Yuörö 5

Mose ko Arona gwo ’dan ko Paro i komor

1A i mukök a Mose ko Arona iti ko Paro yu a kulyani adi, MATAT Ŋun lo Yisaraele lo kulya adi, Kölörö Ŋutu kwe anyen lepeŋat tu, konakiŋdya nan rorwe i yöbu yu. 2Kölumbö a Paro pipije adi, MATAT a ŋa logon nan ködyö yiŋga gworo lonyit a kölöddi Ŋutu ti Yisaraele? Nan ti den MATAT, Köti nan ti kölörö Ŋutu ti Yisaraele i tu. 3A se waddi adi, Ŋun lo Ebere aje rum koyi; yi mo ’yu do, böŋö kölörö yi anyen jölöji perok musala i yöbu anyen ’duŋokiŋdyo MATAT Ŋun likaŋ rubaŋga, an nye ko labakin kayaŋ loki ko twanti iŋgo kode ko baŋdu.

4Nyena a mor lo Ejipeto pipije lepeŋat adi, Do Mose ko Arona, ko nyo nagon ta joŋga Ŋutu kaŋo kase i kitajin? Iti ta i kita nasu na pömöni. 5A Paro ririŋge adi, Mete ta, Ŋutu ti lo jur soŋinana jore, a ta tiŋdi lepeŋat i yukan i kitajin kase!

6A i ŋilu lor lo geleŋ lu, a Paro saŋi katokitak ti Ŋutu se ko yumiat kase adi,

7Ta koti ködyö ti tiŋdu kilo Ŋutu tuya anyen ŋolarikin lipo anyen ’duŋö a tupön gwoso na yeŋ na; ti lepeŋat iti i galakiŋdya na ’borik tuya. 8Ama ta ködyö ti nyökun kenet na tupön kak kwöŋ, ama ta kodyo ri ’dikin lepeŋat i ’duŋgö na tupön gwoso i kenet na yeŋ na; kogwon kilo Ŋutu a yokia, ŋina a kwe nagon lepeŋat gwigwien adi, Kölörö yi böŋö anyen yi tu ’duŋökiŋdyo Ŋun likaŋ rubaŋga. 9Ti kita na pömöni bia parik sopakine kilo Ŋutu anyen se kikita a gwe ti yiŋga kulya ’burönö.

10A katokitak ti Ŋutu se ko yumiat kase kulo lupöni kaŋo a kulyani ko Ŋutu adi, Paro lo kulya adi nye ti ’bön tiŋdu ta tuya asut. 11Ta lepeŋat lo tu i galakiŋdya na ’börik tuya gwoso i piritön nagon ta bubulö ryeju kata kunu, ama kita nasu ti nyökwe kak kwoŋ. 12Nyena a kilo Ŋutu reara i jur lo Ejipeto liŋ i galaddu na kuku a tuya.

13A kilo katokitak rurumbe lepeŋat adi, Tutuŋge ta kitajin kasu ti lor gwoso na koŋdi ta i diŋit nagon tuya kata nu.

14A yumiat ti Ŋutu ti Yisaraele logon Ŋutu ti Paro katokitak a tikin i meddya na se kulo ’bitöni ’bitö, a piyani piya adi, Nyö nagon kaje ko i lo lor ta a ko temakiŋdya kita na ’duŋöki ta i ’duŋgö na tupön gwoso na yeŋ na?

15Nyena a yumiat ti Ŋutu ti Yisaraele iti ko Paro yu, a gwine gwien pija adi, Nyö nagon do konakiŋdya yi ’dupi kulök sona? 16Ŋutu a ko tiŋdu yi ’dupi kulök tuya asut, ama a se kulyani koyi adi, ’Duŋge ta tupön! Mete, yi ’dupi kulök aje ’bitö, ama toron a na Ŋutu kulök. 17Ama a Paro waddi adi, Ta a yokia, ta kilo Ŋutu a yokia! Ŋina a kwe nagon ta kulya adi ti nan kölörö ta i ’duŋökiŋdyö na MATAT rubaŋga. 18Nyenagon soŋinana iti ta, kitani ta kita; kogwon tuya ti tiki ta kwöŋ, ama ta agu ködyö ’duŋgö tupön jojo gwoso i kenet. 19A yumiat ti Ŋutu ti Yisaraele meddi adi se gwe i nagusu na kulyari Ŋutu adi, Ta kwöŋ ti nyökun kak kenet na tupön na ’duŋge ta a ti lor kune. 20A na lupuŋdye kilo yumiat kaŋo ko Paro i komor nu, a se torumbe ko Mose ko Arona logon möŋdu se; 21a kilo yumiat kulyani ko se adi, Ti MATAT meddi ta ko ti ’duŋge kulya kasu, kogwon ta a tiŋdu kulya kaŋ i mon arabat ko Paro i komor, ko i Ŋutu kanyit Köti, a ta inge tiŋdu baŋdu-jin ko lepeŋat i könisi i tatuja na yi.

Kwakwaddu na Mose

22A Mose Köti yitöni ko MATAT yu, a mo ’yi adi, Pon MATAT, nyo nagon do konakin kilo Ŋutu arabat sona? Nyö nagon do a sunyun nan? 23Kogwon suluja i diŋit na pöri nan ko Paro ni i jambu i karin kunök nu, nye aje konakin kilo Ŋutu arabat, ama do a ko lwöggu Ŋutu kulök kwöŋ.

Currently Selected:

Yuörö 5: BBE

Highlight

Copy