Akisiakinet 28

1Tanyarau Isaka Yakobo topia. Kichikichik tama, “Wara nyiut aberu anakwap a Kanaan. 2Tonyou tolot Mesopotamia nawi a apaakon Besuel, kuut nakookeng a Laban alo erai amae kon. 3Kipiari iyong Akuj Naationon sodi touriu ngide lukaalak, toliworos esi asepich a ngitunga. 4Kipiari iyong Akuj ka ngalesea kon loger lokolong apiarea Aburaam, sodi kirumea iyong akwap na ilomit iyong irai epeyonon naga, akwap nakolong ainakini Akuj Aburaam!” 5#Siak 17:4-8 Tomea Isaka Yakobo tolot ngesi Mesopotamia nia Laban, lo arai lokookeng a Besuel alo arai Emaramit. Arai Laban lokaatokeng a Rebeka, ana arai itiokech a Yakobo ka Esau.

Eusi Esau aberu na a ngauni

6Toyen Esau atamar apiari Isaka Yakobo ani erumor tolimok atamar tolot Mesopotamia, kuuta kaina. Toyen nabo atamar na apiarea Isaka ngesi, abu kitonger ngesi akuut aberu alo Kanaan. 7Toyen nabo atamar abu Yakobo kiwap ngakiro a itiokeng ka apakeng tolot Mesopotamia. 8Abu Esau toyen atamar nyejoikinito apakeng ngaberu na akwap a Kanaan. 9Kotere ngakiro nguna, tolot ngesi nia Ichimael lo arai lokookeng a Aburaam, kuut nakookeng na anyaritae Maalas, na arai nakaatokeng a Nebayos, kimorik ka ngaberu nache.

Erujae Yakobo alo Besel

10Tonyou Yakobo alo Beer-cheba toten Aran. 11Ani enangi wache, kinapakin neni kainyo adooyorit akolong. Tolem ngesi amoru apei kaneni kicholong, sodi tojotoor. 12Kiruja ngesi, anakirujare kangina, taanyunga ngesi adoket na etoweitae analup tanangite ewae lo alokidiama nadis. Adokanarete ngimalaikae a Akuj kidiama ka atiyaun anadoket kangina. 13Awei Ekapolon Akuj alokidiama adoket ngina.#28:13 alokidiama adoket ngina; kori diyete adoket ngina. Tolim tama, “Ayong ngesi Ekapolon Akuj, Akuj a apakon Aburaam ka Isaka. Kainakini ayong iyong ka ngalesea kon akwap na iperio iyong naga. 14Elalakearosi ngalesea kon kikokis apua analup, kialar lowaitin a akwap daang. Apiari ayong ngibukui daang kotere iyong ka ngalesea kon.#28:14 apiari ... kon; kingolik 12:3. 15#Yoa 1:51 Kiruki ayong ka iyong awadaang ani ilosi, ani erumor katobuu nakwap naga. Nyakaisikini ayong iyong tanang na asubakinea ngakiro nakechikak ayong iyong.” #Siak 13:14-15 #Siak 12:3; 22:18

16Abu Yakobo tokienyu tolim tama, “Iteni dir eyei Ekapolon Akuj nege, nakaneni peayeni ayong!” 17Tobul Yakobo tolim tama, “Abe kitubuli akwap naga noi! Erai nege dir akai a Akuj, erai tokona ngon ekidor lo engaaror adis ngesi logo.”

18Tonyou Yakobo nataparach elilim, sodi tolem amoru na echolongit kitowo erai akisitamunet, ani erumor kitiliwo abekot kiwasak akimiet#28:18 ani erumor ... akimiet; arai etal logo Alosirael lo italeunere ibore toliwor ika Akuj. kidiama. 19Tolimok ngesi akwap ngina ekiro be Besel.#28:19 Besel; eger a akiroit kana a Ngaeburaniae ngesi atamar “akai a Akuj.” (Anyaritae kolong sek ekiro a ere kangolo Lus.) 20Ani erumor kikong Yakobo ani Ekapolon Akuj tama, “Ani kiruk ayong ka iyong, sodi kiyok iyong ayong analotoru kang, kiinak akimuj ka ngiworui lu anapi, 21sodi atobongu nawi a apakang niajokon, 22iyong Ekapolon Akuj ngesi iliwor Akuj kang. Ani amoru na etowo ayong kane erai akisitamunet, eliwor nikilipitere iyong, toliwor kainanakini ayong iyong alemunet apei anatomon a ibore kadaang ani kiinakini iyong ayong.”

Currently Selected:

Akisiakinet 28: ABIBILIA

Highlight

Copy