Suluet 31

Yakobo a wökön kaŋo ko Labana i komor

1Nyena a Yakobo iŋge yiŋ adi ŋwajik ti Labana kulya adi, Yakobo aje ’dumaddu ŋo liŋ nagon a ti baba; Köti lepeŋ aje wuju ŋina tukworien liŋ i ŋo nagon a ti baba kune.

2A Yakobo iŋge met adi Labana tine met nye ko lyöŋön gwoso na ’beron köju nu. 3A MATAT kulyani ko Yakobo adi, Yitöni i jur lo merenyejin kulök, ko i karu kulok; a nan mo gwe ko do 4Nyena a Yakobo soŋdi kutuk, a lupundye Raele ko Lea anyen tu i yöbu na yuggi nye yidin kanyit nu.

5A nye kulyani ko se adi, Nan a met adi munyi ti met nan ko lyoŋon gwoso na ’beron köju nu. Ama ŋun lo baba gwon ko nan.

6Ta a den adi nan a kitakiŋdya monye losu ko riŋit nio liŋ; 7ama monye losu a mumulugga nan ko aje löpuggö daŋin puök ŋo nagon nye parakiŋdye nan kune, ama ŋun a ko ’burukin nye i konakiŋdya na nan arabat. 8Ko nye a kulya adi, Yidin nakiri kune mo gwon a pariesi kunök, nyena a yidin liŋ yuŋu ŋdye nakiri; a ko nye a kulya adi, Se nagon ko wuresi adi ’yim ’yim kune mo gwon a pariesi kunok, nyena a yidin liŋ yuŋuŋdye nagon ko wuresi adi ’yim ’yim. 9Nyena a Ŋun ’dumaddi toro ’bo ti munyi sona a tiŋdi nan se.

10A ko gwe sona i diŋit luwet, a nan rudweni rudwe, a nan meddi lorijoki melon liŋ logon a kaluwak ti yidin gwe a lobeke, ko wuresi adi ’yim ’yim, ko a lonyete. 11A malaikatat lo Ŋun luŋgi nan i rudwe adi, Yakobo, a nan ruŋge adi, Nan malo! 12a nye kulyani adi, ’Bi ’yi konyen kulök ki ko meddi lorijoki melon liŋ logon a kaluwak ti yidin gwe a lobeke, ko wuresi adi ’yim ’yim, ko a lonyete; kogwon nan aje met kulya liŋ nagon Labana kokonakin do kune. 13#Sul 28.18-22Nan lo gwon a Ŋun lo Betele, nu pirit nagon do a welakiŋdye ŋurupit na togwi ’dikin do ki nu, na milyekiŋdye do nan milye nu. Nyenagon soŋinana ŋine ki ko wuddye wuddya i ŋilo jur, ko yitöni bot i jur lo yuŋwe ’i do kata lu. 14A Raele ko Lea waddi waddu pipije lepeŋ adi, Swöt lo toro ’bo ŋona kata ko baba midi lo pitöki yi a lomoriot kaŋ le? 15Lepeŋ ŋona a ko konakiŋdya yi gwoso lwaka le? Kogwon nye a tugwöŋu yi, Köti aje nyesu toro ’bo kaŋ. 16Kogwon tukworien liŋ nagon Ŋun aje ’dumara ko baba na, ŋina gwe a nikaŋ se ko ŋwajik kaŋ; nyenagon koŋdi ŋo liŋ nagon Ŋin a takin do kune.

17Nyena a Yakobo ŋine ŋien, a tosi ’dakiŋdye ŋwajik kanyit ko wate kanyit i kamilojin loki; 18a nye meyaddi toro ’bo kanyit liŋ nagon nye aje ryo kune, kweja adi toro ’bo na ryö nye Padan-aram yu kunu, anyen nye tu i jur lo Kanana ko monye lonyit Yisaka yu.

19A Labana aje tu i ’bariŋdu na kupir ti köbilu kanyit kune, a kudyakan Raele kokoladdi nyömuejin logon a ŋunyen ti mede na monye. 20A Yakobo iti a Iwon Labana ŋuto lo Aram a ko den, kogwon nye a ko takin lepeŋ adi nye wöwökön. 21A nye wöki wökön ko ŋo kanyit liŋ, a nye laŋgi kare Perat, a komor nanyit juŋe jur lo Gilada logon a merya.

