OBUCHACHILO 34
34
Okhurabasibwa khwa Dina
1Inyanga yindi Dina, omukhaana wa Yakobo yebula nende Lea, yatsia okhucheniha balala khubakhaana Abakanani. 2Olwa Shekemu, omwana wa Hamori Omuhiti, owali omuruchi weshialo eshio yalola Dina, yamukwakhwo namaani ne namurabasia. 3Mana Shekemu nachamisibwa nende obulayi bwa Dina, omukhaana wa Yakobo, namuheela, naboola ninaye amakhuwa amalayi kobuheeli. 4Kho Shekemu naboolela samwana ari, “Ukhwele Omukhaana uno, abe omukhasi wanje.”
5Mana Yakobo namanya mbu, Shekemu yonooniye Dina omukhaanawe. Ne abasiani ba Yakobo bali elwanyi nibatsiile okhwaya emiruko. Yakobo naholeela okhuula olwa abasianibe bali nibacheleele. 6Naye Hamori, samwana Shekemu narula natsia wa Yakobo okhuboola ninaye. 7Ne olwa abasiani ba Yakobo bachelela okhurula mushiayo, ne nibahulila akali nikekholeeshe, besundukha khandi nibatiilwa neliruma, shichila Shekemu yali nakholile akeshifwabwi mu Isiraeli, khulwa okhurabasia omukhaana wa Yakobo. Eshikhole shinga eshio shishiafuchililwa okhukholwa mu Abaisiraeli tawe. 8Hamori naboolela Yakobo ari, “Omusiani wanje Shekemu aheelile omukhaanawo, nochama lekha omusiani wanje amuteeshie. 9Chama khukhole indakano hakari wanje ninawe mbu, abandu banje nende aboobo bateeshianinjie. 10Nawe omenye hano ninefwe mushialo shiefwe shino, khandi obe omulekhuule okhumenya nokhola obukhala mushialo shiefwe shino shinga olwa wenya, nonyoola ingangayo okhurula mushio.”
11Shekemu naasaaya Yakobo samwana Dina nende abasianibe naboola khandi ari, “Chame mufuchiilile emuhelesia shiosi shiosi eshia mwenya. 12Mumboolele ikhwe yamwenya, ne mukhole ikhwe eyo okhuba hekulu muno shinga olwa mwenya. Ndalamuhelesia shiosi shiosi eshia mulenya, habula mbu, mufuchiilile omusiani wanje ateeshie omukhaana wenywe.”
13Mana abasiani ba Yakobo nibakaatia Hamori hala nende omusianiwe Shekemu okhuba Shekemu yali niyonooniye Dina omukhaana wabwe. 14Abasiani abo nibakalusia nibaboola bari, “Shikhunyala okhubakha omukhaana wefwe khumusaatsa oulaashebwa ta, kalaba aketsisoni khwifwe. 15Habula khulafuchilisania ninawe khwilako elala lino mbu, ashebwe shinga olwa ifwe khwashebwa, khandi buli omwanawo omusiani yesi ashebwe. 16Mana khulababashila abakhaana befwe, nefu khulateeshia abakhaana benywe, nikhumenya halala ninenywe, nikhwikhola abandu balala. 17Nebutswa nimukhaya okhuhulila akakhuboola, nimuloba okhushebwa, kho khulabukula omukhaana wefwe nikhukalukha ninaye inango wefwe.”
18Amakhuwa kabwe ako kachamisia Hamori nende omusianiwe Shekemu. 19Mana omusiani omuraaka oyo Shekemu shiyamala ashiinde okhushebwa ta, shichila yali nachamile muno omukhana wa Yakobo oyo. Ne yali niyahebwa oluyali olukhongo muno, mubomunzu yabwe. 20Kho Hamori nomusianiwe Shekemu nibeetsa niboola mwitookho, ahabakofu bakhung'anilanga, nibaboolela abasaatsa bamwo abamenyaho bari, 21“Abasaatsa bano nabeetsa befwe. Leshe bamenye mushialo shino khandi bakholelemwo obukhala, okhuba lole, omukunda okwo nomukhongo kubahela. Leshe khubukule abakhaana babwe nikhuteeshia, nefu khubabashile abakhaana befwe bateeshie. 22Habula abandu abo khulabafuchilila okhumenya ninefwe, mana babe eshindu shilala ninefwe, nikhuba nikhufuchilila lilako elala lino mbu, buli oweshisaatsa mwifwe okhuula ashebwe shinga bo bosi bashebungwa. 23Emiruko chiabwe nende ebindu biabwe bindi biosi bilaba ebiefwe. Khulweshio chende khufuchilisanie ninabo, bamenya ninefwe.” 24Ne boosi abali nibeetsile mumukhung'ano kwabakofu mwitookho omwo nibafuchilila amakhuwa ka Hamori nomusianiwe Shekemu baboola. Mana buli oweshisaatsa, owetsa mumukhung'ano kwabakofu nashebwa.
25Khunyanga yakhataru olwa bali nibashebilwe nibashilwalanga, abasiani ba Yakobo babili, Simoni nende Lawi abasiani babwe Dina, babukula tsinganga tsiabwe nibaseera litookho mumaasilisi ne nibeera abandu abasaatsa boosi. 26Nibeera Hamori nomusianiwe Shekemu ne nibabukula Dina okhurula munzu mwa Shekemu nibatsia ninaye. 27Mana abasiani ba Yakobo nibakalukha mwitookho elo, ne nibaliyaaya liosi shichila liali lionooniye omukhaana wabwe. 28Babukula emiruko, ebiayo, tsisishili, nende buli shindu eshiali mwitookho omwo nende mumikunda. 29Bayaaya emiandu chiabwe chiosi, abaana babwe, abakhasi babwe, nende biosi ebiali mutsinzu, nibabibukula nibatsia ninabio. 30Mana Yakobo naboolela Simoni nende Lawi ari, “Mundeereere amasila khulwa okhukhola isie okhuba omusuku khubeene eshialo, Abakanani nende Abaperisi, abeinzu yanje nibatuutu, ne abeene eshialo nibetsukhana bekhuung'asia halala mana babuusie lihe okhukhuseera ifwe, kho baba balaamumulula isie halala nende abeinzu yanje boosi.” 31Nebutswa nabo bakalusia Yakobo nibareeba bari, “Shikhunyala okhulekha Shekemu akhole omukhaana wefwe shinga ouli omutamba butswa tawe.”
Currently Selected:
OBUCHACHILO 34: OLUPR
Highlight
Share
Copy
Want to have your highlights saved across all your devices? Sign up or sign in
