LUKA 11

Amechesio ka Yesu khu akokhusaaya

(Mat. 6:9-13; 7:7-11)

1Olundi Yesu yali habundu undi nasaayanga. Ne olwa yamala, mulala khubeechibe yamureeba ari, “Omwami, okhwechesiekhwo okhusaaya shinga olwa Yohana Omubatiisi yechesia abeechibe.” 2Mana Yesu namuboolela ari, “Olwa musaaya, muboolenje muri,

‘Seefwe, eliiralio liriibwe.

Obwamibwo bwitse.

3Buli lwosi okhuhelesie eshiokhulia shiefwe shia buli nyanga.

4Okhuleshele obwonooni bwefwe,

okhuba fwesi khuleshelanga abakhwonoonelanga ifwe boosi.

Khandi shiolakhuyila mukhuteemwa tawe.’ ”

5Mana Yesu naboolela abeechibe ari, “Oundi khwinywe naba natsia womwitsawe mushilo hakari, mana amuboolele ari, ‘Omwitsa wanje, ndenya uhosiekhwo emikaate chitaru. 6Okhuba omwitsa wanje undi yetsile ewanje narula khuluchendo, nasi shiendikhwo neshiokhulia shiokhumuhelesia tawe!’ 7Ne omwitsawe oyo naba nakalusia nali munzumwe ari, ‘Lekha okhuunyasia! Emalile okhwikala omuliango, khandi isie nabaana banje khwiyalisiye. Shienyala okhubuukha ekhuhelesie eshindu shiosi shiosi tawe.’ 8Kho kakhaba karie? Abwatoto buli mbu, kata nalanyala okhubuukha mana amuhelesie emikaate echio shichila mbu nomwitsawe ta, alabuukha amuhelesie ebia yenyile ebio biosi, shichila mbu, alumiliile okhusaba nalafimbwa omurwe tawe.

9“Khulweshio emuboolela mbu, Sabe, naye Nyasaye alamuhelesia, khaabe, ne mulanyoola, khong'onde, ne mulekulilwa. 10Okhuba yesi yesi ousaba, alahebwa, oukhaaba alanyoola, naye oukhong'onda khumuliango, alekulilwa. 11Khwinywe alikhwoho omwibusi owomwanawe asaba inyeeni, naye namuhelesia inzokha? 12Noho kata owomwanawe asaba libuyu, naye namuhelesia likhala? 13Kho bulano inywe, shinga olwa muli butswa ababi murio, mwamanya okhuhelesia abaana benywe ebihaanwa ebilayi, Senywe ouli mwikulu yakhabula arie okhubahelesia Roho Omutakatifu abo abakhamusaba!”

Yesu nende Belizebuli

(Mat. 12:22-30; Mrk. 3:20-27)

14Yesu yali narusinjia eshishieno mumundu wolulimi lwahanda, ne olwa eshishieno eshio shiarula, omundu owolulimi lwali nilwahanda oyo yachaaka okhuboola. Mana abemikanda nibahuka. 15#Mat. 9:34; 10:25Nebutswa abandi khubo nibaboola bari, “Ni Belizebuli, omukhongo webishieno oumuhelesinjia obunyali obwokhurusia ebishieno.” 16#Mat. 12:38; 16:1; Mrk. 8:11Abandi benya okhureka Yesu, kho nibamureeba mbu, akholekhwo akamakana okhumanyia mbu, yali nobunyali okhurula khu Nyasaye. 17Nebutswa Yesu yamanya aka bali nibapaaranga, ne nababoolela ari, “Lihanga elikabukhaanemwo emikanda chiokhulwana echiene khuchiene, shilinyala okhuyindila ta. Kata litaala elikabukhaanemwo emikanda echiokhulwana echiene khuchiene lisikhanga. 18Kho oburuchi bwa Setani bwosi nibuba nibukabukhana mumikanda echiokhulwana echiene khuchiene bwakhanyala burie okhuyindila? Okhuba inywe muboolanga mbu, isie erusinjia ebishieno khulwa obunyali bwa Belizebuli. 19Ne isie nimba nirusinjia ebishieno khulwa obunyali bwa Belizebuli, kho abalondi benywe nabo babirusinjia khulwobunyali bwa wiina? Khulweshio abalondi benywe beene nibo abalamukhalachila eshiina. 20Nebutswa isie nimba nirusinjia ebishieno khulwa obunyali bwa Nyasaye, kho Obwami bwa Nyasaye bumalile okhumwitsila inywe.