Labana a ’demeja Yakobo

22A i mukök na perok musala, a Labana tukökine adi Yakobo aje wökön. 23A nye ’dumuŋdye luŋasirik kanyit kulo a kebbi bot nanyit ko jölö na perok buryo, a gwe nyona ko ryeju na lepeŋ i jur i Gilada logon a merya. 24a Ŋun poŋdi ko Labana ŋuto lo Aram ni i rudwe na tukwaje, a kulyani ko lepeŋ adi, Kunyar, an do ko jamakiŋdya Yakobo nene ŋo na ’but kode naron.

25A Labana ’dure ko Yakobo yu. Nyena Yakobo aje ’beggu kemia nanyit i mere, a Labana ko luŋasirik kanyit ’beggi kase i jur lo Gilada logon a merya. 26a Labana pipije Yakobo adi, Ŋo a nyo nagon do a kon nagon do aje kokoladdu mugun koyo, ko aje baraddu ŋwajik kwe gwoso na momoka i gor?

27Ko nyo do a wökön a lwön ko a kokoladdu mugun köyö a gwe a ko takin nan, anyen nan bubulö nyömöki ŋdyö do ko lyöŋön, ko kölisi, ko tiŋgiliet se ko tomon? 28Nyö do a ko mönökin nan i roman ko ŋwajik kwe lulyan ko nawate? Do aje koŋdya ŋo na ’boŋ. 29Nan gwon ko riŋit i kona kiŋdya na do arabat; ama Ŋun lo munyi a kulya ko nan kwaje adi, Kunyar, an do ko jama kiŋdya Yakobo ŋo na ’but kode naron. 30Nyena do soŋinana aje tu kogwon do yöyöŋö mede na munyi parik; ama kwe a nyo nagon do kokoladdi ŋunyen kwe? 31A Yakobo waddi Labana adi, Nan a kokoladdu se kogwon nan a kujönö adi do riripara ŋwajik kunök kaŋo köyö. 32Ko do a ryö ŋunyen kulök ko lon ŋuto a nye tine ru. Titimbe ’bura ŋo nagon a kunök köyö ko luŋasirik kaŋ i komor, ko joŋgi se a kunök. Yakobo a ko den adi Raele aje kokoluŋdya kilo nyömuejin.

33A Labana lupöni ko Yakobo i kemia, ko i kemia na Lea, ko i kemia na kölipönök murek nawate, ama a nye tine ryö kilo nyömuejin. A nye lupene kaŋo ko Lea i kemia a lupöni ko Raele i kemia. 34a kudyakan Raele aje ’du muŋdya kilu nyömuejin ko aje tiŋdu i lukata na si ’daet na toraki i kamilo na, a si ’dani ko lepeŋat loki. A Labana ŋge bebereŋdya lukata na kemia liŋ, ama a nye gwe a ko ryö se. 35A nye kulyani ko monye adi, Pon duma lio, ti do gwe ti woran kogwon nan ti bulöŋien ki konut i komor, kogwon nan gwon ko perok ti yapa. Nyena a Labana ga ’yi ga ’yu, a nye tine ryö nyömuejin kulo.

36A Yakobo wore woran, a woŋe ko Labana; a Yakobo pipije Labana adi, Nan ŋona a lyaŋan i nyo? Toron nio a nyo nagon do ’demeja mukök nio ko riŋit? 37Ma ’di nagon do a bebereŋdya tito kwe liŋ, do a ryeju ŋo a nyo na tito kunök liŋ ti mede? Tiki ŋo nagon do a ryö na ko luŋasirik kwe i komor ko i komor na luŋösurök, anyen se bubulö lilija kulya kaŋ yi murek. 38Kilo kiŋajin merya murek nan gwon konut i könin; köbilu kunök ko melon kunök a ko yöpun, Köti nan a ko nyö lopijoki ti teŋon kunök. 39Turu ’buti nagon gworoŋ lo koja nan a ko jakin do, kolumbö nan lo ropakiŋdya nene i pirit; do a luŋgu köyö ŋo nagon a kokolaji paran kode kwaje. 40Nyena gwiliŋit lio gwon sona, adi kolor a leŋ nan i tuparan ko katirut i tukwaje, doto nio aje wökön köyö i konyen.

