Suluet 29

Yakobo a kitakiŋdya Labana anyen nye tiki Lea ko Raele

1A Yakobo jölöjine ŋerot, a ’dure i jur lo Ŋutu ti swöt lo ’yure. 2A nye ko boŋgi, a meddi kidi i yöbu, mete, a teŋon musala ti yidin aje peron i ŋilu kidi nyona; kogwon kayukuk tutumaddu teŋon ti yidin i lu kidi. A ŋurupit na muggö ŋilu kidi nu gwe a duma parik; 3a nagon teŋon ti yidin liŋ aje momora yu nu, a se gwugwuluŋöddi ŋurupit kaŋo i kutuk na kidi, a tutumaddi yidin ko pioŋ, a se nyökökiŋdye ŋurupit Köti kanyit i pirit i kutuk na kidi.

4A Yakobo pipije se adi, Luŋasirik kwe, ta ŋona po ya? A se waddi adi, Yi po Karan yu. 5A nye Köti pipije se adi, Ta ŋona deden Labana ŋuro lo Nakor? A se waddi adi, Yi a den lepeŋ. 6A nye nyoggi pija se adi, Lepeŋ ŋona a lo ’but? A se waddi lepeŋ adi, lye, lepeŋ a lo ’but; Raele ŋuro nanyit nu popo meundya yidin! 7A nye kulyani adi, Meddi ta, kolor nyuŋ a duma, Köti nati gwon a diŋit tutunet na toro ’bo; tumaddi ta yidin, ko iti ta, meyaddi ta se i nyesu. 8A se kulyani adi, Yi ti bulö tojo teŋon ti yidin liŋ a tutuŋwe i pirit na geleŋ, a kirut ŋurupit gwugwuluŋöjine kaŋo i kutuk na kidi, a yi de tumaddi yidin.

9A nagon nye nyuŋ jajambu ko lepeŋat nu, a Raele na ’dure meundya yidin ti monye kune; kogwon nye na yuggu se. 10A ko gwe sona, a Yakobo ko meddi Raele ŋuro na mananye lonyit Labana, se ko yidin ti Labana mananye lonyit kune, a Yakobo mijörö nyona, a gwuluŋöddi ŋurupit kaŋo i kutuk na kidi, a tumaddi teŋ na yidin ti Labana mananye lonyit kune. 11A Yakobo ’biuŋdye Raele, a poki i gwien. 12A Yakobo nyönyökökiŋdye Raele adi nye a karutyo lo monye lonyit, ko Köti adi nye a ŋuro lo Rebeka; nyena a Raele rume rum ’de ’de a tu takiŋdye monye.

13A Labana ko yiŋge lore lo Yakobo ŋuro lo kiaser nanyit, a nye wöki i törumbo ko lepeŋ, a kalabbi lepeŋ a ’biuŋdye lepeŋ, a nye joŋdi lepeŋ kanyit kadi. A Yakobo nyönyö kökiŋdye Labana kine kulya liŋ, 14a Labana kulyani ko lepeŋ adi, ’Diri do a kuyutyo lio ko a mugun nio! A Yakobo si ’dani ko lepeŋ yu ko yapa geleŋ.

15A Labana kulyani ko Yakobo adi, Nyena ma ’di do a karutyo lio, do ti bulö kitakiŋdya nan ko kana. Taki nan ŋo nagon nan parakiŋdye do ko a nyo? 16A Labana gwe ko ŋwajik nawate murek, karin ti kayu na a Lea, a karin ti loponi na gwe a Raele. 17A konyen ti Lea tine kwelen, ama a Raele gwe a nakwekwelen i mugun ko i meta.

18A Yakobo nyaŋi Raele; a kulyani adi, Nan mo kikitakiŋdya do kiŋajin buryo kogwon kulya ti Raele ŋuro inot loponi. 19A Labana kulyani adi, Bia nagon nan tiŋdu do lepeŋ lwölwöŋ nagon nan tin lepeŋ i lele lalet; si ’dani köyö ni. 20a Yakobo kitakiŋdye lepeŋ kiŋajin buryo kogwon kulya ti Raele, a kilo kiŋajin metani kanyit i konyen gwoso perok ku ’dik kogwon nyaŋu nanyit na lepeŋ.

