Suluet 19

Körö na Sodoma ko Gomora

1A kilo malaikajin murek ’dure Sodoma kotyao; a ’bunyökiŋdye Loto sisi ’da i kotumit na mariŋ na Sodoma. A Loto ko meddi se, a nye ŋine ki i rum ko se, a rosokakine kak ko komor nanyit, 2a kulyani adi, Pon dumalak kwe, böŋö giru ta köyö mede nan kölipönit losu, anyen ta ko mönu ŋdyo ni i lo tukwaje, anyen lalaju mokosi kasu; a ta buloni bulo ŋiörö kolumalu ’beron a iti tu kasu i kiko. A se renyani adi, ’Bayin, yi de mönuŋdyö kaŋo i terere i tukwaje. 3a nye tiddye se parik; a se girara kanyit yu, a lupöni kadi; a nye tetenakiŋdye se rorwe, a deŋi ambata nagon ’bak kape, a se nyesi nyesu. 4A nagon se a ko nyuŋ piriki kak nu, a Ŋutu lyan ti köji na Sodoma lorakiŋdye nu kadi kiden, kweja adi Ŋutu lyan liŋ teton ko muduŋin ma ’di ŋuto geleŋ a ko pitu ŋdyo. 5#Ka’d 19.22-24 A se luŋgi Loto, a pipije lepeŋ adi, Kuliya Ŋutu logon a lupe konut ni i lo tukwaje kulo? Topukoki yi lepeŋat anyenyi böŋö yoyoja lepeŋat. 6A Loto lupene kase ni i kötumit, a kinikiŋdye kötumit nyin i lupe nanyit, 7a kulyani adi, Luŋasirik kwe, nan mo ’yu ta böŋö an ta ko koŋdya ta toron gwoso ŋina. 8Mete ta, nan lo gwon ko kö ’disi murek nagon a ko nyuŋ den Ŋutu lyan; ti nan topukokiŋdye ta lepeŋat, a ta konakiŋdye lepeŋat gwoso nagon ta ’de ’dekan na; tuŋ an ta ko konakiŋdya ta Ŋutu logon a po köyö kadi kilo nene ŋo naron. 9Ama a se kulyani adi, iŋgo, kölöki yi kiko! A se koti kulyani adi, Lo a ŋuto lo po i mönuŋdyö, a nye ’deke koŋdya mugun a ka ’duŋönit lo kulya kaŋ! Nyena yi de kökonakin do arabat bia na kilo Ŋutu. Nyena a se dukaddi Loto ko riŋit, a miju nyona i ’beleŋgu na kotumit. 10Ama a kulu kömu sööddi könisi kase a mokuŋdye Loto kadi kase ni, a kiŋdi kotumit. 11#2 Mor 6.18A se iŋge gwut kulu Ŋutu lo gwon i kotumit na kadi ko tomo ’dokenon, temejik ko lo ’di ’dik, a se tudaraji ’borik i wawaju na kotumit.

12A kulu kömu pipije Loto adi, Do gwon ko kulye Ŋutu ni le? Ko do gwon ko komor, kode ŋwajik kulök, kode ŋwajik kunök, kode do gwon ko kulon Ŋutu i na köji, joŋe lepeŋat kaŋo i na pirit, 13kogwon yi de kökör ŋina pirit. Gwien na Ŋutu i kulya ti Ŋutu ti na köji gwe a duma parik ko MATAT i komor, nyena MATAT aje sunyuŋdyö yi i köŋu na lepeŋ. 14A Loto lupöni kaŋo a kulyani ko kömon kanyit logon ’dekan yemba ŋwajik kanyit kulo adi, ŋine ta ki, wuddye ta wuddya i na pirit, kogwon MATAT de kökör na köji. Ama a komor kanyit mete lepeŋ gwoso ŋuto lo jambu kulya kweniesi.