21“Olwa omundu wamaani, khandi owimanule ebimanulwa bielihe biosi, alindanga litaalalie, emianduchie chiosi chibetsanga obulayi mumulembe. 22Nebutswa oundi, oumushila amaani naba namuseera mana amuhule, anuulanga mwene litaala oyo ebimanulwabie biosi ebia yesika, ne amala akabulamwo ebiyaayobie.

23 # Mrk. 9:40 “Omundu yesi yesi oulali halala ninasi ta, yafukulanga isie. Naye oulakhung'asia halala ninasi ta, asalaasinjia.

Okhukalukha khwa roho weshifwabwi

(Mat. 12:43-45)

24“Ne olwa roho weshifwabwi abetsanga narulile mumundu, abiranga aha amaatsi kabula, nakhaaba aha ahuluushila. Ne nalanyoola ta, amalanga aboole ari, ‘Ndalakalukha munzu yali yanje.’ 25Kho olwa yolamwo, nanyoola inzu eyo niyeeyilwe khandi niyikaasiibwe obulayi bwene. 26Ne arulaho atsia okhulanga roho bandi beshifwabwi musafu abamusila obumayanu, nibetsa benjila nibamenya munzu omwo. Kho mukhumalilikha, omundu oyo abetsanga omumayanu muno okhushilakhwo shinga olwa yali mukhuchaaka.”

Obusaangaafu bwatoto

27Ne olwa Yesu yali nashiboolanga amakhuwa ako, omukhasi undi owali mumukanda okwo yaboola nomwoyo omukhongo ari, “Noweikhabi omukhasi owakhwibula khandi nakhunuunia!”

28Nebutswa Yesu yakalusia naboola ari, “Nabeikhabi abahulilanga likhuwa lia Nyasaye ne nibalikhola.”

Abafarisayo benya eshilolelo shiamakana

(Mat. 12:38-42)

29 # Mat. 16:4; Mrk. 8:12 Ne lwomukanda kwabandu kwatsiililila okhumeetekha, Yesu yameeta okhuboola ari, “Abandu bolwibulo luno nabamayanu muno! Basabanga eshilolelo shiamakana, nebutswa shibulaho eshilolelo eshiabalihebwa, habula eshilolelo shiamakana shiali shia Yona eshio. 30#Yona 3:4Okhuba shinga lwomulakusi Yona yali eshilolelo khubandu ba Nineve, nolwa Omwana womundu yesi ali ario eshilolelo khulwibulo lwa leelo luno. 31#1 Abar. 10:1-10; 2 Akak. 9:1-12Khunyanga eyokhukhalachilwa eshiina, omuruchi omukhasi wa Sheba alisinjila mumuse halala nabandu bolwibulo luno, nabakhalachila eshiina. Shichila yarula mushialoshie ehale, niyetsa okhuhulila amechesio kobuchesi bwomuruchi Solomoni. Ne lole, aliho hano oushila omuruchi Solomoni ehale. 32#Yona 3:5Khunyanga yokhukhalachilwa eshiina, abandu ba Nineve bakhayaasibwe halala ninenywe nibamukhalachila eshiina, shichila bekalukhasia nibalekha obwonooni bwabwe, olwa bahulila okhuyaala khwa Yona. Ne khandi lola, emusuubisia mbu, aliho hano oushila Yona ehale!

Obulafu bwomubili

(Mat. 5:15; 6:22-23)

33 # Mat. 5:15; Mrk. 4:21; Luka 8:16 “Abulaho omundu ouhafinjia itaha mana achibisa noho achifunishila munyungu tawe. Nebutswa achirenjekhanga khushichibi shiayo kho mbu, olwa abandu benjila munzu omwo, yibakhosilie nibalola obulafu. 34Tsimonitsio nitsio itaha yomubilikwo. Tsimonitsio nitsili tsindayi, omubilikwo kwosi kwitsulangamwo obulafu, nebutswa tsimonitsio nitsilali tsindayi ta, omubilikwo kwosi kwitsulangwamwo eshiilima. 35Khulweshio, obe meeso, obulafu buli mwiwe bwakhetsukhana bwakwa eshiilima. 36Kho omubilikwo nikuba nikwitsulamwo obulafu, ne nikulalikhwo neshipala shiosi shiosi shieshilima ta, kho kuba kwitsulamwo obulafu kwosi, shinga lwobulafu bweitaha bukhukhosilinjiayo.”

