OBUCHACHILO 26
26
Isaka amenya mushialo shia Gerari
1Khandi inzala yindi yaliho mushialo, okhumeeta khunzala yeyimbeli, eyaliho mutsinyanga tsia Aburahamu. Kho Isaka natsia mushialo shia Gerari, khu Abimeleki omuruchi wa Abafilisiti. 2Mana OMWAMI Nyasaye naloleshela Isaka namuboolela ari, “Shiolatsiakhwo Misiri ta, omemenye butswa mushialo shia ndalakhuboolela. 3#Obucha. 22:16-18Omenye mushialo eshio, ne ndalabetsanga ninawe khandi ndalakhuhelesia tsikhabi, shichila ndalakhuhelesia iwe nende abolwibulolwo ebialo bino biosi. Khandi ndaloosia aka ndasuubisia okhukholela papawo Aburahamu. 4Ndalenjiyia abolwibulolwo shinga tsing'ining'ini tsiomwikulu, khandi ndalabahelesia ebialo bino biosi. Ne okhubirira mubolwibulolwo, amahanga koosi akokhushialo kalanyoola tsikhabi. 5Ndalakhuhelesia ikhabi, shichila papawo Aburahamu yambulila isie ne naliinda amalako nende amebaalo kanje.”
6Kho Isaka nahuuya natsia okhumenya Gerari. 7#Obucha. 12:13; 20:2Ne olwa abasaatsa bomushialo eshio bamureeba khukomukhasiwe, yaboola ari, “Oyo nomukhaana wefwe.” Shichila yaria okhwiyama mbu, nomukhasiwe naparanga mbu, abandu bomushialo eshio bakhamwira khulwa Rebeka. Okhuba Rebeka yali owelikondo lilayi muno khandi eliokhuchamisia. 8Olwa Isaka yali niyakhamenyayo oluhoono olurambi, Abimeleki omuruchi wa Abafilisiti nali munzuye, yahenjelela mwitirisha ne nalola Isaka natiilatiilanga khu Rebeka nende okhumutsunzuuna. 9Kho Abimeleki nalanga Isaka ne namureeba ari, “Khane uno nomukhasiwo. Mbushiina noboola mbu, nomukhaana wenywe?” Isaka namukalusia naboola ari, “Okhuba ndapaara mbu, yakhachila ndafwa.” 10Abimeleki nareeba Isaka ari, “Okhukholeele shiina shino? Mulala khubandu bano niyakhanguuhe okhukona nomukhasiwo, wakhabeele nokhureereere ifwe eshikha.” 11Kho Abimeleki nachetsiyia abandu naboola ari, “Omundu yesi yesi outiila khumusaatsa uno, noho okhutiila khumukhasiwe, aleerwa.”
12Mana Isaka naraaka ebiokhulia mushialo eshio ne mumuyika tsana okwo, nachesa ebiokhulia ebinji muno okhushila ebiayaraaka. Okhuba OMWAMI Nyasaye yali nahelesiye Isaka ikhabi. 13Mana Isaka nayindahala khandi nanyoola ebindu ebinji okhuula naba omuyinda muno. 14Yali namakondi amanji, tsing'ombe tsinyinji, nende abakholi abanji mana nikachila Abafilisiti nibatiilwa neshikhalikhali khulwa obuyindabwe. 15Kho, Abafilisiti nibabuka amayabo akamaatsi, kabakholi ba Aburahamu Samwana Isaka bali nibayaba Aburahamu mwene nashiliho mwoyo.
16Mana Abimeleki naboolela Isaka ari, “Tsia ehale okhurulekhwo, shichila oli namaani okhukhushila ifwe.” 17Kho Isaka narulaho natsia nakhoma liheema mwibanda lia Gerari ne namenya ebweneyo. 18Mana Isaka nayaba khandi amayabo kamaatsi, akali nikayabwa mutsinyanga tsia Aburahamu samwana, okhuba Abafilisiti bali nibakabuka olunyuma olwokhufwa khwa Aburahamu. Khandi nakakulikha ameera ka samwana yali niyakakulikha.
