Konesi 4
4
Petero se ko Yoane gwon ko ŋutu temejik i komor
1A nagon Petero se ko Yoane nyuŋ gwon i jambu ko ŋutu nu, a koanejin ko duma lo katiyuk ti Kadi na Ŋun se ko Sadokejin poŋdi kase ni.
2Lepeŋat a woran kogwon Petero se ko Yoane gwon i todiŋdyö na ŋutu ko i laŋa adi lo twatwa pipien i twan kogwon Yesu ko mugun nanyit aje ŋien i twan. 3A lepeŋat morgi se, a tiŋdi se i kadi rereket tojo ko ko ’bure, kogwon kak gwe a somukö. 4Ama a ŋutu jore lo yiŋga ŋilo kulyaet kulo iŋge yubbö; nyena a kayupök liŋ aje ’dur gwoso aliŋan mukanat.
5A ko gwe sona i ko ’bure, a kasarak ti Yudayaki ko ŋutu temejik se ko katodinok ti Saresi ti Mose momoruŋdye Yerusalema. 6A lepeŋat momori i pirit na geleŋ ko Ana koane duma, ko Kayapa, ko Yoane, ko Alesaŋöero se ko kötumit liŋ na koane duma. 7A nagon Petero se ko Yoane aje jwe kase i komor nu, a se pije lepeŋat adi, Ta koŋdya kine kulya ko riŋit nipa, kode ta kita i karin ti pa? 8A kirut Petero iŋge jore ko Mulökötyo Loke, a waddi lepeŋat adi, Ta kasarak ti ŋutu kaŋ se ko ŋutu temejik, 9ko ta ’dek pija yi i lo lor kogwon po na ’but nagon a konaki ŋuto lo bata lo ko nye tokela ada, 10nyena ta liŋ se ko ŋutu liŋ ti Yisaraele dene ta den adi, ŋilo ŋuto gwo ’dan kasu i komor a loke kogwon karin ti Yesu Kristo lo Najareta. Ŋilo a Yesu logon ta köju a ’bikikin i ködini na görö logon Ŋun aje topi i twan lo.
11 #
Sau 118.22
Lepeŋ a ŋurupit logon ta ka ’dukök a renya lo, ama aje wora a ŋurupit tutuŋet lo goŋet lo kadi. 12Lwökit ’bayin ko lele ŋuto kwöŋ, kogwon kunie karin ’bayin i kak ni nagon a tiki ŋutu anyen agu ködyö lwöggu yi.
13Nyena a se ko meddi topurwan nase Petero ko Yoane, ko a den adi lepeŋat a ŋutu logon a ko todinö ko ti den kulya nu, a se iŋge söŋu; a kirut se iŋge kurun adi lepeŋat köju gwon ko Yesu i pirit na geleŋ. 14A lepeŋat iŋge met ŋilo ŋuto logon aje tokela lo gwogwo ’dan ko Petero se ko Yoane i pirit na geleŋ, a kutusen kase iŋge ’dija.
15Nyena a se takiŋdye lepeŋat anyen wuwuddya i pirit jamet na putet, a se morani ko ’börik adi, 16Yi kon kulo ŋutu ada? Kogwon ŋutu liŋ lo si ’da Yerusalema kulo aje den adi lepeŋat lo koŋdya ŋina kweyet sörit, a yi tine bulö renya nye. 17Ama ti yi tokujöŋdi ta lepeŋat adi ti se. gwe ti jambu ko lele ŋuto köti i kine karin, anyen kine kulya gwon ti rekin ko ŋutu kiden.
18Nyena a se lupundye lepeŋat, a saŋi saŋu an se jambu kode todiŋdyö kwoŋ i karin ti Yesu. 19A Petero se ko Yoane kölumbö waddi lepeŋat adi, Ta ko mugunya kasu lilije ta ko po a nyo nagon a na ’but ko Ŋun i metet: adi i yiŋga na ta kode i yiŋga na Ŋun?
