Yn. 19

1Nio Pilato abukula Yesu mala aamuraakho bamupe biboko. 2Basikari bang'oona ekuutwa eye kamawa bamufwara khu murwe, lundi bamufwara ekaanjo efwaana buseemwa, 3bamwichakho ne baloma bali, “Omwami we Bayaudi, oiindile!” Mala bamuupa chimbi.

4Pilato aarura lundi enje mala aboolela babaandu ali, “Lola, ndikho mureera anje khwinywe, mubone muli ese, se namunyoolilemo sifuno siosi siosi sikila niye akhalakilwe tawe.” 5Nio Yesu aarura anje, aafwarire ekuutwa eye kamawa ne kaanjo. Pilato ababoolela ali, “Lola! Omundu chana oyusiina!”

6Nga basaayi bakhulu ne baliindi be Lukaangu bamubona, baapa luyoka bali, “Mubambe! Mubambe!” Pilato ababoolela ali, “Mu bukule mwabene mala mumubambe. Se namunyoolilekho sifuno sie khumukhalakila tawe.”

7Babaandu bamukobosia bali, “Efwe khuli ne lilaka liboola lili akhoyeela khufwa, sikila elaanga khuuba Omwana owa Wele.”

8Nga Pilato aulila kano, aba ne buuri bukali po. 9Akobola mwichipi, mala areeba Yesu ali, “Ewe wama waena?” Ne Yesu se amukobosia tawe. 10Pilato amureeba ali, “Solalomalomakho nase tawe? Khebulila oli, ese ndi ne bunyali khu khulekhuula namwe khukhukhola bakhubambe.”

11Yesu akobosia ali, “Oli ne bunyali khwise sikila Wele niye owakhuelesia. Ne kakhali omundu oundeerire khwiwe ali ne kumusaango kwe bubwoni bubi lukali.”

12Nga Pilato ne aulila kano akhaka khunyoola engila eye khulekhuula Yesu. Ne babaandu bamuyokelela bali, “Wamulekhuula, aba kaboola kali ewe se oli omusaale owo mwami Kaisari tawe! Omundu yesi yesi owelanganga ali, ali omwami se enyanga ko Mwami Omukhulu tawe!” 13Nga Pilato aulila kamakhuwa kano, abukula Yesu amureera enje mala ekhala khu ndebe eye bukhalaki abuundu niio balanga bali, “Mumatooche”. (Mu Lueburania lisina elio lili “Kabata.”) 14Yaba embi mwiangilwe, endaalo ndala nio Epasaka yole. Pilato aaboolela Bayaudi ali, “Omwami wenywe oyusiina!” 15Bakobosia ne luyoka bali, “Mwire! Mwire! Mubaambe!”

Pilato aabareeba ali, “Mwenya ese mbaambe Omwami wenywe?” Basaayi bakhulu bakobosia bali, “Efwe khumanyile Omwami Kaisari yeng'ene!” 16Mala Pilato aabakaanisia Yesu, bamubaambe.

Yesu abaambwa khu musalaba

(Mat. 27.32-44; Mk. 15.21-32; Lk. 23.26-43)

17Yesu arura enje nasutile kumusalaba kwewe, mala oola abuundu alaangwa bali, “Abuundu we siianga.” (Mu Lueburania alaangwa bali, Kolikota.) 18Abwenao niio bamubambila ne babaandi babili, mulala buli lubeka ne Yesu akari wabwe. 19Pilato aandika kamaandiko ali, “Yesu owa Nasareti, omwami we Bayaudi” akakhoma khu musalaba kwa Yesu. 20Babaandu bakali bakasoma sikila abuundu niio Yesu abaambilwa, se aba aleeyi khukhwama mu lukoba tawe. Kamaandiko kaandikwa mu Lueburania, Lulatini ne Lukiriki. 21Basaayi bakhulu baboolela Pilato bali, “Okhaandika oli, ‘Omwami owe Bayaudi’ tawe, ne kakhali andika oli, ‘Omundu yuno alomanga ali, Ese ndi Omwami we Bayaudi.’ ” 22Pilato aaloma ali, “Niko mbandike kalarama busa kario.” 23Nga basikari bamala khu bamba Yesu, babukula chingubo chewe bachikhalamo bitonye bine, buli musikaari sitonyi. Babukula ekaanjo yosi, eyanabwa ne kamakhono mu sitonyi silala siong'ene. 24#Chiny. 22.18 Basikari baboolana bali, “Khukhakitabulamo tawe; khe khuupe chikura khubone naanu olakibukula.” Lino liakholekha nio liiandiko lichusibwe liboola lili,

“Bakabana chingubo chase,

mala baapa chikura khu kaanjo yase.”

