Yuörö 8

Tomiet nagon a kimur

1A kirut MATAT kulyani ko Mose adi, Lupöni ko Paro yu, kulyani ko lepeŋ adi, MATAT lo kulya adi, Kölörö Ŋutu kwe anyen se boŋo tu kitakiŋdya nan.

2Ama ko do a renya kölöddu lepeŋat asut, mete, nan de totomi jur ilot ’bukuluŋ ko lo ’dokia; 3a Supiri mo koko ’yökti a lo ’dokia logon mo po tojo konut kadi, ko i kadi nagon do doto kata na, ko konut i dotoet, ko i kadijik ti kölipönök kulök ko ti Ŋutu kulök, ko i namesi kunök dekesi, ko i kalabajin kunök nutusi ti ambatajin.

4A lo ’dokia mo labaki konut i mugun, ko i Ŋutu kulök se ko i kölipönök kulök liŋ. 5A MATAT kulyani ko Mose adi, Taki Arona adi, Riörö könin ilot ko ture ilot, yuddye karya, ko luruki, ko törön, anyen topukuŋdyo lo ’dokia i jur lo Ejipeto. 6A Arona riöddi könin lonyit yuddya pioŋ ti Ejipeto; a lo ’dokia lo puku a muluje kak na Ejipeto liŋ. 7Ama a ’bunuk Köti koŋdi sona ko mian kase, a topukuŋdye lo ’dokia i jur lo Ejipeto.

8A kirut Paro luŋgi Mose ko Arona, a takiŋdye lepeŋat adi, Momo ’yi ta MATAT anyen joŋga lo ’dokia liŋ kaŋo köyö se ko i Ŋutu kwe; a nan de kölöddi kulo Ŋutu anyen se böŋö tu i ’duŋoki-ŋdyo na MATAT rubaŋga. 9a Mose kulyani ko Paro adi, Böŋö wulökiŋdye nan diŋit nagon nan mumulukiŋdye do ko kölipönök kulök se ko Ŋutu kulök, anyen lo ’dokia böŋö tukaraji kaŋo konut ko i kadijik kunok lukata, anyen gwon i Supiri ka ’de. 10A Paro waddi adi, Kine kulya de kökona ko ’bure. A Mose kulyani adi, Ti gwe gwoso na jambi do na, anyen do böŋö deden adi lele ’bayin gwoso MATAT Ŋun likaŋ.

11Lo ’dokia de wuwuddya konut, ko konut i kadijik, ko i kölipönök kulök se ko i Ŋutu kulök; a se de gwe i Supiri ka ’de. 12A Mose ko Arona lupöni kaŋo ko Paro i komor; a Mose gwiki ko MATAT i kulya ti lo ’dokia logon nye MATAT aje jakin Paro kulo. 13A MATAT koŋdi gwoso na kulyari Mose na; a lo ’dokia twatwane twatwa i kadijik lukata, ko i ’baŋin, se ko i meleseno.

14A se ’du ’dumbe lepeŋat a ’domio, a kak mone ŋeŋek. 15Ama a Paro ko meddi adi yukan gwe kata nu, a nye tupömöni ’ye töili lonyit, a tine ’bön yiŋga se kwöŋ; gwoso nagon MATAT a kulyari na.

Tomiet nagon a kimur

16A MATAT kulyani ko Mose adi, Taki Arona adi, Riörö ture ilot i gwuddyö na ŋutu ti kak, anyen se wora a kimur i kak liŋ na Ejipeto. 17A se koŋdi sona; kweja adi Arona a riöddu könin lonyit ko ture lonyit a gwuddye ŋutu ti kak, a kimur poki i Ŋutu ko i toro ’bo; a ŋutu liŋ ti kak worani a kimur i jur liŋ lo Ejipeto. 18A ’bunuk mirakiŋdye koŋdya ko mian kase anyen topuku-ŋdyö kimur, ama a se tine bulö. Nyena a kimur gwe i Ŋutu ko i toro ’bo. 19#Luk 11.20 A kirut ’bunuk kulyani ko Paro adi, Ŋilo a morinet lo Ŋun lo koŋdya, ama a töili lo Paro gwe a iŋgo, a nye tine ’bön yiŋga se asut, gwoso nagon MATAT aje kulyari nu.

