YOHANA 11
11
Okhufwa khwa Lazaro
1 #
Luka 10:38,39 Omundu undi yaliho owali omulwale owalangwa mbu Lazaro, owokhurula mwitaala lia Betsania, ewa Mariamu nende omukhaana wabwe mbu Maritsa bali nibamenya. 2#Yoh. 12:3Mariamu oyo niye owabakha amafura keshing'ari khubilenje ebia Omwami mana niyeeya ebilenje ebio neliswilie, naye Lazaro owali nalwala yali omusiani wabwe. 3Abakhaana babwe abo baruma amakhuwa khu Yesu nibaboola bari, “Omwami, omwitsawo owa waheela nomulwale.”
4Ne olwa Yesu yahulila amakhuwa ako, yaboola ari, “Obulwale obwo shibuleera Lazaro tawe, kano kekholeshe kho mbu, kareere oluyali khu Nyasaye, ne khandi yilaba injila eya Omwana wa Nyasaye alanyoolelamwo oluyali.” 5Yesu yali niyaheela Maritsa, Mariamu nende Lazaro. 6Kata kario olwa yahulila amakhuwa mbu Lazaro alwala, yashinda aha yali nali khulwa tsinyanga tsindi tsibili. 7Kho naboolela abeechibe ari, “Chende khukalushe mulukongo lwa Yudea.”
8Abeechibe abo nibamukalusia bari, “Omwechesia, nitsiyanga tsindiiti etsiabirile olwa Abayahudi babeele nibenya okhukhulasa namachina. Nawe khandi wenyanga okhukalukhayo?”
9Yesu nabakalusia naboola ari, “Eshiteere shishili netsisaa ekhumi natsibili? Shikali kario? Kho ouchenda mubulafu bweshiteere shialesichirala ta, okhuba alolanga obulafu bweshialo shino. 10Nebutswa naba nachenda mushilo yesichirala, okhuba shiali nobulafu tawe.” 11Yesu yaboola ako, ne nameeta okhuboola ari, “Omwitsa wefwe Lazaro akonile tsindoolo, nebutswa ndalatsia okhumubuusia okhurula mutsindoolo.”
12Nabo Abeechi nibamukalusia bari, “Omwami, naba nakonanga alabuukha.” 13Yesu yechooma okhuboola toto mbu, Lazaro yali nafwile. Nebutswa abeechibe nibapaara mbu, aboolanga khuketsindoolo tsioburulanda. 14Kho Yesu namala nababoolela habulafu ari, “Lazaro afwile, 15ne khulwenywe esaangaalile shichila shindabeeleho ta, kho mbu musuubile. Habula chende khutsie ingowe.”
16Tomasi, owalangwa khandi mbu, Likhwana, naboolela abeechi bashie ari, “Chende khutsie fwesi halala nende omwechesia kho mbu, khufwe halala ninaye!”
Yesu niye obulamushi nende obulamu
17Ne olwa Yesu yolaho, yanyoola mbu, Lazaro yali niyakhamala mung'ani tsinyanga tsine. 18Okhurula Betsania okhuula Yerusalemu tsiali ahambi tsikilomita tsitaru. 19Nabo Abayahudi abanji bali nibetsile okhulola Maritsa nende Mariamu mbu babalemie omwoyo khulwa okhufwa khwomusiani wabwe.
20Ne olwa Maritsa yahulila mbu Yesu yetsanga, yarula natsia okhumwakanila, naye Mariamu natong'a munzu. 21Maritsa naboolela Yesu ari, “Omwami, oba niwakhabeleho, khane omusiani wefwe shiyakhafwile tawe! 22Ne emanyile mbu, kata bulano Nyasaye alakhuhelesia shiosi shiosi eshiomusaba.” 23Yesu namuboolela ari, “Omusiani wenywe alalamukha.” 24#2 Mak. 7:22,23; 12:44Maritsa nakalusia naboola ari, “Emanyile mbu, alilamukha khandi mubulamushi bwokhunyanga yobumalilishi.” 25Yesu namuboolela ari, “Isie nisie obulamushi khandi obulamu. Omundu yesi yesi ousuubila mwisie, alaba omulamu kata naba nafwa. 26Ne yesi yesi oumenya ne nasuubila mwisie, shialifwa tawe. Osuubila ako?”
27Maritsa namukalusia ari, “Omwami Esuubila! Esuubile mbu niwe Kristo, Omwana wa Nyasaye, owabandu basuubisibwa mbu yakhetse mushialo.”
Yesu alila amasika
28Olwa Maritsa yamala okhuboola amakhuwa ako, yatsia nalanga Mariamu omukhaana wabwe masiliisi, ne namuboolela ari, “Omwechesia yetsile ali hano, ne akhulanganga.” 29Ne olwa Mariamu yahulila amakhuwa ako, yasinjila bwangu natsia okhumwakanila. 30Yesu yali nashili okhuula mwitaala elo, yali nashili ahabali nibabukanile nende Maritsa. 31Olwa Abayahudi abali munzu nibaleminjia Mariamu omwoyo balola nasinjila bwangu natsia elwanyi, bamulondakhwo. Bapaara mbu, atsitsanga hang'ani okhwikhuula.
