Génesis 46

Egiptuman Jacob aywashqan

1Lapan imaykantapis apakurkurmi Israelqa#46.1 Israelqa Jacobpa jukaq jutinmi karqan. Egiptuman aywakurqan. Beersebaman chayaykurmi papänin Isaac yärakushqan Tayta Diosta adorashpan uywata pishtarkur altarcho rupatsirqan. 2Tsay tsakaymi Israelta Tayta Dios revelar kayno nirqan: <<¡Jacob, Jacob!>>

Tsaymi Jacobqa kayno nirqan: <<¿Imata, Tayta?>>

3Tsawraqa Tayta Dios kayno nirqan: <<Noqaqa papäniki yärakushqan Diosmi kaykä. Ama mantsakuytsu Egiptuman aywayta. Tsaychömi qampita miraqkunaman bendicionnïta churashaq atskaman mirar juk nación rikakunanpaq. 4Egiptuman aywaptikipis qamtaqa yanapashaykimi. Wanuptikipis tsuriki Joséqa nawpaykichömi kaykanqa. Tsaypitapis qampita miraqkunata Egiptupita kikïmi jorqamushaq>>.

5Tsayno niptin Beersebapita Egiptuman aywakurmi Faraón apatsishqan carrëtakunaman tsurinkuna witsätsirqan papänin Jacobta, pishi wamrankunata y warminkunatapis. 6Canaáncho ashmashqan kaqtaqa wäkankunata y uyshankunata qatikurkur y lapan imaykankunatapis apakurkurmi Egiptuman aywakärirqan.#Hech. 7.15. 7Tsaynöpami lapan tsurinkunawan y wilkankunawan Egiptuman Jacob chayarqan.

8Egiptuman aywaq Israel runakunaqa kaynömi karqan:

Jacobpa qechpa tsurin Rubén;

9Rubénpa tsurinkuna Hanoc, Falú, Hezrón y Carmi;

10Simeónpa tsurinkuna Jemuel, Jamín, Ohad, Jaquín, Zohar y Saúl (Saúlqa karqan cananea warmipa wawanmi);

11Levípa tsurinkuna Gersón, Coat y Merari;

12Judápa tsurinkuna Er, Onán, Sela, Fares y Zara (Erwan Onánqa Canaánlachönami wanurqan);

Farespa tsurinkuna Hezrón y Hamul;

13Isacarpa tsurinkuna Tola, Fúa, Job y Simrón;

14Zabulónpa tsurinkuna Sered, Elón y Jahleel.

15Paykunami karqan Jacobpa warmin Leapa wawankuna y wilkankuna. Leapa olqu wawankunaqa lapanpis Padan-aramchömi yurirqan. Tsaynölami wawan Dinapis tsaycho yurirqan. Leapa wawankuna y wilkankuna karqan kimsa chunka kimsa (33) warmipis y olqupis.

16Tsaynöpis Egiptuman aywarqan Gadpa tsurinkuna Zifión, Hagui, Ezbón, Suni, Eri, Arodi y Areli;

17Aserpa tsurinkuna Imna, Isúa, Isúi y Bería (paykunapa paninmi karqan Sera);

Beríapa tsurinkuna Heber y Malquiel.

18Paykunami karqan Zilpapa wawankuna y wilkankuna. Zilpaqa karqan Leapa ashmayninpaq taytan Labán qoykushqanmi. Zilpapa wawankuna y wilkankuna karqan chunka soqta warmipis y olqupis.

19Tsaynöpis Egiptuman aywarqan Jacobpa warmin Raquelpa wawan José y Benjamín.

20Josépami warmin Asenatcho tsurinkuna karqan Manasés y Efraín.#Gén. 41.50-52. Paykunaqa yurirqan Egiptuchömi. Asenatqa karqan On markacho taq cüra Potiferapa tsurinmi.

21Benjamínpa tsurinkunami karqan Bela, Bequer, Asbel, Gera, Naamán, Ehi, Ros, Mupim, Hupim y Ard.

22Paykunami karqan Jacobpa warmin Raquelpa wawankuna y wilkankuna. Paykunaqa karqan chunka chuskumi.

23Tsaynöpis Egiptuman aywarqan Danpa tsurin Husim;

24Neftalípa tsurinkuna Jahzeel, Guni, Jezer y Silem.

25Paykunami karqan Bilhapa wawankuna y wilkankuna. Bilhaqa karqan Raquelpa ashmayninpaq taytan Labán qoykushqanmi. Tsay warmipa wawankuna y wilkankuna karqan qanchismi.

26Egiptuman Jacob chayarqan tsurinkunawan wilkankunawan soqta chunka soqtami (66). Tsayqa karqan tsurinpa warminkunata mana yupaylapami. 27Josépa tsurin Egiptucho ishkaymi yurirqan. Paykunatawan yupaptinmi Egiptucho Israel runakuna karqan qanchis chunkana (70).#46.27 Septuaginta nishqan unay griego traduccionchöqa qanchis chunka pitsqa (75) kashqantami niykan. Tsaynölami Hech. 7.14 niykan.

Gosénman Jacob chayashqan

28Gosénman chayaykarmi tsurin Judáta Jacob kacharqan Joséta kayno wilananpaq: <<Papänintsiwan tinkuqshi aywanki>>.

Tsaypitanami Gosénman Jacob chayarqan. 29Josénami cawalluwan qarachana carrëtanta alistarkatsir papäninwan tinkuq aywarqan. Papäninwan tinkuykurmi makalanakurkur waqapänakurqan. 30Tsawraqa Joséta Israel kayno nirqan: <<Qamwan tinkushqächönaqa jina wanukushaqnapis>>.

31Tsaypita wawqinkunata y wakin aylunkunata José kayno nirqan: <<Aywä Faraón kaqman chayamushqaykita wilanäpaq. Paytami kayno nishaq: <Canaánpitami chayamushqa papänï, wawqïkuna y wakin aylükunapis. Paykunaqa shakärimushqa noqawan nawpa nawpala tänanpaqmi. 32Tsaymi uyshankunata, cabrankunata y wäkankunata qatishqa chayapäkamushqa. Tsaynölami lapan imankunatapis apakärimushqa. Paykunaqa uywa ashmakuylatami yachapäkun>. 33Faraónta tsayno wilaptïmi qamkunata qayaykur imacho arupäkushqaykitapis tapushuptikiqa 34kayno nipäkunki: <Noqakunaqa unay aylükunanöpis wamra kashqäpita patsa uywa ashmaylatami yachapäkü>. Tsayno wilaptikimi uysha mitsiq runakunata Egipto runakuna melanaptin Gosén particho tänaykipaq nishunki>>.

Currently Selected:

Génesis 46: qvmB

Highlight

Copy