Tomiet nagon a kadoŋon

20A MATAT kulyani ko Mose adi, Ŋine ki kotumalu ’beron, ko möŋdi Paro na tiri nye kare nu, kulyani ko lepeŋ adi, MATAT lo kulya adi, Kölörö Ŋutu kwe, anyen se böŋö tu kitakiŋdya nan. 21Ama ko do ti ’bön kölöddu Ŋutu kwe, mete, nan mo susunyukin do ’diko na kadoŋon, ko i kölipönök kulök, ko i Ŋutu kulök, se ko i kadijik kunök lukata; a kadijik ti Ŋutu ti Ejipeto mo tojorene ko ’diko na kado ŋon, ko Köti i kak na gwoŋdi se na.

22Ama i ŋilu lor a nan mo koruŋdye jur lo Gosene logon Ŋutu kwe si ’da kata lo, anyen ’diko na kadoŋon mo gwon ’bayin nyu, anyen do böŋö deden adi nan logon a MATAT i kiden na kak ’bukuluŋ. 23A nan mo tiŋdi koret i kiden na Ŋutu kwe ko na Ŋutu kulök. A i ko ’bure a ŋina kweyet de gwe kata.

24A MATAT koŋdi sona; kweja adi ’diko na kadoŋon a ’buköddu ko Paro kadi, ko i kadijik ti kölipönök kanyit, a jur liŋ lo Ejipeto iŋge körö kogwon kadoŋon jore parik lwölwoŋgu.

25A kirut Paro luŋgi Mose ko Arona, a kulyani adi, Iŋgo iti ta, tu ’duŋökiŋdye ta Ŋun losu rubaŋga i lo jur. 26A Mose kulyani adi, Ti gwon a na ’but i koŋdya sona, kogwon yi de ’duŋökiŋdyö MATAT Ŋun likaŋ ru baŋgajin logon Ŋutu ti Ejipeto maman kulo. Nyena ko Ŋutu ti Ejipeto a met yi i ’duŋgö na rubaŋgajin logon se maman kulo a se de ti gugubuja yi ko ŋurupö le? 27Yi agu ködyö jölö perok musala i yöbu kata, a ’duŋökiŋdye MATAT Ŋun likaŋ rubaŋga, gwoso nagon nye mo sarakiŋdye yi nu. 28A Paro kulyani adi, Nan de kökölörö ta i yöbu i ’duŋökiŋdyö na MATAT Ŋun losu rubaŋga; ama tuŋ ta ti bulö tu pajo parik. Momo ’yi ta ko nan Köti.

29A Mose kulyani adi, Nan lo iti kaŋo konut, a nan mo mo ’yi MATAT anyen ’diko na kadoŋon ko ’bure böŋö wusaddu kaŋo konut do Paro, ko i kölipönök kulök se ko i Ŋutu kulök; ama tuŋ ti do Paro Köti gwe ti mumu-lugga adi do ti kölöddu Ŋutu kulo i ’duŋökiŋdyö na MATAT rubaŋga. 30A Mose lupöni kaŋo ko Paro i komor a momo ’yi MATAT. 31A MATAT koŋdi gwoso na mo ’yi Mose nu, a nye ’du-maddi ’diko na kadoŋon kaŋo ko Paro, ko i kölipönök kanyit, se ko i Ŋutu kanyit, a ko pitökin ma ’di geleŋ to.

32Kölumbö a Paro tupömöni ’ye töili lonyit i ŋina daŋ Köti, a nye tine kölörö Ŋutu kulo asut.

Currently Selected:

Yuörö 8: BBE

Highlight

Copy