Lir. 19

Bumayaanu bwa Sodomu

1Malaika babili abo boola Sodomu ekolooba. Luti aaba ekhaale a silibwa sie lukoba. Nga Luti ne ababona enyokha acha khubakaanila, enamikha bubweeni bwetiila asi, 2mala aloma ali, “Baami base, musaba mwaukhe mwiche munju yo omukholi wenywe, musaabe bikele mala mukone, mutikhinyi munyala mwauuna mwacha.”

Bakobosia bali, “Tawe, khulakona enje mu lukoba.”

3Ne kakhali Luti abekoonjelela lukali mala ekhumaliilikha baukha bacha naye bengila munju mwewe. Abakholela naikara, aapa kimikaati kikhalimo kamamela ta mala balia.

4Bakeni abo ne bakhakona tawe, babaandu be mu lukoba lwa Sodomu, basoleeli ne basaakhulu, babaandu boosi, khukhwola khu mu maliilisi babotookhelela enju. 5#Bakh. 19.22-24 Balaanga Luti bamureeba bali, “Babaandu babechile mu mwowo siilo sino bali waena? Barusie, okhurereere, khubakhole bakhasi.”

6Luti arura enje ekala kumuliango, 7mala ababoolela ali, “Bawandaayase, mwikoonjelela, mukhakhola sikholwa sie sifwaabi tawe! 8Ese ndi ne bakhaana base babili bakhabaakho no mundu owe siseecha tawe, khe mbarusie mala mubakhole nga mwenya. Ne kakhali mukhakhola sikholwa siosi siosi khu baandu babili bano tawe, sikila bengiile munju mwase.”

9Ne kakhali bamuboolela bali, “Rura ebweeni wefwe!” Mala baloma bali, “Omundu yuno omukwa busa mala enya khuuba omukhalaki? Nono khulakhukhola ewe kamabi lukali khukhilakho nibo.” Nio basiindikha Luti, mala beseenda siimbi khufunaka lulwiki. 10Babaandu babili abo barusia kamakhono bakhweesa Luti bamwingisia munju nimwo baaba, mala bekala lulwiki. 11#2 Bab. 6.18 Babofusia babaandu ba baaba khu muliango kwe enju batiiti ne bakhulu, nio balua khuabaasia khuyiima kumuliango, khunyoola tawe.

Luti arura mu Sodomu

12Nio babaandu babili abo baboolela Luti bali, “Olikho no mundu okundi ano? Bamusaani bowo, basoleeli bowo, bakhaana bowo, namwe okundi yesi yesi mu lukoba luno? Barusie abuundu ano. 13Khulikho khucha khubunia abuundu ano sikila Wele Omunyali Owa Bioosi auliile biliilo bie babaandu khu baandu bano mala akhurumire efwe khubunie Sodomu.”

14Nio Luti acha khu bamusaani bewe, ba baba ne balikho bacha khuaakha bakhaana bewe mala ababoolela ali, “Khola khangu mwinyokhe murure abuundu ano, sikila Wele Omunyali Owa Bioosi ali siimbi khubunia lukoba luno.” Ne kakhali nibo bebaasia bali alikho akhola chingacho busa.

15Oli makhelebeende, malaika bakhaka khukhola Luti abe khangu baloma bali, “Yinyokha obukule omukhasi wowo ne bakhaana bowo babili nibo oli nabo, okhakhola orio waelela mu munaanio kwe lukoba luno tawe” 16#2 Pet. 2.7 Luti naye aboyookhana. Nio, babaandu abo bamutiila niye no mukhasi wewe ne bakhaana bewe kamakhono, sikila Wele Omunyali Owa Bioosi aamukholela siisa, mala babarusia mu lukoba babara enje. 17Mulala khu malaika aloma ali, “Tima mwilukhe! Mukhekhebukhakho namwe mwimekho abuundu osi osi mu Litooma tawe, yilukhila mu bikulu, mukhakhola murio mwerwa tawe.”

