Suluet 45

Yosepa a kwekiŋdya mugun i dena ko luŋasirik kanyit

1 # Kon 7.13 Nyena a Yosepa tine bulö teŋgu mugun i komor na Ŋutu liŋ logon gwo ’dan kanyit nyona kulo; a nye kulyajine ki adi, Ti Ŋutu liŋ lupöni kaŋo köyö i komor. A na kwekiŋdye Yosepa mugun i dena ko luŋasirik kanyit nu, a kulye Ŋutu gwe ’bayin lo gwon ko lepeŋ i pirit na geleŋ. 2A nye luluöddi ki parik, a Ŋutu ti Ejipeto yiŋge yiŋga, a Ŋutu lo gwon ko Paro midi kulo Köti yiŋge yiŋga. 3A Yosepa kulyani ko luŋasirik kanyit kulo adi, Nan a Yosepa; baba gona lu nyuŋ gwon jörun le? A luŋasirik kanyit tine bulö waddu lepeŋ, kogwon se kukujönö meddya lepeŋ a lokomor.

4A Yosepa kulyani ko luŋasirik kanyit adi, Bögö poŋdi ta nyona köyö ni. A se poŋdi nyona, a nye kulyani adi, Nan a Yosepa luŋaser losu logon ta aje tugwör a jweni i lo jur lo Ejipeto. 5Nyenagon soŋinana ko delya ta, an ta ko wowori ta ko ’börik kogwon ta a tugwöŋu nan a jweni ni; kogwon Ŋun a sunyuŋdyö nan kasu ŋerot i lwöggu na ru nasu. 6Kogwon dyaŋ gwon i lo jur kilo kiŋajin murek; ama kiŋajin mukanat nyuŋ kata logon mo ti kururikin kode ŋegerarikin. 7Ŋun lo sunyu ŋdyö nan kasu ŋerot anyen ’debba kulye kasu a pitönö i na kak, kweja adi anyen lwökuŋdyö ru na Ŋutu kasu jore.

8Nyenagon ’bayin a ta lo sunyuŋdyö nan ni, ama Ŋun lo sunyuŋdyö nan ni; a nye iŋge tiŋdu nan gwoso monye Paro, ko a duma lo mede nanyit liŋ, ko a kasaranit lo jur lo Ejipeto liŋ.

9 # Kon 7.14 Rumara ta ko baba yu, taki ta lepeŋ adi, Nan Yosepa ŋuro ilot lo kulya adi, Ŋun aje tiŋdu nan a duma lo jur lo Ejipeto liŋ; poŋdi köyö ni, an do ko karakin; 10a do mo si ’dani i jur lo Gosene, a do mo gwe köyö nyona, do se ko ŋwajik kulök, ko ŋwajik ti ŋwajik kulök, ko teŋon ti yidin kunök, ko ti kisuk kunök, se ko go liŋ na gwon ko do kine; 11a nan mo tunyeji do nyu, kogwon kiŋajin mukanat ti dyaŋ nyuŋ kata bot; an do se ko mede inot, ko go liŋ na gwon ko do kine ko wora a lomerika. 12Ta kulo aje met nan ko konyen kasu, luŋaser lio Benyamina Köti a met ko konyen kanyit adi nan lepeŋ lo jambu ko ta ko kutuk nio. 13Ta agu ködyö tutukökin baba bula nio liŋ i jur lo Ejipeto, ko ŋo liŋ lo met ta kilo. Nyena rume ta rum i joŋdya na baba ni. 14A nye kalapa kiŋdye luŋaser lonyit Benyamina kanyit i kido, a gwine gwien; a Benyamina gwine gwien kanyit i kido. 15A nye Köti kuddye swö ti luŋasirik kanyit liŋ, a gwine gwien kase loki, a i mukök na kine kulya, a luŋasirik kanyit kulo jambi ko lepeŋ.

16A nagon lore lo kine kulya aje yiŋa ko Paro midi, adi luŋasirik ti Yosepa aje ’durökin nu, a Paro se ko Ŋutu kanyit kakitak kulo lyöŋi lyöŋön. 17A Paro kulyani ko Yosepa adi, Taki luŋösurök adi, Koŋdi ta sona; sobbi ta tito kasu i toro ’bo kasu loki, ko yitöni ta bot i jur lo Kanana; 18ko joŋdi ta monye losu ko midijik kasu, ko poŋdi ta köyö ni, a nan mo tiŋdi ta kak na ’but na jur lo Ejipeto, a ta mo nyesi rit lo lo jur. 19Köti saraki lepeŋat adi, Koŋdi ta sona: ’dumuŋdye ta arabiajin lo jijikö ti jur lo Ejipeto anyen ta tu joŋdi lupudiet kasu ko wate kasu, ko joŋdi ta munyi, ko poŋdi ta ni.

20An ta ko yeyeju ta ŋo kasu, kogwon ŋo na ’but liŋ ti jur lo Ejipeto a kasu.

21A ŋwajik ti Yisaraele koŋdi sona; a Yosepa tiŋdi se arabiajin lo jijikö gwoso na saŋi Paro nu, a nye tiŋdi se kinyo jölit. 22A nye tiŋdi se liŋ geleŋ geleŋ boŋgwat leusesi; ama a nye tiŋdi Benyamina pödö nagon temuŋdya a sekelejin miajin musala, ko boŋgwat leusesi mukanat. 23A nye sunyukiŋdye monye lonyit kaineki mönikön puök lo sopa ko go liŋ na ’but ti Ejipeto, ko kaineki puök na sopa ko ’bolot, ko ambatajin se ko kinyo logon monye nyönyöun i kiko. 24Nyena a nye sonyoddi luŋasirik kanyit kulo, a na giöddi se nu, a nye saŋi se adi, Kunyar ta, an ta ko mörö ta ko ’börik i kiko.

25A se ŋiörö kaŋo i jur lo Ejipeto, a ’dure i jur lo Kanana ko Yakobo monye lose yu. 26A se nyönyökökiŋdye lepeŋ adi, Yosepa nyuŋ gwon jörun, a nye lu gwe a kasaranit lo jur lo Ejipeto liŋ. A töili lo Yakoboŋge ’dororo kak kogwon nye ti yuŋ kulya kase. 27Ama a se nyönyökökiŋdye lepeŋ kulyaesi liŋ ti Yosepa logon nye a kulyari ko se kulo, a nye ko meddi arabiajin lo jijikö logon Yosepa a sunyun i ’dokoddu na lepeŋ kulo nu, a töili lo Yakobo monye lose ŋau ŋaun; 28a Yisaraele kulyani adi, Aje jo; Yosepa ŋuro lio nyuŋ jörun; nan mo tutu i meddya na lepeŋ nagon nan a ko nyuŋ twan na.

Currently Selected:

Suluet 45: BBE

Highlight

Copy