JENESIS 23

Ka jingïap ka Sara bad kaba tep ïa ka

1Bad ka rta ka Sara ka la long shispah arphew hynñiew snem: kine keiñ ki la long ki snem ka jingim jong ka Sara. 2Bad ka Sara ka la ïap noh ha Kirjath-arba; kaba long ka Hebron ha ka ri Kanaan: bad u Abraham u la wan ban leh sngewsih namar ka Sara, bad ban ïam namar jong ka. 3Bad u Abraham u la ïeng noh joit na khmat ka metïap jong u, bad u la kren ruh de ha ki khun shynrang u Heth, u da ong, 4#Heb. 11:9-13; Ki Kam. 7:16.“Nga long u nongwei bad u nongwan hap hapdeng jong phi: to ai duh ha nga ïa ka jaka tep hapdeng jong phi, khnang ba ngan ïoh tep ïa la ka baïap na khmat jong nga.” 5Te kita ki khun u Heth ki la ïathuh ha u Abraham, ki da ong, 6“To sngap ïa ngi, ko kynrad jong nga: me long u syiem uba na U Blei hapdeng jong ngi: to tep ïa ka baïap jong me ha kaba jied ïa ka babha tam na ki jingtep jong ngi; ym don mano mano ruh na ngi u ban khang ïa la ka jingtep na me, ba men ïoh tep ïa ka baïap jong me.” 7Ynda kumta, u Abraham u la ïeng joit, bad u la nguh khlieh ïa lade ruh ïa ki trai kata ka khyndew, ha khmat keiñ ki khun shynrang u Heth. 8Bad u la kren ïasyllok bad ki, u da ong, “Lada phi mon ba ngan ïoh tep ïa ka baïap jong nga na khmat jong nga; to sngap ïa nga, bad to da ïakren kyrpad na ka bynta jong nga bad u Ephron u khun u Sohar; 9ba un ai duh ha nga ïa kata ka krem Makhpelah ïa kaba u don, bad kaba long ha ka bakut ka lyngkha jong u; na ka bynta ka dor kaba dap biang ha ka rupa un ai duh ïa ka ha nga, ïa ka ban long ka jingïoh trai keiñ ka jaka jingtep ïa nga hapdeng jong phi.” 10Bad u Ephron u da shong hapdeng kita ki khun shynrang u Heth: bad uta u Ephron u khun u Heth u la ïathuh ha u Abraham ha kaba ki ïohsngew ki khun u Heth, ha khmat jong ki baroh keiñ, kat kiba la wan bsut ha ka khyrdop ka nongbah jong u, u da ong, 11“Em, ko kynrad jong nga, to sngew ïa nga: ïa kata ka lyngkha nga shu ai duh ha me, bad ïa kata ka krem ruh kaba hapoh jong ka, ha me keiñ nga ai duh ïa ka; ha khmat ki khun shynrang u paidlang jong nga, nga ai duh ïa ka ha me; to tep noh ïa ka baïap jong me.” 12Te u Abraham u la nguh khlieh ïa lade ha khmat ki trai jong kata ka ri. 13Bad u la kren ha u Ephron ha kaba ki da ïohsngew ki trai jong kata ka ri, u da ong, “Hynrei, lada men ai duh ïa ka, to sngew ïa nga, nga kyrpad ïa me: ngan ai ha me ïa ka dor rupa jong kata ka lyngkha; to shim ïa ka na nga, bad ngan tep noh ïa ka baïap jong nga hangta.” 14Bad u Ephron u la ïathuh ha u Abraham, u da ong ha u, 15“Ko kynrad, to sngew ïa nga: ka khyndew kaba sawspah shekel ha ka rupa; kata ka long aïu eh hapdeng jong nga bad me? To tep noh namar kata ïa ka baïap jong me.” 16#Ki Kam. 7:16.Te u Abraham ynda u la ïohsngew ïa u Ephron, u la thew ïa kita ki rupa ha u Ephron, kumba u la lah ong hi ha kaba ki da ïohsngew kita ki khun shynrang u Heth, ïa sawspah shekel ha ka rupa kiba ïaid biang keiñ bad ki nongkhaïi.

17Kumta, la pynïoh skhem ïa kata ka lyngkha u Ephron, kaba ha Makhpelah, kaba marpyrshah ïa ka shnong Mamre, ïa kata ka lyngkha bad ïa kata ka krem ruh kaba hapoh jong ka, bad ïa ki dieng baroh katba don ha kata ka lyngkha, bad hapoh ki pud jong ka baroh sawdong, 18ïa ka ban long ka jingïoh trai ïa u Abraham ha khmat kita ki khun shynrang u Heth, bad ha khmat baroh keiñ kat kiba la leit bsut ha ka khyrdop ka nongbah jong u. 19Bad ynda kumta, u Abraham u la tep noh ïa ka Sara ka tnga jong u ha kata ka krem jong ka lyngkha ka Makhpelah, marpyrshah ïa ka Mamre: kaba long keiñ ka Hebron ha ka ri Kanaan. 20Bad ïa kata ka lyngkha, bad ïa kata ka krem ruh kaba hapoh jong ka, la pynïoh skhem ïa u Abraham ïa ka ban long ka jingïoh trai ka jaka jingtep ïa u na ki khun shynrang u Heth.

Currently Selected:

JENESIS 23: KHB

Highlight

Copy