18Luti akobosia ali, “Ee, kakhaba kario tawe baami base, 19lola, omukholi wenywe afukiililwe mu moni chenywe, mala mwamukholeele kamalayi khulwe khuonia bulamu bwewe. Ne kakhali bikulu bili aleeyi lukali se enyala natima nolayo tawe, butinyu bukhola burio bwanyoola mala nafwa. 20Lola eyo, lukoba lutiiti olwo luli siimbi, nyala nelukhilayo. Lekha mulile ebweeneyo. Luli lukoba lutiiti busa, mala bulamu bwase buone!”

21Amukobosia ali, “Bulayi nakhufukiiliile, se ndabunia lukoba nilwo olomile tawe 22Khangu! Yilukhila ebweeneyo! Sikila se ndakhola sisiindu siosi siosi ne okholayo tawe.”

Khwako lisina lie lukoba olwo lialaangwa lili Soari.

Libuna lia Sodomu ne Komora

23Enyanga yaba yasoile nga Luti oola Soari. 24#Mat. 10.15; 11.23-24; Lk. 10.12; 17.29; 2 Pet. 2.6; Yudi 7 Wele Omunyali Owa Bioosi aanya khu Sodomu ne Komora kumulilo kumubuusi khukhwama mwikulu, 25mala abunia chingoba echo, ne Litooma lioosi ne babamenya mungoba boosi nende buli simelwa sioosi. 26#Lk. 17.32 Mukha Luti, owaba enyuma wa Luti ekhebukha mala ekela libaale lia chumbe.

27Aburahamu acha bwangu makhelebeende kumutikhinyi abuundu niio eema ebweeni wa Wele Omunyali Owa Bioosi. 28Alola mu maayo mwa Sodomu ne Komora ne mu Litooma lioosi, mala abona liliisi ne lituukha khukhwama asi nga liliisi lie sisiooso siboofu. 29Nio liaba lirio, nga Wele ne abunia chingoba che mu litooma, nicho Luti amenyangamo. Wele aakhebulila Aburahamu mala arusia Luti khukhwama mu libuna elio.

Sikuuka sie Bamoabu ne Baamoni

30Luti arura mu Soari acha amenya mu bikulu ne bakhaana bewe babili, mu libina, sikila aria khumenya mu Soari. 31Omukhaana omubele aboolela omuro ali, “Paapa asaakhuluwe mala se aliio omundu khu sibala sioosi oonyala akhureera mala khwasaala babaana nga kumwiima kwe sibala sioosi tawe. 32Yiicha khunywesie paapa endali anywe ameele mala khukone naye nio khunyoole lisaaye khubirira khu niye.” 33Nio siilo esio banyweesia paapa wabwe endali ameela mala omukhaana omubele akona naye. Luti se amanyakho nga omukhaana ne echa amukonao namwe nga arekukha tawe, sikila aaba ameelile lukali.

34Endaalo eloondakho omubele aboolela omuro ali, “Ese ngonile ne paapa siilo, Khumunywesie lundi endali siilo sino siosi, mala wesi okone naye, nio fwembi khunyoole lisaaye khubirira khu paapa.” 35Nio siilo esio banyweesia paapa wabwe endali ameela, mala omukhaana omuro acha akona naye, ne Luti se amanyakho nga omukhaana ne echa amukonao namwe nga arekukha tawe, sikila aaba ameelile lukali. 36Mungila yino bakhaana ba Luti boombi banyoola chinda khukhwama khu paapa wabwe. 37Omubele asaala omwana owe sisoleeli, mala amutiuukha lisina ali Moabu. Niye oli paapa owe ba Moabu khukhwola khu ndaalo yino. 38Omukhaana omuro yesi asaala omwana owe sisoleeli mala amutiuukha lisina ali Benami. Niye oli paapa owe Baamoni khukhwola khu ndaalo yino.

Currently Selected:

Lir. 19: LUBUKUSU

Highlight

Copy