Lucas 20

Jesústa cürakuna tapushqan

Mateo 21.23-27; Marcos 11.27-33

1Juk kutimi Tayta Diospa ali wilakuyninta templu patiucho Jesús yachaykätsiptin mandaq cürakuna, ley yachatsiqkuna y mayor runakunapis chayapäkurqan. 2Paykunami kayno tapupäkurqan: <<¿Pipa munayninwantaq rantikuqkunata qarqushqanki? ¿Pitaq nishushqanki tsayno qarqunaykipaq?>>

3Tsayno tapuptin Jesús kayno nirqan: <<Qamkunatapis mä tapushayki. 4¿Pitaq Juanta kachamushqa bautizananpaq? ¿Tayta Diosku o runakunalaku?>>

5Tsayno tapuptinmi kikinpura kayno parlapäkurqan: <<Tayta Dios kachamushqanta niptintsiqa: <¿Imanirtaq mana chaskikärishqankitsu?> nimäshunmi. 6Runakuna kachamushqanta niptintsiqa saqmaykälarmi runakuna wanutsimäshunpaq. Lapanmi yarpapäkun Juan profëta kashqanta>>.

7Tsawraqa Jesústa kayno nipäkurqan: <<Manami musyapäkütsu pï kachamushqantapis>>.

8Tsayno niptinmi Jesús kayno nirqan: <<Noqapis manami wilashaykitsu pipa munayninwan rantikuqkunata qarqushqätapis>>.

Chakra arriendaq runakunaman tinkutsiypa Jesús yachatsishqan

Mateo 21.33-46; Marcos 12.1-12

9Tsaypitanami tinkutsiypa runakunata yachatsir Jesús kayno nirqan: <<Juk runashi chakranman üvata plantatsirqan. Nirkur tsay chakranta arriendakuykur juk lädu markapa aywakurqan.

10<<Cosëcha qalaykuptinnashi juk ashmayninta kacharqan arrindunpita cobramunanpaq. Tsay ashmay chayaykuptinshi pasaypa maqarkur jinaylata qarqurirqan. 11Tsayshi chakrapa duëñun juk ashmayninta yapay kacharqan. Tsaytapis ashlirkur y maqarkurshi jinaylata qarqurirqan. 12Tsaypita juk ashmayninta yapay kacharqan. Paytapis tsaynöla yawar yawar maqarkurshi qarqurirqan.

13<<Tsawraqa chakrayuq yarpachakurqan kayno nir: <Kanan ¿imatataq rurashaq? Kuyay tsurïtami kachashaq. Paytaqa alimi chaskikärinqa>.

14<<Tsurin aywaykaqta rikärirshi chakra arriendaqkuna wilanakur kayno nipäkurqan: <Taqaymi kay chakrawan quëdananpaq kaykan. Kanan wanuratsishun noqantsipaqna chakran kananpaq>. 15Chayaykuptinnashi wilanakushqannöla üva chakrapita juk läduman apaykur wanutsipäkurqan>>.

Tsayno wilaparkurmi Jesús kayno nirqan: <<Üva chakrapa duëñun ¡imataraq ruranqa tsay runakunata! 16¿Manatsuraq lapanta wanutsir ushanqa? Nirkurqa chakrantapis juktanami arriendakuykunqa>>.

Tsayno niptinmi runakuna kayno nipäkurqan: <<¡Tsayno kanantaqa Tayta Dios ama munaykulätsuntsu!>>

17Tsayno niptinmi paykunata rikärir Jesús kayno nirqan: <<Tayta Diospa palabrancho kayno qelqaraykashqanta tantiyakäriy:

<< <Wayi sharkatsiqkuna <<kay rumiqa manami alitsu>> nir jitarishqanmi wayi esquïnan cimientuchöna churaraykan>.#20.17 Tsay rumimanmi Jesucristo tinkutsikurqan. Tsayno nirmi tantiyatsirqan chikiptinpis Tayta Dios lapanpitapis mas munayniyuq kananpaq churashqanta.#Sal. 118.22.

18Pipis tsay rumiman tuniq kaqqa ushakanqami.

Tsaynölami pipa jananmanpis tsay rumi chayarqa pasaypa ushakätsinqa>>.

19Tsayno yachatsiptinmi mandaq cürakuna y ley yachatsiqkuna paykunapa contran rimaykashqanta tantiyar#20.19 Tsay tinkutsikuy kaynömi kaykan: Chakrayuqqa Tayta Diosmi. Chakrayuq kachashqan ashmayninkunanami Tayta Diospa profëtankuna. Chakrayuqpa tsurinnami Jesucristo. Chakra arriendaq fiyu runakunanami Jesucristupa contrankuna. prësu tsaritsiyta munapäkurqan. Tsayno munarpis runakunata mantsakushpan manami tsaritsipäkurqantsu.

Impuestuta pägananpaq Jesústa tapushqan

Mateo 22.15-22; Marcos 12.13-17

20Tsaymi gobernadorman prësu apatsinan kashqa Jesús kaqman runakunata kachapäkurqan ali shimilanpa parlapar lutanta rimatsinanpaq. 21Chayaykurmi tsay runakuna Jesústa kayno nirqan: <<Rabí, noqakuna musyapäkümi imata yachatsirpis y rimarpis rasun kaqlata niykashqaykita. Manami runakuna alabashunaykita munartsu yachatsinki, sinöqa Tayta Dios munashqannölami. 22Romacho mandaq Césarpaq ¿impuestuta pägashwanku o manaku?>>#20.22 Israel runakuna nirqan Romapaq impuestuta pägar Tayta Diospa contran kaykashqantami. Tsaymi: <<Impuestuta pägashun>> niptinqa Diospa contran Jesús parlashqanta nipäkunman karqan. <<Ama pägashuntsu>> niptinqa Roma autoridäkuna rabyapäkunmanmi karqan.