Yesu atula Abafarisayo nende Abeechesia bamalako

(Mat. 23:1-36; Mrk. 12:38-40)

37Ne olwa Yesu yali niyakhamala okhuboola amakhuwa ako, Omufarisayo undi yamwinjisia munzumwe okhulia ninaye. Kho niyenjilamwo niyekhala okhulia. 38Omufarisayo oyo yahuka muno, olwa yalola mbu Yesu achaachile okhulia nashili okhusaaba amakhonoke. 39Mana Omwami namuboolela ari, “Inywe Abafarisayo mwosinjia ikulu weshikombe nende isahani, nebutswa mumioyo chienywe mwitsuulemwo induli nende obumayanu. 40Inywe abayingwa, Nyasaye owalonga khwikulu khwabio shiali ye khandi owalonga mukari wabio? 41Nebutswa muhelesie abatakha ebili mukari mwebikombe ebio nende tsisahani tsienywe etsio, nabio ebindu biosi bilaba ebisiiyikhu khwinywe.

42 # Abal. 27:30 “Nebutswa muli mushilaamo shiobubi inywe Abafarisayo! Shichila muhaanilanga Nyasaye eshitonye shienywe eshielikhumi eshiomunyu kwelikoshe nende omufuume nende eliani shinga omurele nende emiro. Nebutswa mulechelesinjia obukhalachi bwa habwene nende okhuheela Nyasaye. Mukhoyile okhukhola akenako, nimulalechelesiakhwo akandi kalia tawe.

43“Muli mushilaamo shiobubi inywe Abafarisayo! Shichila mwachama okhwikhala khubifumbi bioluyali mutsisinagogi nende okhushiesibwa noluyali mubiiro. 44Muli mushilaamo shiobubi! Shichila muli shinga ebilindwa ebiebisa, ebiabandu bachendakhwo obulamanya ta.” 45Mana mulala khubechesia bamalako namuboolela ari, “Omwechesia, khulwa okhuboola orio, fwesi khandi kho okhunyekanga!” 46Yesu nakalusia naboola ari, “Muli mushilaamo shiobubi inywe abechesia bamalako! Shichila mutuukhanga abandu emisiko emisiro echia balanyala okhuchinga ta, nebutswa inywe abeene shimunyala okhunyiila kata olwala lwenywe lwonyene mbu mubakhoonye okhuchinga emisiko tsana echio tawe. 47Muli mushilaamo shiobubi! Shichila mukaasinjia ebilindwa biabalakusi obulayi, ne abakuuka benywe beene nibo ababeera. 48Kho inywe abeene muli abaloli, okhuba mufuchilisaninjia nende ebikhole biabakuuka benywe bakhola. Okhuba nibo abeera abalakusi abo, nenywe mukaasinjia ebilindwa biabalakusi tsana abo. 49Khulweshio niko akachila obuchesi bwa Nyasaye nibuboola buri, ‘Ndalabarumila abalakusi nende abarumwa, nabo balasandia balala khubo nibabeera.’ 50Khulweshio abandu abolwibulo luno balaheebwa eshinyasio khulwa abalakusi boosi abeerwa okhurula khukhulongwa khweshialo. 51#Obucha. 4:8; 2 Akak. 24:20,21Okhuchaachila khukhwirwa khwa Abeli, okhuula khukhwirwa khwa Zakaria, owerwa nali hakari weshimalilo shiemisango nende habundu hatakatifu. Emuboolela toto mbu, abandu bolwibulo luno balahebwa eshinyasio khulwa eshitsayi shia baraatsia eshio.

52“Muli mushilaamo shiobubi, inywe abechesia bamalako! Shichila inywe mwabisa olufungwo lwokhwikula omuliango kwokhwinjila munzu yobuchesi. Ne inywe abeene shimwayenjilamwo ta, ne khandi mwekalila abenya okhwinjilamwo mbu baleshe okhwinjilamwo!”

53Ne olwa Yesu yarulaho, abechesia bamalako nende Abafarisayo bachaaka okhumufukula muno nende okhumureeba amareebo amanji, 54nibateema okhumureka kho mbu, banyoolekhwo likhuwa libi mukhuboolakhwe.

Currently Selected:

LUKA 11: OLUPR

Highlight

Copy