LUKA 24
24
Okhulamukha khwa Yesu
(Mat. 28:1-10; Mrk. 16:1-8; Yoh. 20:1-10)
1Mumabwibwi khunyanga ya Jumapili, abakhasi abo batsia khung'ani, nibachinjile amafura keshing'ari aka bali nibakaasiye. 2Nibanyoola lichina nilimalile okhuselenjesibwa okhurula khung'ani. 3Kho nibenjilamwo, nebutswa shibanyoolamwo omubili okwa Omwami Yesu tawe. 4Basinjilaho nibahuchisibwa nende aka bali nibaluutsi, ne nibetsukhana abasaatsa babili nibasinjiileho ninabo, nibefwalile ebifwalo ebing'inang'inu. 5Mana nibaria muno nibenamia obweni bwabwe hasi. Abasaatsa abo nibabareeba bari, “Mbushiina mukhaabanga omulamu mubafu? 6#Mat. 16:21; 17:22,23; 20:18,19; Mrk. 8:31; 9:31; 10:33,34; Luka 9:22; 18:31-33Shiali hano ta, amalile okhulamusibwa. Mwitsulila shinga olwa yamuboolela nashili Galilaya ari, 7‘Omwana womundu okhuula ahaanwe mumakhono kabandu abonooni okhubambwa khumusalaba, ne olunyuma lwetsinyanga tsitaru, alamusibwe.’ ”
8Nabo nibetsulila toto aka yali niyaboola, 9kho nibarula hang'ani yaho, nibatsia nibaboolela abeechi abo ekhumi namulala nende abandi boosi, amakhuwa ako koosi. 10Abakhasi abo bali Mariamu Magadalene, Yoana nende Mariamu nyinamwana Yakobo nende abakhasi bandi abali halala ninabo, nibatsia nibaboolela abarume amakhuwa ako. 11Ne amakhuwa ako kalolekha khubarume shinga amakhaya butswa, nibalabasuubila tawe. 12Nebutswa Petero yarula tsimbilo natsia khung'ani. Niyenama nahengamwo, nalola isanda yeikitani yonyene. Mana narula nakalukha ingowe nahukanga akali nikekholeshe.#24:12 Amahandiko kandi akakhale shikali nende olunyali lwa 12 luno tawe.
Oluchendo lwa Emau
(Mrk. 16:12-13)
13Ne khunyanga yene eyo abalondi ba Yesu babili bali nibatsitsanga mwitaala lia Emau, oluchendo luhela tsikilomita ekhumi nandala okhurula Yerusalemu. 14Ne bali nibaboolanga khumakhuwa akali nikekholeshe ako. 15Mana olwa bali nibashiboolanga, Yesu mwene yolaho, ne nachenda ninabo. 16Bamulola, nebutswa shibamanyilisia mbu niye tawe. 17Naye nabareeba ari, “Nimakhuwa shiina akamuboolanga nimuchenda?”
Nabo nibasinjila nibabeleele muno. 18Mulala khubo owalangwa mbu, Kiliopa nakalusia namureeba ari, “Niwe omucheni wenyene mu Yerusalemu oulamanyile amakhuwa akayekholeshe mutsinyanga tsindiiti tsibirile tsino ta?”
19Naye nareeba ari, “Nimakhuwa shiina?”
Nibakalusia bari, “Amakhuwa akayekholeshe khu Yesu wa Nazareti. Yali omulakusi khandi yali nobunyali mubikholebie nende mukhwechesiakhwe imbeli wa Nyasaye nende abandu boosi. 20Ne abesaaliisi abakhulundu bamuhaana mushiina mbu, akhalachilwe okhufwa mana nabaambwa khumusalaba. 21Nefu khwabeele nikhusuubilanga mbu, niye owakhahoniye Isiraeli. Ne bulano neinyanga yakhataru okhurula amakhuwa ako nikekholekha. 22Balala khubakhasi abokhumukanda kwefwe bakhuhuchisiye olwa bahuunile khung'ani mumabwibwi, 23ne nibalanyoola omubilikwe tawe. Bakaluushe nibaboola mbu, baluutsi abamalaika mwilolelo abababooleele mbu, ashiliho mwoyo. 24Nabo abandi khubomukanda kwefwe batsiile khung'ani nibanyoola nikali shinga olwa abakhasi abo bababooleele, ne omwene shibamuluutsi tawe.”