21A Yakobo kulyani ko Labana adi, Tiki nan narakwan nio anyen nan bubulö lupö ko lepeŋ yu kogwon perok kwe aje jukin. 22A Labana momoruŋdye Ŋutu lyan liŋ ti ŋinu pirit, a teteŋdi rorwe. 23a ko gwe sona i sömukö, a nye ’dumuŋdye Lea ŋuro nanyit, a jakiŋdye lepeŋ; a Yakobo lupöni ko lepeŋ yu. 24(A Labana iŋge tiŋdu ŋuro nanyit Lea kölipönit nanyit Jilepa anyen gwon a kölipönit na lepeŋ.) 25A i ko ’bure a Yakobo ko mete, kudyakan a gwe a Lea. A Yakobo pipije Labana adi, Na ŋo a nyo nagon do a konakin nan na? Nan a kitakiŋdya do kogwon kulya ti Raele. ’Bayin sona le? Ko nyo do a mumulugga nan? 26A Labana waddi adi, Kayaŋ i jur ŋuto ti koŋdya sona i tiŋdu ŋuro loponi a kokwe na ŋuro kayu. 27Tutuŋge ŋilo jima lo budu yemet a lo ŋuro kayu, a yi mo ko tiŋdi do loponi na ko do a kitakiŋdya nan ko kulye kiŋajin buryo Köti. 28a Yakobo koŋdi sona, a nye tutuŋge jima a lo Lea; a kirut Labana tiŋdi lepeŋ ŋuro nanyit Raele i gwon a nakwan nanyit.

29(A Labana Köti tiŋdi ŋuro nanyit Raele kölipönit nanyit Bila anyen gwon a kölipönit na lepeŋ.) 30A Yakobo lupöni ko Raele yu, a nye nyaŋi Raele lwölwöŋ Lea, a kitakiŋdye Labana ko kulye kaŋajin buryo.

Ŋwajik lo yuŋweki Yakobo

31A MATAT ko meddi adi Lea mamana, a nye ŋaji pele nanyit; ama a Raele gwe a ko yupuŋdyö. 32#29.32 Rubena Karin ti Rubena yiyina gwoso adi Meddi ta! Ŋuro malo!a Lea piŋge pigga a yuŋuŋdye ŋuro lulalet, a nye gwije lepeŋ a Rubena; ’kogwon nye kulya adi, MATAT aje meddya yöyöŋesi kwe; soŋinana lalet lio ’diri de nyanyar nan. 33a nye Köti piŋge pigga a yuŋu ŋdye nuro lulalet; a kulyani adi, MATAT aje yiŋ adi nan mamana, nyena a nye tiŋdi nan lo ŋuro Köti; a Lea gwije lepeŋ a Simeona.#29.33 Simeona Karin ti Simeona yiyina gwoso adi Yiyiŋga 34Köti a nye piŋge pigga a yuŋuŋdye ŋuro lulalet, a kulyani adi, Soŋinana i na daŋ lalet lio de moruŋdya köyö ni kogwon nan a yupwekindyö lepeŋ ŋwajik lulyan musala; nyena a ŋilo ŋuro gwiyöni a Lewi.#29.34 Lewi Karin ti Lewi yiyiŋga gwoso adi mora 35a nye Köti piŋge pigga a yuŋuŋdye ŋuro lulalet, a kulyani adi, Soŋinana nan pupurja MATAT; nyenagon a nye gwije lepeŋ a Yuda;#29.35 Yuda Karin ti Yuda yiyina gwoso adi Pupuŋa a kirut nye gwo ’de gwo ’dan i yuŋwe.

Currently Selected:

Suluet 29: BBE

Highlight

Copy