20Ko gwe gwoso yi, nyena yi ti bulö kölökiŋdyö i jambu na po nagon yi ko mugunya kaŋa met ko a yiŋ kune.
21A se tokujoŋdi se köti, a kölöddi se, ti ryö kiko logon se riŋge lepeŋat kogwon se kukujönö ŋutu; kogwon ŋutu liŋ pupurja Ŋun i po na kona kune. 22Kogwon ŋuto logon a tokela i kiko logon a sörit lo gwon ko kipajin lwölwöŋ merya iŋwan.Kayupok a mo ’yu Ŋun anyen se gwon a purwat
23A na kölöri Petero se ko Yoane nu, a se yitöni ko ŋutu kase yu, a nyönyökökiŋdye lepeŋat po liŋ nagon koanejin temejik se ko ŋutu temejik a kulyari ko se kune. 24#Yuö 20.11; Nem 9.6; Sau 146.6A na yiŋge se nu, a se poki i kwakwaddu na Ŋun ko töili geleŋ adi, Pon Matat, do a gweja ko ki ko kak, ko toron ti ’balaŋ se ko po liŋ nagon gwon i lukata nase kune.
25 #
Sau 2.1, 2 Do köju a jambu ko riŋit na Mulökötyo Loke ko merenye likaŋ Dawidi koliŋonit ilot i kutuk adi,
Nyo nagon ŋutu ti jurön woworan?
Nyo iŋweyajin ti ŋutu yeyeju mwon ko kana?
26Moran ti kak a ’dakakin i mörö, a kasarak momori i pirit na geleŋ i mörö ko Matat se ko Masia lonyit.
27 #
Luk 23.7-11;
Mat 27.1, 2; Mar 15.1; Luk 23.1; Yoa 18.28, 29 ’Diri Erode ko Pontio Pilato momoruŋdya i na köji mora ko Lwaka se ko ŋutu ti Yisaraele i mwon ko Yesu köliŋonit ilot loke, logon do a welakin a Masia lo. 28Lepeŋat momora anyen koŋdya po liŋ nagon do ko riŋit inot se ko yeyeet inot aje teteŋdya ajo anyen kokona kune. 29Nyenagon pon Matat, mete met tokujöŋdu nase na yi, ko tiki yi köliŋönök kulök i jambu na kulyaet ilot ko topurwan a duma.
30Riu könin ilot i toligga, ko ti sörösi ko kweyesi konani kona i karin ti köliŋonit ilot loke Yesu. 31A nagon se aje jo kwakwaddu nu, a pirit nagon se a momora kata na boŋdi böŋdu, a se liŋ iŋge jore ko Mulökötyo Loke, a jambi kulyaet lo Ŋun ko topurwan.
Ŋo liŋ papara
32 #
Kon 2.44, 45 A teŋ na kayupök gwe ko yeyeet geleŋ ko töili geleŋ, a lele gwe ’bayin logon kulya adi po kanyit a kanyit ka ’de, ama po liŋ papara. 33a luyökie iŋge tokujö ko riŋit a duma adi Yesu ’diri a ŋien i twan, a ’busan na Ŋun gwe a duma ko se liŋ. 34a lele ŋuto gwe ’bayin kase kiden logon yöŋö ŋo, kogwon ŋutu lo gwon ko meleseno kode kadijik kulo tutugwör se, a joŋdi gurut nagon se a wu kune 35a tiŋdi ko luyökie i komor, a kokorakine i ŋutu liŋ geleŋ geleŋ gwoso i ’dekesi kase. 36A lele ŋuto kata karin kanyit a Yosepa, logon luyökie luŋ a Barnaba. (Barnaba nyönyökö adi kato golonit.) Ŋilo ŋuto a Lewityo ko a ŋuto lo Kuprio. 37A nye tugwöŋi melesen nanyit, a joŋdi kine gurut a tiŋdi ko luyökie i komor.
Currently Selected:
Konesi 4: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
