.21 Israelqa Jacobpa jukaq jutinmi kaykan. tsurinkunaqa José nishqannölami lapantapis rurapäkurqan. Josépis Faraón nishqannölami carrëtakunata apatsirqan. Nänicho mikupäkunanpaqpis mirkapatami ruratsirqan. 22Tsaynöpis trukakunanpaq mushuq röpakunatami jukninta juknintapis aypurqan. Benjamíntami itsanqa kimsa pachak (300) siclo qellayta y pitsqa trukaq mushuq röpakunata qorqan. 23Papäninpaqnami apatsirqan chunka bürrukunawan Egiptucho imaykapis mas alinnin kaqkunata. Tsaynöpis apatsirqan chunka china bürrukunawan trïguta, tantata y wakin mikuykunatapis Egiptuman aywashpan mikupäkunanpaq. 24Wawqinkunata despacharmi José kayno nirqan: <<Nänicho paqta rimanakurkaykankiman>>.

Tsayno yätsirkuptinmi aywakärirqan.

25Egiptupita kutirnami papänin Jacob tashqan Canaánman chayarqan. 26José kawaykashqanta y Egiptucho mandaq kaykashqanta wilaptinmi Jacob ima niytapis mana kamäpakurqantsu ni criyirqantsu. 27José nishqankunata wilaptinmi y payta apananpaq carrëtakunata apatsishqanta rikaykurmi itsanqa pasaypa kushikurqan. 28Tsaymi kayno nirqan: <<¡Kananmi itsanqa tsurï José kawaykashqanta musyaykulä! ¡Manaraq wanur jukla aywashaq tsurïwan tinkunäpaq!>>

Currently Selected:

Génesis 45: qvmB

Highlight

Copy