OBUCHACHILO 32

Yakobo Yerechekha okhwakaana nende Esau

1Yakobo yatsiililila noluchendolwe, nabo abamalaika ba Nyasaye nibamwakaanila. 2Ne olwa Yakobo yabalola, yaboola ari, “Bano nabasikaari belihe lia Nyasaye!” Kho nakulikha habundu tsana eliira mbu, Mahamayimu.

3Yakobo yaruma abandu okhuranjilila okhutsia khumusiani wabwe Esau, owali namenyanga mushialo shia Edomu, 4nababoolela ari, “Muboolele omwami wanje Esau mbu, omukhalabaniwo, omusiani wenywe oulangwa mbu, Yakobo aboola ari, ‘Ndamenyilenje nende Labani mushialo eshicheni okhuula bulano. 5Ne endi nende tsing'ombe, tsisishili ebiayo, abakholi abasaatsa nende abakholi abakhasi. Ekhurumiile oburume buno iwe omwami kho mbu, engoosibwe imbeliwo.’ ”

6Abasaatsa abayila oburume obwo bachelesia likhuwa nibaboolela Yakobo bari, “Khuulile ewomusiani wenywe Esau, ne yetsanga okhukhwakaanila. Ali nabandu ebikhumila bine.” 7Mana oburi nende indenga nibitiila Yakobo. Kho nakabula abandu ba yali ninabo, emiruko, tsing'ombe, nende tsingamia, mumikanda chibili. 8Okhuba yapaara mumwoyokwe ari, “Esau naba nasasia omukanda mulala, okundi kuba kulahonokokha.”

9Khandi Yakobo nasaaya OMWAMI Nyasaye naboola ari, “Iwe Nyasaye wa kuuka wanje Aburahamu, khandi Nyasaye wa papa wanje Isaka, niwe owamboolela mbu, rula okalushe khubekhobo nende mushialo shienywe, ne olaakholela amakhuwa amalayi. 10Shingwanilekhwo kata nahatuutu okhunyoola obuheeli oburalilu nende obwisikwa obwa iwe umanyiye buno ta, shichila olwa isie ndaambukha omwalo kwa Yorodani kuno, shindaalikhwo neshindu shiosi shiosi ta, habula indabushi yonyene. Ne bulaano endi nemikanda emikhongo chibili. 11Ekhusaaya mbu, umbonie okhurula mumakhono komusiani wefwe Esau. Okhuba eriitsanga mbu, anyala okhwitsa okhunzira isie nende abaana halala nende banyinabwe. 12#Obucha. 22:17Nebutswa iwe wandachilisia ori, ‘Ndalakhukholelanga amalayi, khandi abolwibulolwo balaba abanji shinga omuyeshe kwomunyanza, kata abalanyala okhubalwa tawe.’ ”