32Olwa Mariamu yola aha Yesu yali nali ne namulola, yasikama habilenje bia Yesu namuboolela ari, “Omwami, olaba mbu, wabeele hano, omusiani wefwe shiyakhafwile tawe!”
33Yesu yamulola niyekhuulanga, khandi nalola abandu bandi abaliho boosi nibekhuulanga. Yabeelela muno ne nanyakhana muno mumwoyokwe. 34Kho nabareeba ari, “Nihena aha mwamuyabiile?” Nabo nibakalusia nibaboola bari, “Omwami, yitsa olole.” 35Yesu nalila amasika. 36Abayahudi nibaboola bari, “Lolekhwo shinga olwa yali niyamuheela!”
37Nabo abandi nibaboola bari, “Yatiimbusia tsimoni tsiomubofu, shiyakhekaliile okhufwa khwa Lazaro ta?”
Yesu alamusia Lazaro
38Yesu nashibeeleele mumwoyo, yatsia hang'ani eya bali nibareere lichina habwinjililo bwayo. 39Yesu nababoolela ari, “Rusiekhwo lichina elo!”
Maritsa, owali omukhaana wabwe omufu nakalusia naboola ari, “Omwami, bulano ahunya, shichila netsinyanga tsine okhurula nayabilwa!”
40Yesu namuboolela ari, “Shiekhubooleele mbu, noba nosuubila, olalola oluyali lwa Nyasaye?” 41Mana nibarusiakhwo lichina elo. Yesu nahenga mwikulu, ne nasaaya naboola ari, “Papa, ekhupila orio muno shichila iwe umbulilanga. 42Emanyile mbu, umbulilanga buli lwosi, nebutswa emboolanga kano khulwa abandu abali hano bano kho mbu, basuubile mbu, niwe owaruma.” 43Olwa yali niyakhasaaya ario, yaboola nomwoyo omukhongo ari, “Lazaro, rula elwanyi!” 44Mana Lazaro narula mung'ani omwo, amakhonoke nende ebilenjebie nibiboyilwe neyisanda, khandi naboyilwe eshitambaya mubwenibwe. Yesu nababoolela ari, “Muboholole mana muleshe atsie.”
Abayahudi batuta okhwira Yesu
(Mat. 26:1-5; Mrk. 14:1-2; Luka 22:1-2)
45Mana Abayahudi abanji abali nibetsile okhukoonya Mariamu, balola aka Yesu yali nakholile ako, ne nibasuubila muye. 46Nebutswa abandi khubo batsia khu Abafarisayo ne nibababoolela aka Yesu yali nakholile. 47Kho Abafarisayo nende abesaaliisi abakhulundu nibekhung'asia mushiina ne nibareebana bari, “Khukhole khurie? Lole, omundu uno akholanga akamakana amanji! 48Nikhuba nikhumulekha mbu atsiililile ario, abandu boosi balamusuubilila, ne abaruchi beshialo shia Roma baletsa nende okhusasia Ihekalu yefwe halala nende lihanga liefwe!”
49Mulala khubo, owalangwa mbu, Kayafa, owali nali omwisaaliisi omukhulundu muhekalu khumuyika okwo, naboola ari, “Inywe muli abayingwa murie! 50Shimumanyilekhwo mbu nobulayi khwinywe omundu mulala okhufwila abandu abanji, okhushila lihanga liosi okhusikha ta?” 51Ne shiyaboola ako khululwe omwene ta, nebutswa shinga omwisaaliisi omukhulundu khumuyika okwo. Yali nalakulanga mbu, Yesu alafwila aboluyia lwa Abayahudi, 52nende khandi okhukhung'asia halala abandu ba Nyasaye abasalaana boosi.
53Okhuchaaka inyanga eyo, Abayahudi bakhaaba tsinjila tsiokhwira Yesu. 54Khulweshio, Yesu shiyachenda mu Abayahudi habulafu ta, nebutswa yarulaho natsia ahambi mushitsiimi, mwitaala lilangwa mbu, Efuraimu, namenyayo nende abeechibe.
55Ne inyanga yelisabo elia Pasaka yali niyili ahambi okhuula, mana abandu abanji nibarula nibatsia mwitookho lia Yerusalemu, khulwa okhuranjilila okhwisiiya inyanga ya Pasaka niyishili okhuula. 56Bali nibakhaabanga Yesu, ne nibabreebana abeene khu beene nibasinjiile muhekalu bari, “Mupaara murie? Kalolekhanga mbu, shialetsa mwisabo tawe, noho?” 57Abesaaliisi abakhulundu nende Abafarisayo bali nibalachilisiye mbu, omundu yesi yesi oumanyile aha Yesu ali abamanyie, kho mbu bamutiile.
Currently Selected:
YOHANA 11: OLUDC
Highlight
Share
Copy
Want to have your highlights saved across all your devices? Sign up or sign in
