ÏOANNIS 9

U Jisu u pynpeit ïa u briew ba la kha matlah

1Te haba U dang ïaid artad, U la ïohi ïa u briew u bamatlah na myndang kha. 2#Luk. 13:2; Ki Kam. 28:4; Ese. 18:20; Eks. 20:5.Ki synran jong U te ki la ïakylli ïa U, ki ong, “Ko Kynrad, uei ba la leh pop, une, ne ki kmie ki kpa jong u, ba la kha matlah ïa u?” 3#Ïoan. 11:4.U Jisu u la ïathuh, “Une um shym la leh pop, lymne ki kmie ki kpa jong u: hynrei, ba yn ïoh pynpaw ïa ki jingleh jong U Blei ha u. 4#Ïoan. 11:9; 12:35.Ka dei ïa nga ban trei ïa kita ki jingtrei jong uta uba la phah ïa nga, katba ka dang don ka sngi: ka miet ka jia, ynda kumta ym don uba lah ban trei. 5#Mat. 5:14; Ïoan. 1:4; 8:12; 12:46.Katba nga don ha ka pyrthei, nga long ka jingshai ïa ka pyrthei.” 6#Mrk. 7:33; 8:23.Ynda U la kren ïa kine kiei kiei ruh, U la biah ha khyndew, bad U la thaw ïa i sboh khyndew da kata ka umbiah, bad U la tah ïa ita i sboh khyndew ha ki khmat jong uta u bamatlah, 7#Luk. 13:4.bad U la ong ha u, “To khie leit bta ha ka pung sum Siloam” (kaba long haba la batai, “Ba la phah”). Namar kata, u la leit noh bad u la bta, bad u la wan pat u da peit.

8Namar kata, ki paramarjan bad kita kiba la lah ithuh ïa u mynshuwa, ba u la ju long matlah, ki la ïa-ong, “Une um long uta uba shong bad uba ju khrong?” 9Kiwei pat ki la ïa-ong, “U long une keiñ”; kiwei pat de, “U long syriem ïa u”: u te u la ong, “Ma nga keiñ.” 10Ynda kumta, ki la ïakylli ïa u, “Kumno la pynpeit ïa ki khmat jong me?” 11U te u la ïathuh bad u la ong, “U briew ïa uba la khot ‘Jisu’, U la thaw ïa i sboh khyndew, bad U la tah ïa ki khmat jong nga, bad U la ong ha nga, ‘To khie leit bta ruh ha ka pung sum Siloam’; kumta, haba nga la leit bad ba nga la bta, nga la peit ki khmat.” 12Ynda kumta, ki la ïakylli ïa u, “Hangno uta u don?” U la ïathuh, “Ngam tip.”

Ki Pharisi ki ïakylli tohkit ïa uta ba la pynkhiah

13Ki la ïalam ïa u ha ki Pharisi, ïa uta uba ju matlah mynshuwa. 14Te ka la long ka sngi Sabbaton, mynba U Jisu u la thaw ïa ita i sboh khyndew, bad ba U la pynpeit ïa ki khmat jong u. 15Namar kata, kita ki Pharisi ruh de ki la ïakylli ïa u pat, kumno u la ïoh peit ki khmat. U la ïathuh te ha ki, “U la buh ïa i sboh khyndew ha ki khmat jong nga, nga la leit bta ïa lade ruh, kumta, nga ïoh imat.” 16#Mat. 12:2; Ïoan. 5:9; 7:43; 10:19.Ynda kumta, kiba na kita ki Pharisi ki la ïa-ong, “Une u briew um long na U Blei, naba um sumar ïa ka sngi Sabbaton.” Kiwei pat ki la ïa-ong, “Kumno u briew u bapop u lah ban leh ïa ki kambah kat kine?” Kumta, la don ka jingïaprat ktien hapdeng jong ki. 17Ki la ïakylli pat ïa uta u bamatlah, “Ma me, kumno me ong shaphang jong U, namar ba U la pynpeit ïa ki khmat jong me?” Te u la ïathuh, “U long u nongïathuhlypa.”