Kano niko basikari bakhola.

25Maawe owa Yesu, ne wandaaye omukhaana, Maria mukha Kiliopa, ne Maria Makatalena baba bemile amusalaba. 26Yesu abona maawe no mweka niye asiima bemileo; nio aboolela maawe ali, “Yuno omwana wowo.” 27Nio aboolela omweeka oyo ali, “Yuno maao.” Khukhwama esaa eyo omweeka oyo abukula Maria maawe owa Yesu mala aamenya naye mungo mwewe.

Lifwa lia Yesu

(Mat. 27.45-56; Mk. 15.33-41; Lk. 23.44-49)

28 # Chiny. 22.15; 69.21 Enyuma wa kano, Yesu amanya ali buli siindu siamalile khuwa. Nio khukhola liiandiko lichusibwe, aloma ali, “Ndi ne bulesia.”

29Sibuumba siabao, ne ndali endulu yechulekho, nio benikha sisiaangu mu ndali endulu eyo, bauna sisiaangu esio khu lusaala, mala basuta bara emunwa wewe. 30Yesu anywa endali mala aloma ali, “Kawele!” Mala enamikha kumurwe kwewe afwa.

Bauna Yesu mu mbafu

31Nio Bayaudi be bunyali bareeba Pilato abaelesie kumunwa bafunake bikele bie babaandu ba bambiilwe, mala barusie kimibili kiabwe khu misalaba. Bamureeba kano sikila yaba endaalo eya Ichuuma, mala se benya bafu babe khu misalaba khukhwola mu Sabato tawe, lundi khutasakho esabato eye Pasaka. 32Khwako bacha mala bafuna bikele bio mundu owe khunyoa, lundi bacha bafuna okundi yesi owabambwa ne Yesu. 33Ne nga boola khu Yesu, babona bali afwiile khale, khwako se bafunaka bikele biewe tawe. 34Kakhaba kario mulala khu basikari, auna Yesu lifumo mumbafu, mala abwene na abwene kamafuki kachichukha ne kameechi. 35(Oyo owabona kano ne kekholekha akalomalomekho, nio enywe mwesi mwole khusuubila muli, niko aboola kali kang'ali, mala amanyile ali alomanga bung'ali.) 36#Khur. 12.48; Khub. 9.12; Chiny. 34.20 Kano kakholekha khukhola liiandiko lichusibwe liboola lili, “Sikuumba siewe nasilala siong'ene se silifunakwa tawe.” 37#Sak. 12.10; Lif. 1.7 Ne liliio liiandiko liliindi liboola lili, “Babaandu balibona niye bauna.”

Lisiikhwa lia Yesu

(Mat. 27.57-61; Mk. 15.42-47; Lk. 23.50-56)

38Enyuma wa kano, Yosefu, owama mu lukoba lwa Arimatea, areeba Pilato ne kali bali anyala abukula kumubili kwa Yesu. (Yosefu aba omuloondi owa Yesu, mu bwikisi, sikila aba aria Bayaudi be bunyali.) Pilato amuboolela ali anyala abukula kumubili kwa Yesu, nio Yosefu acha akubukula. 39#Yn. 3.1-2 Nikodemu, owacha khubona Yesu mu silo, acha ne Yosefu. Aaba abukuule chikiilo embi kamakhumi kataru ka manemane ne bupaani. 40Babili bano babukula kumubili kwa Yesu mala bakura mu suuka eya katani ne bupaani khuloondekhana ne kumwiima kwe Bayaudi, khukhwerekekhera lisiikha. 41Khakuunda khaba abuundu niio bereera Yesu, mala mu khakuunda akho yabamo eng'ani embia, niyo omundu akhasiikhwakhomo tawe. 42Eng'ani yaba siimbi ne lundi yaba yaramire endaalo ndala khukhwola khu Sabato. Khwako basiikha mu ng'ani omwo kumubili kwa Yesu.

Currently Selected:

Yn. 19: LUBUKUSU

Highlight

Copy