JENESIS 34

Ka jingpynhiar kput namar ka jingpynkheiñ-burom ïa ka Dinah

1Te ka Dinah ka khun ka Leah, ïa kaba ka la kha ïa u Jakob, ka la leit shabar ïa ka ban khmih ïa ki khun kynthei jong kata ka ri. 2Bad haba u Shekhem u khun u Hamor u kynja Hib, u syiem jong kata ka ri, u la ïohi ïa ka, u la shim ïa ka bad u la thiah lem bad ka, bad u la pynkheiñ burom ïa ka. 3Bad ka mynsiem jong u ka la ïasoh ha ka Dinah ka khun u Jakob, bad u la ieit ïa kata ka samla, bad u la kren pynsngewbha ha ka dohnud jong kata ka samla. 4Bad u Shekhem u la ong ha u Hamor u kpa jong u, u da ong, “To pynïoh ka tnga ïa nga ïa kane ka samla.” 5Bad u Jakob u la ïohsngew ba u Shekhem u la lah pynkheiñ burom ïa ka Dinah ka khun jong u: te ki khun jong u ki la don ha ka lyngkha bad ki jingri jong u: bad u Jakob, namar kata, u la shu sngap haduh ba kin da la wan hi. 6Bad u Hamor u kpa u Shekhem u la leit shabar ha u Jakob ban ïakren bad u. 7Bad ki khun shynrang u Jakob ki la ïawan noh na kata ka lyngkha ynda ki la ïohsngew ïa kata: bad kita ki rangbah ki la ïasngewsih, bad ki la ïasngewbitar eh naba u Shekhem u la leh ïa kaba bieit sniew pyrshah ïa u Israel da kaba u ïoh thiah bad ka khun u Jakob; ïa kaba ym shym dei ban leh keiñ.

8Te u Hamor u la kren bad ki, u da ong, “Ka mynsiem u Shekhem u khun jong nga ka ïasoh ieit eh ha ka khun jong phi: to ai noh mynta ïa ka ha u, nga kyrpad ïa phi, ban long ka tnga jong u. 9Bad to ngin ai shongkurim ma phi bad ma ngi, ïa ki khun kynthei jong phi to ai ha ngi, bad ïa ki khun kynthei jong ngi to shim sha phi. 10Phi ruh phin ïoh shong sah bad ngi, bad ka khyndew baroh kan long ha khmat jong phi; to da ïashong sah ha ka bad to da ïakhaïi ha ka bad to da shim ïa la ki bynta trai ha ka.” 11Bad u Shekhem ruh u la ong ha u kpa jong ka bad ha ki hynmen hynbew jong ka, “To shah ba ngan shem ïa ka jingmonbha ha khmat jong phi, bad katba phin ong ha nga ngan ai keiñ. 12To buh ïa ka dor jingmynrain ka bakhraw katno katno ruh na ka bynta jong ka, bad to pan ïa ka jingai ruh, ma nga ruh ngan ai kat kumba phin ong ha nga: hynrei, to phin ai ïa kata ka samla ban long ka tnga jong nga.”

13Hynrei, kita ki khun shynrang u Jakob ki la ïaphai ktien ha u Shekhem bad ha u Hamor u kpa jong u da ka buit sian phon, bad ki la ïa-ong, naba u la pynkheiñ burom ïa ka Dinah ka para jong ki, 14bad ki la ïathuh ha ki, “Ngim lah ban leh ïa kane, ban ai ïa la ka para ha u briew u bym shym la otsher ïa u; naba kata kan long kaba kheiñ burom ïa ngi. 15Hynrei, tang ha kane, ngin ïakohnguh ïa phi: lada phin long kum ma ngi, ba la otsher ïa u shynrang baroh na phi. 16Ynda kumta, ngin ai noh ïa la ki khun kynthei ha phi, ngi ruh ngin shim ïa ki khun kynthei jong phi sha ngi, bad ngin ïashongneh ryngkat bad phi, bad ngin ïalong uwei u paidbah. 17Hynrei, lada phim shahshkor ïa ngi, ban shah otsher ïa phi; te ngi ruh ngin shim noh ïa la ka khun, bad ngin ïaleit noh.”

