JENESIS 10

Kiba hiar pateng na ki khun u Noah

(1 Khrn. 1:5-23)

1Te kine ki long ki jingkha pateng jaid bynriew ki khun shynrang jong u Noah: u Shem, u Ham, bad u Japhet; bad ha ki la kha ïa ki khun shynrang hadien kata ka jingshlei.

2Ki khun shynrang ki jong u Japhet: u Gomer, bad u Magog, bad u Madai, bad u Jaban, bad u Tubal, bad u Meshekh, bad u Tiras. 3Bad ki khun shynrang ki jong u Gomer: u Ashkenas, bad u Riphath, bad u Togarmah. 4Bad ki khun shynrang u Jaban: u Elishah, bad u Tarshish, ki Kittim, bad ki Dodanim. 5Na kine, la pynïabynta ïa ki 'dewlynnong ki jaid bynriew ha ki khyndew jong ki, baroh ha la ka jong ka jong ka ktien, ha la ki jong ki jong ki ïing, bad ha la ki jong ki jong ki jaid bynriew.

6Bad ki khun shynrang ki jong u Ham: u Kush, bad u Misraim, bad u Put, bad u Kanaan. 7Bad ki khun shynrang ki jong u Kush: u Seba, bad u Habilah, bad u Sabtah, bad u Raamah, bad u Sabtekha; bad ki khun shynrang ki jong u Raamah: u Sheba bad u Dedan. 8U Kush ruh u la pynkha ïa u Nimrod; une u la sdang ban long u bakhrawbor ha ka khyndew. 9U la long ruh u nongbeh mrad uba don bor ha khmat U Trai: namar kane, la ju ong, “Kum u Nimrod uba u nongbeh mrad u bakhrawbor ha khmat U Trai.” 10Bad ka jingsdang ka hima jong u ka la long ka Babel, bad ka Erekh, bad ka Akkad, bad ka Kalneh, ha ka ri Shinar. 11Na kata ka ri u la leit mih noh sha ka Asshur, bad u la tei ïa ka Ninebeh, bad ïa ka nongbah Rehoboth, bad ïa ka Kalah, 12bad ïa ka Resen hapdeng ka Ninebeh bad ka Kalah; kaba long ka shnong ka bakhraw. 13Bad u Misraim u la pynkha ïa ki Lud, bad ïa ki Anam, bad ïa ki Lehab, bad ïa ki Naphtuh, 14bad ïa ki Pathrus, bad ïa ki Kasluh, (na kiba la wan mih ki Philistia), bad ïa ki Kaphtor.

15Bad u Kanaan u la pynkha ïa u Sidon, u khun nyngkong jong u, bad ïa u Heth, 16bad ïa ki Jebus, bad ïa ki Amor, bad ïa ki Girgash, 17bad ïa ki Hib, bad ïa ki Ark, bad ïa ki Sin, 18bad ïa ki Arbad, bad ïa ki Semar, bad ïa ki Hamath; hadien kata, ki ïing jong u Kanaan ki la ïaphriang kylleng. 19Bad ka pud ka jong ki Kanaan ka la long naduh ka Sidon, haba me ïaid shaphang ka Gerar, haduh ka Gasa; haba me leit shaphang Sodom, bad Gomorra, bad Admah, bad Seboim, wat haduh ka Lasha. 20Kine ki long ki khun shynrang u Ham, ha la ki ïing ki ïing, ha la ki ktien ki ktien, ha la ki ri ki ri, bad ha la ki jaid ki jaid.

21Bad ha u Shem ruh, u kthaw ki khun u Eber, u hynmen u Japhet, la kha ki khun. 22Ki khun shynrang u Shem: u Elam, bad u Asshur, bad u Arphakshad, bad u Lud, bad u Aram. 23Bad ki khun shynrang jong u Aram: u Us, bad u Hul, bad u Gether, bad u Mash. 24Bad u Arphakshad u la pynkha ïa u Shelah, bad u Shelah u la pynkha ïa u Eber. 25Ha u Eber ruh la kha ar ngut ki khun shynrang; ka kyrteng jong uwei ka la long “u Peleg”; naba ha ki sngi jong u la pynïabynta ïa ka khyndew; bad ka kyrteng u para jong u ka la long “u Joktan”. 26Bad u Joktan u la pynkha ïa u Almodad, bad ïa u Sheleph, bad ïa u Hasarmabeth, bad ïa u Jerah, 27bad ïa u Hadoram, bad ïa u Usal, bad ïa u Diklah, 28bad ïa u Obal, bad ïa u Abimael, bad ïa u Sheba, 29bad ïa u Ophir, bad ïa u Habilah, bad ïa u Jobab; kine baroh ki la long ki khun shynrang jong u Joktan. 30Bad ka jingshong duh jong ki, ka la long naduh ka Mesha, haba me leit shaphang u lum Sephar, sha mihngi. 31Kine ki long ki khun shynrang ki jong u Shem, ha la ki ïing ki ïing, ha la ki ktien ki ktien, ha la ki ri ki ri, bad ha la ki jaid ki jaid bynriew.

32Te kine ki long ki ïing ki khun shynrang jong u Noah, ha la ki jingkha pateng, ha la ki jaid ki jaid bynriew; bad da kine keiñ la pynïabynta ïa ki jaid bynriew ha ka pyrthei hadien kata ka jingshlei.

Currently Selected:

JENESIS 10: KHB

Highlight

Copy