19Nebutswa olwa abakholi ba Isaka bayaba mwibanda ne nibanyoolamwo liyabo lieisebele eyamaatsi kafutukhanga, 20abaayi abomushialo shia Gerari basoolana nende abaayi ba Isaka nibaboola bari, “Amaatsi kano nakefwe.” Mana Isaka nakulikha liyabo elo mbu, “Obuyingani,” shichila bayingana ninaye. 21Mana abakholi ba Isaka nibayaba liyabo lindi, khandi abaayi beshialo shia Gerari nibasolanilakhwo nabayi ba Isaka. Kho nalikulikha mbu, “Obusuku.” 22Khandi yarulaho nayaba liyabo lindi, ne eliene elo shibaasoolanilakhwo ta, kho nalikulikha mbu, “Hano naheyangu,” naboola ari, “OMWAMI Nyasaye akhukaasiliye obwiyangu, ne bulano khulaba netsikhabi mushialo shino.”
23Olunyuma Isaka yatikulukha natsia Beerisheba. 24Mana OMWAMI Nyasaye namuloleshela eshilo shiatsana eshio, ne namuboolela ari, “Nisie Nyasaye, owa Aburahamu papawo, shiolaria ta, shichila endi ninawe, ndalakhuhelesia ikhabi, khandi ndalenjiyia olwibulolwo khulwa omukhalabani wanje Aburahamu.” 25Kho Isaka niyombakhaho eshimalilo shiemisango ne namwinamila Nyasaye. Khandi nasimikhaho liheemalie. Mana abakholi ba Isaka nibayaba habwene yaho liyabo liamatsi.
Indakano hakari wa Isaka nende Abimeleki
26 #
Obucha. 21:22
Mana omuruchi Abimeleki narula Gerari nali halala nende Ahuzatsi omuchetsiyiwe nende Fikoli omusesiawe, nibatsia okhulola Isaka. 27Ne Isaka namureeba ari, “Mwitsile okhundola mbushiina ne mumanyile mbu, mwasila isie khandi mwanonda mbu, emurulekhwo?” 28Nibamukalusia nibaboola bari “Khulolanga mbu, OMWAMI Nyasaye ali ninawe, kho khwenyanga mbu, nochama, ifwe ninawe khwitsube mana khukhole indakano hakari wefwe ninawe mbu, 29Shiolakhusaalisia ta, shinga olwa fwesi khulakhusaalisia iwe tawe. Ifwe khwakhukholela amalayi nikhukhuseebula nomulembe. Ne bulano niwe owa OMWAMI Nyasaye yahelesia ikhabi.”
30Kho Isaka nabakaasilia ebiokhulia nibalia khandi nabahelesia eshiokhunywa nibanywa. 31Olwa bwashia, babuukha mumabwibwi nibakhola indakano ne nibetsubilana okhuchilinda. Mana Isaka nabakooba khunjila yabwe ne nibaseebulana mumulembe.
32Khunyanga tsana eyo, abakholi ba Isaka betsa nibamuboolela khukeliyabo lia bali nibayabile, nibaboola bari, “Khunyoolile amaatsi.”
33Naye nalikulikha ari, “Shiba,” khulweshio eliira lielitookho elo ni Beerisheba okhuula olwa leelo.
Abakhasi ba Esau abarula mutsimbia tsindi
34Olwa Esau yali nemiyika amakhumi kane, yateeshia omukhasi undi mbu, Yuditsi, omukhaana wa Beheri, Omuhiti khandi nateeshia oundi mbu, Besematsi, omukhaana wa Eloni, Omuhiti, 35Abakhasi babili abo bakhola obulamu bwa Isaka nende Rebeka okhuba obutinyu.
Currently Selected:
OBUCHACHILO 26: OLUPR
Highlight
Share
Copy
Want to have your highlights saved across all your devices? Sign up or sign in