41Kilo kiŋajin merya murek nan aje si ’da konut i ’baŋ; nan aje kitakiŋdya do ko kiŋajin puök wot Iŋwan anyen do tiŋdu nan ŋwajik kunök murek, nan Köti a kitakiŋdya do ko kiŋajin buker anyen do tiŋdu nan yidin kunök, a do iŋge löpuggö daŋin puök ŋo nagon do parakiŋdye nan kune. 42Ko kodyö ŋun lo baba, logon a Ŋun lo Abarayama logon Yisaka kukuk lo a ko gwon ko nan, do soŋinana kodyö aje sonyoddu nan kana ’bak nene ŋo. Ŋun aje meddya yöyöŋesi kwe ko dara na könisi kwe, a nye iŋge riŋ do kwaje.

Yakobo ko Labana a mora ko milye

43A Labana waddi Yakobo adi, Kine ŋwajik a ŋwajik kwe, ko kilo lupudiet a lupudiet kwe, ko kine teŋon ti yidin a teŋon kwe, Köti ŋo liŋ nagon do memet kine gwon a kwe. Ama nan konakiŋdya kine ŋwajik kwe nyo i lo lor se ko ŋwajik kase lo yuŋ se kilo?

44Soŋinana ti yi morani mora; ko ti Ŋina mora nikao gwe a kweyet i kiden nikao ko do. 45a Yakobo ’dumuŋdye ŋurupit, a togwi ’dikiŋdye lepeŋ ki gwoso kumut. 46A Yakobo kulyani ko luŋasirik kanyit adi, ’Du ’dumuŋdye ta ŋurupö, a se ’du ’dumuŋdye ŋurupö, a ’du ’du ’yi se i pirit na geleŋ; a se nyesi nyu i ŋilu ’dome nyona. 47a Labana luŋgi ŋilu ’dome a Yegar-saduta; ama a Yakobo gwije ŋilu ’dome a Galeda.#31.47GaledaKarin ti Galeda ko kutuk na Ebere tuggo adi Dome kweyet 48A Labana kulyani adi, ŋilo ’dome i lo lor a kweyet i kiden nikaŋ ko do. Nyena ko ŋina kwe a ŋilo ’dome luŋuni a Galeda, 49Köti a luŋuni a Misepa, #31.49 Misepa Karin ti Misepa kweja adi Bilili tiyit kogwon Labana a kulya adi, MATAT titiju i kiden nikaŋ ko do, na gwoŋdi yi ka ’de ka ’de na.

50Ko do mo yöyoŋgu ŋwajik kwe, Köti ko do mo yemuŋdya kunie wate lwö lwöŋ ŋwajik kwe, ma ’di lele ŋuto ’bayin koyi i pirit na geleŋ, dene den adi Ŋun lo gwon a kametanit i kiden nikaŋ ko do.

51A Labana kulyani ko Yakobo adi, Meddi ŋilo ’dome ko meddi ŋilo ŋurupit logon nan a togwi ’dikin a kumut i kiden nikaŋ ko do lo. 52Ti ŋilo ’dome gwe a kweyet, ko ti ŋilo ŋurupit logon a togwi ’diki ki a kumut lo Köti gwe a kweyet nagon tökoŋu adi nan mo ti laŋgu ŋilo ’dome i tu konut ŋini i konakiŋdya na do arabat, a do mo tine laŋgu ŋilo ’dome ko ŋilo ŋurupit i po köyö ni i konakiŋdya na nan arabat. 53Ti Ŋun lo Abarayama logon a Ŋun lo Nakor, kweja adi a Ŋun lo merenye lose lo, ti nye lilije kine kulya kayaŋ kiden. Nyena a Yakobo milyeji i karin ti Ŋun logon monye lonyit Yisaka kukuk lo, 54A Yakobo ’duŋge rubaŋga i ŋilu mere, a luŋgi luŋasirik kanyit kulo i nyesir na kinyo; a se nyesi nyesu a mönuŋdye i ŋilu mere tukwaje liŋ.

55A Labana ŋine ŋien ko ’bure kobubut, a romara ko nyakwariat kanyit ko ŋwajik kanyit nawate kune, a ’boroji se; a kirut a nye ŋiörö ŋiörö a yitöni bot kanyit mede.

Currently Selected:

Suluet 31: BBE

Highlight

Copy