18Hynrei, kita ki Jiw kim ïangeit shaphang jong u, ba u la ju long matlah, bad ba u la lah ïoh peit ki khmat, tad ynda ki la ïakhot ïa ki kmie ki kpa ki jong uta uba la ïoh peit ki khmat, 19bad ba ki la ïakylli ïa ki, ki da ong, “Une u long u khun jong phi, ïa uba phi ong ba la kha matlah? kumno te ba mynta u ïoh imat?” 20Kita ki kmie ki kpa jong u ki la ïathuh ha ki, bad ki la ïa-ong, “Ngi tip ba une u long u khun jong ngi, bad ba la kha matlah ïa u ruh; 21hynrei, kumno ba u ïoh imat mynta, ngim tip; lane uei ba la pynpeit ïa ki khmat jong u, ngi ngim tip: u hi u la biang ka rta, phin ïakylli ïa u; un ïathuh hi shaphang ïa lade.” 22#Ïoan. 7:13; 12:42; Luk. 6:22.Kita ki kmie ki kpa jong u ki la ïakren kumta, naba ki la ïasheptieng ïa kita ki Jiw; namar kita ki Jiw ki la lah ïakut lypa, ba lada uno uno ruh un phla ïa U ba U long U Khrist, yn kyntait noh ïa u na ka synagog. 23Namar kata, kita ki kmie ki kpa jong u ki la ïa-ong, “U la biang ka rta; phin ïakylli ïa u.” 24Kumta, ki la ïakhot sa shi sien ïa uta u briew uba la ju long matlah, bad ki la ïa-ong ha u, “To ai burom ha U Blei; ngi, ngi tip ba uta u briew u long u bapop.” 25Ynda kumta, uta u la ïathuh, bad u la ong, “La u long u bapop ne em, ngam tip; ïa kane kawei nga tip, ba ïa kaba nga ju long u bamatlah, mynta nga ïoh imat.” 26Ki la ïakylli pat te ïa u, “Kaei u la leh ïa me? kumno u la pynpeit ïa ki khmat jong me?” 27U la ïathuh ha ki, “Nga la ong ha phi la mynhynne, te phim ïashahshkor: hato balei phi ïamon ban sngew pat? phi ruh phi ïamon te ïa ka ban long ki synran jong U?” 28#Ïoan. 5:45.Ynda kumta, ki la ïakrenbeiñ ïa u, bad ki la ïa-ong, “Me, me long u synran jong uta; hynrei, ngi, ngi long ki synran jong u Moses. 29Ngi, ngi ïatip ba U Blei u la kren ha u Moses, hynrei, une, ngim tip nangno U long.” 30Uta u briew u la ïathuh bad u la ong ha ki, “Kane shisha ka long kaba da sngewphylla, ba phi phim tip nangno U long, haba U la pynpeit ïa ki khmat jong nga! 31Hynrei, ngi ïatip biang ba U Blei um sngew ïa ki bapop; hynrei, lada uno uno ruh u long uba mane ïa U Blei, bad uba leh ïa ka mon jong u, ïa uta keiñ u sngew. 32Na myndanglong ka pyrthei ym ju ïohsngew ba uno uno ruh u la pynpeit ïa ki khmat jong uba la kha matlah. 33Lymda une u la long na U Blei, um lah ban leh ei ei ruh em.” 34Ki la ïathuh bad ki la ïa-ong ha u, “La kha ïa me ha ki pop suda, te me hikai ma me ïa ngi!” Bad ki la ïashop noh ïa u shabar.

Ka jingmatlah bakynja mynsiem

35U Jisu u la ïohsngew ba ki la shop noh ïa u shabar; haba U la shem te ïa u, U la ong ha u, “Me ngeit ha U Khun U Blei?” 36Te u la ïathuh bad u la ong, “U long uei te, ko Kynrad, ba ngan ïoh ngeit ha u?” 37U Jisu te U la ong ha u, “Me la ïohi ruh ïa u, bad uta uba kren bad me, u long ma u.” 38#Mat. 28:9.Te u la ong, “Nga ngeit, ko Trai.” Bad u la mane dem ïa U. 39#Ïoan. 5:27; 3:19; Mat. 15:14.U Jisu u la ong te, “Ïa ka jingbishar keiñ nga, nga la wan ha kane ka pyrthei; ba kita ki bymïohi, kin ïohi; bad ba kita kiba ïohi, kin ïoh long noh ki bamatlah.” 40Kiba na ki Pharisi te kiba ïadon lem bad U, ki la ïohsngew ïa kine kiei kiei ruh, bad ki la ïakylli ïa U, “Ngi ruh ngi long te ki bamatlah?” 41#Ïoan. 15:22.U Jisu u la ong ha ki, “Lada phi la long ki bamatlah, phim don pop; hynrei, mynta phi ong, ‘Ngi ïohi’; namar kata, ka pop jong phi ka sah keiñ.

Currently Selected:

ÏOANNIS 9: KHB

Highlight

Copy