13Mana Yakobo niyeyalisia habwene yaho. Khandi nalobola ebihaanwa biokhuyilila omusiani wabwe Esau. 14Ebihaanwa ebio biali tsimbusi tsikhasi ebikhumi bibili nende tsikhole amakhumi kabili. Amakondi amasubeeni ebikhumi bibili nende amamiiku amakhumi kabili, 15tsingamia amakhumi kataru etsiali nitsinuninjia halala nende abimoosi biatsio. Tsing'ombe tsitwasi amakhumi kabili nende tsisurusi ekhumi, tsisishili tsikhasi amakhumi kabili halala nebimoosi biatsio. 16Yakobo yakabulamwo emiruko echio mumikanda chibili ne nahelelesia abakholibe babili okhusinjilila buli omukanda kwemiruko echio. Kho nababoolela ari, “Mwimile mutsie imbeli wanje, ne muleshe obwiyangu hakari womukanda nende omukanda kundi kwemiruko echio.” 17Yamala naboolela omukholiwe owali niyemiile ari, “Olwa omusiani wefwe Esau yetsa okhwakaana ninawe nakhureeba ari ‘Oli omukholi wa wiina, ne otsitsanga hena? Ne nachio emiruko chili imbeliwo chino, nechia wiina?’ 18Omuboolele ori, ‘Chino nemiruko chiomukholiwo oulangwa mbu, Yakobo. Arumile mbu, khuhelesie omwamiwe Esau shinga eshihaanwa. Yakobo mwene ali inyuma yetsanga.’ ” 19Yakobo yaboolela omukanda kwakhabili, okwakhataru nende emikanda chindi chiosi echialonda khumiruko echio ari, “Mwesi muboolele Esau amakhuwa malala tsana ako olwa mwakaana ninaye. 20Khandi mumuboolele muri, ‘Omusumbawo Yakobo ali inyuma yetsanga.’ ” Okhuba Yakobo yaboola ario napaara mumwokwe ari, “Haundi ndalamuhotselesia omwoyokwe khulwebihaanwa ebieranjiliile okhuruma, ne olwa isie omwene embukaana ninaye, haundi anyala yambeela tsimbabasi mana yanzinjisie.” 21Kho ebihaanwa biaranjilila okhutsia imbeliwe, naye omwene nashili mwiheema eshilo shieinyanga eyo.

Eliira lia Yakobo likalukhasibwa okhuba Isiraeli

22Eshilo eshio, yabuukha nabukula abakhasibe babili, abaana bwabwe ekhumi na mulala nende abakholi babakhasibe babili abo ne niyambushila mwifubukho liomwalo kwa Yaboki. 23#Obuch. 10:12Yakobo yababukula nabaambusia injelekha womwalo nende buli shindu shia yali ninashio. 24#Hos. 12:3,4Nebutswa Yakobo yatong'a yenyene injelekha undi womwalo. Mana ebweneyo, yaliyo omusaatsa undi owamala alwane nende Yakobo eshilo tulu okhuula olwa eshialo bwashia. 25Ne lwomusaatsa oyo yalola mbu, shiahulanga Yakobo ta, yakhupa Yakobo mukhukuyu, mana likumba lieikhukunyu ya Yakobo nilirula mubwikhalo bwalio. 26Mana omusaatsa oyo naboolela Yakobo ari, “Ndekhuula enzie shichila eshialo bushietsanga.” Nebutswa Yakobo yamuboolela ari, “Shindalakhulekhuula otsie, nolashianaamila isie tsikhabi tawe.” 27Kho omusaatsa oyo nareeba Yakobo ari, “Niwe wiina?” Naye namukalusia ari, “Nisie Yakobo.” 28#Obucha. 35:10Mana omusaatsa oyo namuboolela ari, “Eliiralio shililabakhwo Yakobo khandi ta, nebutswa olalangwa mbu, Isiraeli, shichila olwanile nende Nyasaye khandi nolwana nende abandu ne nohula.” 29#Abay. 13:17,18Naye Yakobo nareeba omusaatsa oyo ari, “Mboolelakhwo nochama, niwe wiina?” Naye omusaatsa oyo yareeba Yakobo ari, “Eshichila niureeba eliira lianje nishiina?” Mana habwene nahabwene omusaatsa oyo nalaamila Yakobo tsikhabi. 30Kho Yakobo nakulikha habundu tsana mbu, “Penueli,” ne naboola ari, “Endutsi Nyasaye moni namoni, nebutswa shiefwile tawe.”

31Eliuba liafwindanga Yakobo nabura Panweli, ne natiechelanga shichila ikhukunyuye yali niyirulile mubwikhalo bwayo. 32Khulweshio, okhuula olwa leelo, Abaisiraeli shibaliitsanga inyama yomusi okwokhwibatswa, okuli khwifwonelo lieikhukunyu ta, okhuba omusaatsa oyo yakhupa ikhukunyu ya Yakobo.

Currently Selected:

OBUCHACHILO 32: OLUPR

Highlight

Copy