25Mana Yesu nababoolela ari, “Inywe muli abayingwa murie? Muli abemioyo emisiro, echiakhaya okhusuubila koosi akabalakusi baboola! 26Shikali nikamukhoyeele Kristo watsana oyo okhusandibwa ario mana yenjile muluyalilwe?” 27Mana Yesu nachaaka okhubenoosia akaboolwa khuye mu Amahandiko okhuchaachila khukali mu Amahandiko ka Musa nende mu akabalakusi boosi. 28Ne olwa bali niboolanga ahambi mwitaala liabali nibatsiitsangamwo, Yesu yakhola shinga outsiililila imbeli. 29Nabo nibamusaaya, nibaboola bari “Yikhala hano ninefwe, shichila bulano bwakhela ne khandi eshiilima shiliho.” Naye niyenjilamwo mbu yekhale ninabo. 30Olwa yekhala okhulia ninabo, yabukula omukaate, nakusabila ikhabi ne nakusonyola nabahelesia. 31Mana tsimoni tsiabwe nitsiamuukha, nibamumanyilisia, naye nabakhamakhwo. 32Nibaboola bari, “Emioyo chiefwe shichibeelenje shinga echiakha omulilo, olwa aboolilenje ninefwe nikhuli khunjila nakhwinoosinjia aka Mahandiko?”
33Mana nibarula habwene nahabwene nibakalukha Yerusalemu, nibanyoola abeechi abo ekhumi namulala nibakhung'anile halala nende abandi. 34Abeechi abo bali nibaboolanga bari, “Omwami alamuushe toto. Alolesheele Simoni!”
35Babili abo nabo nibababoolela amakhuwa kali nikekholeeshe khunjila khandi shinga olwa bo bamumanyilisiye niyakhasonyola omukaate.
Yesu aloleshela abeechibe
(Mat. 28:16-20; Mrk. 16:14-18; Yoh. 20:19-23; Ebikh. 1:6-8)
36Ne olwa babili abo bali nibashiboolanga amakhuwa ako, Yesu mwene nasinjila hakari mubo nababoolela ari, “Omulembe kube ninenywe.”
37Nabo nibaliibwa ling'ang'a, oburi nibubatiila, nibapaara mbu balolanga eshishieno. 38Nebutswa Yesu nababoolela ari, “Mbushiina nimunyakhananga? Mbushiina mukanakaninjia mumioyo chienywe? 39Lole amakhono kanje nende ebilenje bianje, mana mumanye mbu nisie. Ndilekhwo mulole, shichila eshishieno shishilikhwo nende omubili namakumba shinga olwa mulolanga nindi tawe.” 40Olwa yamala okhuboola ario, yabamanyia amakhonoke nebilenjebie. 41Olwa bali nibashili okhusuubila khulwa okhwikhoya khwabwe okhunji khandi nibahukanga, yabareeba ari, “Mulikhwo neshiokhulia?” 42Nibamuhelesia eshitonye shieinyeeni isiche. 43Naye nachibukula nalia nibalolanga.
44Mana nababoolela ari, “Kano niko amakhuwa kene aka ndamuboolela, olwa ndali nishili ninenywe. Amakhuwa koosi akahandikwa mumalako ka Musa nende akabalakusi bahandika nende akali mutsitsabuli okhuula koosibwe.” 45Mana nayaamuusia tsimoni tsiabwe nabo nibamanyilisia eshisina shia Amahandiko. 46Ne nababoolela khandi ari, “Kahandikwa mbu, Kristo watsana akhoyile okhunyakhana, mana khunyanga yakhataru alamusibwe okhurula mubafu. 47Khandi mbu, muliiralie amakhuwa kobwikalukhasi nende obuleshelwi bwobwonooni okhuula kayaalilwe amahanga koosi, okhuchaachila Yerusalemu. 48Nenyu muboolele abandu boosi buli habundu akamuluutsi. 49#Ebikh. 1:4Nasi omwene ndalamurumila eshia Papa yasuubisia. Nebutswa mwikhale mwitookho lia Yerusalemu okhuula olwa muhebwa obunyali okhurula mwikulu.”
Yesu akulukha natsia Mwikulu
(Mrk. 16:19-20; Ebikh. 1:9-11)
50 #
Ebikh. 1:9-11
Mana nabemilila okhurula mwitookho elo okhuula Betsania, ne nachinguula amakhonoke nabasabila boosi ikhabi. 51#Sira 50:20Ne olwa yali nashibasabilanga ikhabi ario, yabukulwa nayilwa mwikulu. 52Nabo nibamwinamila, ne nibakalukha Yerusalemu nibekhoyanga muno. 53Mana nibatsiililila okhuba muhekalu nibetsoominjia Nyasaye.
Currently Selected:
LUKA 24: OLUDC
Highlight
Share
Copy
Want to have your highlights saved across all your devices? Sign up or sign in