15A i baŋun na kak, a malaikajin rurumbe Loto adi, ŋine ki wulek, joŋgi nakwan inot ko ŋwajik kunök murek na gwon ni kune, an ta ko tukara i diŋit nagon na köji ririŋa. 16#2 Pet 2.7Ama a nye karaki karakin; nyena. kogwon MATAT a won konyen ko lepeŋ, a kulu Kömu morgi lepeŋ i könin, ko nakwan nanyit, se ko ŋwajik kanyit murek kune, a se joŋdi lepeŋ kaŋo, a tiŋdi lepeŋ i kaŋo na köji. 17A ko gwe sona, ase kojondi lepeŋat kaŋo, a nye kulyani adi, Lwököddi mugun, ko boŋga bot, ko si ’da i jur lo kare liŋ; Lwököddi mugun tojo ko merya anyen do gwon ti tukara. 18Loto kulyani ko se adi, ’Bayin sona, pon dumalak kwe. 19Do aje kwekiŋdya nan kölipönit ilot ’busan duma kogwon do a lwöggu ru nio; ama nan ti bulö wökön tojo i merya, an ŋina tukaret ’bunyökin nan, a nan twane twan. 20Mete, köji manu nyona anyen nan wökön kata, ama nye a na ’dit. Ti nan wöki nyu anyen ru nio lwölwökö. Ŋinu köji ŋona ti gwon a na ’dit le? 21A nye kulyani ko lepeŋ adi, Mete, nan a ruk do i kine kulya Köti, adi nan de ti söpukökin nu köji kak nagon do aje tukökin nan kulya kanyit nu. 22Rume rum, wöki nyu; kogwon nan ti bulo koŋdya nene ŋo tojo ko do a ’dur nyu. Nyena a karin ti nu köji luŋuni a Soar.#19.22 Soar Karin ti Soar yiyiŋga gwoso adi A na ’dit 23a na ’durö kiŋdye Loto Soar nu, a kolor aje nyerun.

24 # Mat 10.15; 11.23, 24; Luk 10.12; 17.29; 2 Pet 2.6; Yud 1.7 Nyena a MATAT to ’dukiŋdye Sodoma se ko Gomora kimaŋ ko pisek na po ko MATAT ki yu; 25a nye söpukö kiŋdye kine köjinö kak, ko jur lo kare liŋ, ko Ŋutu liŋ ti kunu köjinö, se ko ŋo liŋ nagon ’du ’duruŋdyö i nu kak kune. 26#Luk 17.32 Ama a nakwan na Loto nagon kebbu lepeŋ na iŋge boŋga bot, a nye worani a ŋurupit logon a ’balaŋ logon gwo ’dan ki gwogwo.

27A Abarayama ŋine ŋien kotumalu ’beron, a iti tojo i pirit nagon nye a gwo ’di ’e ko MATAT i komor nu; 28A nye diraddi kak tojo ko Sodoma ko Gomora, tojo i jur liŋ lo kare, a nye meddi köpuröt lo ŋilu jur i gwululuöddu ki gwoso köpuröt lo pirit namet.

29Nyena a ko gwe sona, na köŋi Ŋun kunu köjinö ti jur lo kare nu, a Ŋun yeyeji Abarayama, a sonyoddi Loto kaŋo i kiden na tukaret nagon nye a sopuggo kunu köjinö na si ’dari Loto kunu.

Pipiluŋdya na kötumit na Moaba ko na Amon

30Nyena a Loto se ko ŋwajik kanyit murek kune ŋiörö kaŋo Soar yu a tu si ’dani i merya ki, kogwon lepeŋ kukujönö si ’da Soar; nyena a lepeŋ si ’dani i kuggi lukata se ko ŋwajik kanyit murek kune i pirit na geleŋ. 31A kayu na kulyani ko loponi na adi, Baba gwe a modoŋ, a Ŋutu lyan gwe ’bayin i kak logon po kayaŋ ni gwoso i gwiliŋit lo Ŋutu liŋ ti kak. 32Po, ti yi tiŋdi baba i möju na binyo anyen yi doto ko lepeŋ, anyen yi böŋö pipi ’yu kötumit na baba. 33Nyena i pilu tukwaje a se tiŋdi monye lose i möju na binyo; a kayu na dotoni ko monye; a monye gwe a ko den na piriki ’e nye kak kode na ŋiundye nye ki nu. 34Nyenagon i kotumalu nanyit, a kayu na kulyani ko loponi adi, Mete, i tukwaje lo tu nan a doto ko baba; ti yi tiŋdi lepeŋ i möju na binyö i lo tukwaje koti; a do de dotoni ko lepeŋ, anyen yi böŋö pipi ’yu kötumit na baba. 35Nyena i nilu tukwaje Köti a se tiŋdi mönye lose i möju na binyo; a loponi na ŋine ŋien a dotoni ko lepeŋ; a monye gwe a ko den na piriki ’e nye kak kode na ŋiundye nye ki nu. 36Nyena a ŋwajik murek liŋ ti Loto kune gwe ko pelela kogwon se a doto ko monye lose. 37a kayu na yuŋuŋdye ŋuro lulalet, a gwije lepeŋ a Moaba; lepeŋ a merenye Ŋutu ti Moaba tojo ko lo lor. 38A loponi na Köti yuŋuŋdye ŋuro lulalet, a nye gwije lepeŋ a Ben-ammi; lepeŋ a merenye Ŋutu ti Amon tojo ko lo lor.

Currently Selected:

Suluet 19: BBE

Highlight

Copy