18Bad ki ktien jong ki, ki la pynsngewbha ïa u Hamor, bad ïa u Shekhem u khun u Hamor. 19Bad uta u samla um shym la pynslem ban leh ïa kata, naba u la ibha eh ïa ka khun u Jakob: bad u la long ma u keiñ uba kham donburom tam ban ïa ka ïing u kpa jong u baroh. 20Ynda kumta, u Hamor bad u Shekhem u khun jong u, ki la ïaleit sha ka khyrdop ka nongbah jong ki, bad ki la ïakren bad ki briew ka nongbah jong ki, ki da ong, 21“Kine ki briew ki ïasuk bad ngi; namar kata, to ai ba kin ïashong sah ha ka khyndew bad ba kin ïoh ïakhaïi ha ka ruh; namar ha khmih ruh, ka ri ka kylluid biang ïa ki de; ïa ki khun kynthei jong ki ngin shim sha ngi ban long ki tnga jong ngi, bad ïa ki khun kynthei jong ngi ruh ngin ïa-ai noh ha ki. 22Hynrei, tang ha kane, kine ki briew kin ïakohnguh ïa ngi ban shongneh ryngkat bad ngi ïa ka ban ïalong uwei u paidlang, lada u shynrang baroh hapdeng jong ngi un long ba la otsher ïa u, kumba ki long ma ki ba la otsher ïa ki. 23Kumta, ki jingri jong ki bad ka spah jong ki bad ki mrad jong ki baroh kin ym long ki jong ngi mo? Tang ba ngin ïakohnguh ïa ki, ma ki ruh kin ïashong duh ryngkat bad ngi.” 24Bad ïa u Hamor bad ïa u Shekhem u khun jong u kat kiba la wan mih noh na ka khyrdop ka nongbah jong u, ki la ïashahshkor baroh; bad ïa u shynrang baroh la otsher, ïa baroh keiñ kat kiba la wan mih noh na kata ka khyrdop ka nongbah jong u.

25Ka la jia ruh ha ka balai sngi, haba ki dang ïasat syllang eh, ba ar ngut na ki khun shynrang u Jakob: u Simeon bad u Lebi, ki hynmen jong ka Dinah, ki la ïashim ïa la ka waitlam mar kawei, bad ki la ïawan hiar kynsan halor kata ka nongbah, bad ki la ïa-pynïap noh ruh ïa ki shynrang baroh. 26Bad ïa u Hamor bad ïa u Shekhem u khun jong u ki la pynïap noh da ka banep ka waitlam, bad ki la shim noh ïa ka Dinah na ka ïing u Shekhem bad hadien kata ki la ïaleit wan noh. 27Kita ki khun shynrang u Jakob ki la ïawan hiar ha kita ïa kiba la shoh ïap, bad ki la ïalute ïa kata ka nongbah, namar ba ki la lah pynkheiñ burom ïa ka para jong ki. 28Ïa ki langbrot jong ki bad ïa ki masi jong ki, bad ïa ki kadda jong ki, bad ïa kaei kaei ruh katba la don hapoh kata ka nongbah, bad ïa kaei kaei ruh katba la don ha ka lyngkha, ki la ïashim noh, 29bad ïa ka spah jong ki baroh, bad ïa ki khun khynnah jong ki baroh, bad ïa ki tnga jong ki, ki la ïalam mraw, bad ki la ïalute ïa baroh keiñ katba la don ha ki ïing. 30Ynda kumta, u Jakob u la ong ha u Simeon bad ha u Lebi, “Phi la pynshitom ïa nga da kaba phi la pynlong ïa nga uba ijli hapdeng ki trai-shnong jong kane ka ri, hapdeng ki kynja Kanaan bad ki kynja Peris keiñ: bad haba nga ruh nga long uba khyndiat briew, kin ïalang lem ban ïaleh ïa nga, bad kin pynïap noh ïa nga; kumta ïa nga yn sa pynjot noh; ma nga bad ka ïing jong nga.” 31Ki te ki la ïathuh, “Hato ka la dei ïa u ban leh ïa ka para jong ngi kum ïa ka nuti?”

Currently Selected:

JENESIS 34: KHB

Highlight

Copy