23Lutanta parlatsinanpaq tapushqanta tantiyarmi Jesús kayno nirqan: 24<<Mä impuestu pägana qellayta rikatsimay. Kay qellaycho ¿pipa reträtuntaq kaykan? Tsaynöpis ¿pipa jutintaq qelqaraykan?>>

Tsaymi kayno nipäkurqan: <<Mandaq Césarpami>>.

25Tsawraqa Jesús kayno nirqan: <<Césarpa kaqtaqa Césarta qoykuy. Tayta Diospa kaqtaqa Tayta Diosta qoykuy>>.#20.25 Tayta Diospa kaqqa kawaynintsimi kaykan.

26Runakunapa nawpancho imatapis lutanta parlatsiyta mana kamäpakushpanmi tsay runakuna mantsakashqa rikakur upälakärirqan.

Wanushkuna kawarimunanpaq kashqanta Jesústa tapushqan

Mateo 22.23-33; Marcos 12.18-27

27Tsaypitami wakin saduceukuna Jesústa tapuq aywapäkurqan. Paykunaqa manami criyipäkuntsu wanuqkuna kawarimunanpaq kashqanta.#Hech. 23.8. 28Tsaymi Jesústa tapur kayno nipäkurqan: <<Rabí, Moisés qelqashqancho kaynömi niykan: <Warmiyuq runa tsuriynaq wanuptin wawqinmi cuñädan viüdawan tanqa. Tsaynöpami wamrankuna kaptin tsay wanuq wawqinpa tsurinkunano kanqa>.#Deut. 25.5. 29Kanan nishayki. Juk markachöshi qanchis wawqikuna karqan. Qechpa kaqshi warmita ashirqan. Payshi manaraq tsurin kaptin wanukurqan. 30Tsayshi shulka kaq wawqinna tsay viüdawan tarqan. [Paypis tsurin manaraq kaptinshi wanukurqan.] 31Tsaypita mas shulkan kaqnashi tsay viüdawan tarqan. Tsaynölashi lapan wawqinkuna tsay viüdawan tarqan. Tsurin manaraq kaptinshi lapanpis wanukurqan. 32Tsaypitanashi tsay viüdapis wanukurqan. 33Wanushkuna kawarimunan junaqqa ¿mayqanpa warmintaq kanqa, qanchis wawqiwan tashqa kaykarqa?>>

34Tsayno niptinmi Jesús kayno nirqan: <<Kay vïdalachömi warmiyuq y runayuqpis kaykan. 35Juk vïdaman chayananpaq akrashqa kaqkunaqa kawarirkamur manami warmiyuqtsu ni runayuqtsu kanqa. 36Tsaychöqa angilkunanömi mana wanuq kanqapaq. Kawarimushqa karmi Tayta Diospa wamrankunana kanqa.

37<<Wanushkuna kawarimunanpaq kashqantaqa Moiséspis qelqashqancho tantiyatsimantsimi. Paytami rupaykaq shirakacho yuriparkur Tayta Dios kayno nirqan: <Noqaqa Abrahampa, Isaacpa y Jacobpa Diosninmi kaykä>.#Éxo. 3.6. 38Tayta Diosqa manami wanushkunapa Diosnintsu kaykan, sinöqa kawaykaqkunapa Diosninmi. Paypaqqa wanushkunapis kawaykanmi>>.

39Tsayno niptinmi ley yachatsiqkuna wakin kayno nipäkurqan: <<Rabí, ¡alitami nishqanki!>>

40Tsaypitanaqa manami imatapis tapupayta almitirqannatsu.

Davidpitapis Cristo mas mandaq kashqan

Mateo 22.41-46; Marcos 12.35-37

41Tsaypitanami Jesús kayno nirqan: <<¿Imanirtaq runakuna nipäkun Davidpa Tsurin Cristo kashqanta? 42Kikin Davidpis Salmo librucho kaynömi qelqarqan:

<< <Mandamaqnïtami Tayta Dios kayno nirqan:

<<Alawqa kaq nawpäman jamakamuy 43lapan chikishuqnikikunata munaynikiman churanäyaq>> >.#Sal. 110.1.

44Kikin Davidpis kashqanta niykaptinqa ¿imanöpataq Cristuqa Davidpa Tsurin kanman?>>#20.44 Cristuqa manami David aylu kashqantatsu ñëgarqan, sinöqa Davidpita mas munayniyuq kashqantami nirqan.

Ley yachatsiqkuna y fariseukuna lutan ruraq kashqanta Jesús nishqan

Mateo 23.1-12; Marcos 12.38-40; Lucas 11.37-54

45Lapan runakuna mayaykaptinmi discïpulunkunata Jesús kayno nirqan: 46<<Paqta ley yachatsiqkunano kapäkunkiman. Paykunaqa runa tukushpanmi chaki puntanyaq sotänan jatishqa puripäkun. Pläzakunachöpis runakuna winchikur ali rikanantami munapäkun. Sinagögakunachöpis nawpaqninkunamanraqmi jamakärin. Mikunanpaq qayatsiptinpis mësachöraqmi mikuyta munapäkun. 47Viüdakunapa imaykantapis qechupäkun. Nirkurmi santu tukärishpan may höra Tayta Diosta manakärin. Tsayno kashqanpitami Tayta Dios mana kuyapaypa mas fiyupa castiganqa>>.

Currently Selected:

Lucas 20: qvmB

Highlight

Copy