Suluet 47

1Nyena a Yosepa iti tu, a takiŋdye Paro adi, Baba se ko luŋasirik kwe ko teŋon kase ti yidin ko ti kisuk ko ŋo liŋ na gwon ko se kune a po kaŋo i jur lo Kanana; mete, se kulu gwe i jur lo Gosene. 2A nye wuluŋdye Ŋutu mukanat i kiden na luŋasirik kanyit kulo, a kwekiŋdye se Paro.

3A Paro pipije kilo luŋasirik ti Yosepa adi, Kita nasu a nyo? A se waddi Paro adi, Yi kölipönök kulök a kayukuk gwoso kobaba. 4A se kulyani ko Paro adi, Yi kölipönök kulök a po i mönuŋdyö i lo jur; kogwon döru ’bayin logon teŋon kaŋ ti yidin nyönyö, kogwon dyaŋ gwe a loron parik i jur lo Kanana; nyenagon soŋinana yi mo ’yu do böŋö ruköki yi kölipönök kulok i si ’da i jur lo Gosene.

5A Paro kulyani ko Yosepa adi, Munyi se ko luŋösurök a po kasu ni.

6Jur lo Ejipeto lio maŋilo; tiŋdi munyi se ko luŋösurök i si ’da i kak na ’but na lo jur; ti se si ’dani i jur lo Gosene; a ko do a den Ŋutu lokoŋ kase kiden, tiŋdi se a kayukuk ti toro ’bo kwe.

7A Yosepa tolupödöi Yakobo monye lonyit, a tiŋdi lepeŋ i gwo ’dan ko Paro i komor, a Yakobo ’boroji Paro. 8A Paro pipije Yakobo adi, Do gwe ko kiŋajin muda? 9A Yakobo waddi Paro adi, Kiŋajin kwe logon nan a mönuŋdye i na kak kulo a kiŋajin mia geleŋ ko merya musala; kilo kiŋajin kwe ku ’dik ko a lorok, a tine töjowe ko kiŋajin lo mönuŋdye kobaba i na kak köju kulu. 10A Yakobo ’boroji Paro, a iti kaŋo ko Paro i komor. 11A Yosepa tiŋdi monye se ko luŋasirik kanyit i si ’da i jur lo Ejipeto i kak nagon a na ’but a lomore nase i jur lo Ramasese, gwoso na saŋi Paro nu. 12A Yosepa tunyeji monye se ko luŋasirik kanyit kulo, ko mede na monye liŋ gwoso i tojore na ŋwajik kase.

Yosepa meddya kitajin i kulya ti dyaŋ

13A kinyo gwe ’bayin i kak ’bukuluŋ; kogwon dyaŋ gwe a loron parik parik, nyena a Ŋutu ti jur lo Ejipeto ko ti jur lo Kanana doddi doddya kogwon kulya ti magor. 14A Yosepa tuŋdye gurut lio nagon a tugwörwe i ’bolot i jur lo Ejipeto ko i jur lo Kanana kune, a nye joŋdi kine gurut ko Paro kadi. 15A nagon gurut liŋ aje ’baka i jur lo Ejipeto ko i jur lo Kanana nu, a Ŋutu liŋ ti Ejipeto poŋdi ko Yosepa ni, a mo ’yi adi, Tiŋdi yi kinyo; kwe a nyo nagon yi twatwa ko magor konut i komor? Gurut kaŋ aje ’baka. 16A Yosepa waddi adi, Ko gurut kasu aje ’baka, tiŋdi ta toro ’bo kasu a togwoesi ti kinyo. 17A se joŋdi toro ’bo kase ko Yosepa ni, a nye korakiŋdye lepeŋat kinyo a togwoet lo kusanjin, ko lo teŋon ti yidin ko ti kisuk, ko lo kaineki: kweja adi i ŋilu ŋye a tiŋdu se kinyo a togwouŋdye toro ’bo kase liŋ. 18A ko ŋilu kiŋa aje tutuŋgö, a se poŋdi ko lepeŋ ni i kiŋa tomurek lonyit, a kulyani ko lepeŋ adi, Yi ti bulö muggö konut i komor pon duma likaŋ, adi gurut kaŋ liŋ aje ’baka; a teŋon liŋ ti toro ’bo kaŋ gwe a kunök ti duma likaŋ; a ŋo gwe ’bayin na pituŋdyö konut i komŋo do duma likaŋ, ama tuŋ yi ko mugunya kaŋ se ko kak jin kao na pituŋdyö. 19Kwe a nyo nagon yi se ko kak jin kaŋ kakaŋu konut i komor gwoso na? Gwöröddi yi ko kak jin kao kine kogwon kulya ti kinyo, nyena a yi mo gwe a ’dupi ti Paro a kak jin kaŋ mo gwe a ti lepeŋ. Tiŋdi yi nyomot anyen yi ruru a tine twatwa, an ŋina kak ko gwon a murwö.

20Nyena a Yosepa gwöruŋdye kak na Ejipeto ’bukuluŋ a na Paro; kogwon Ŋutu liŋ ti Ejipeto a gwörori meleseno kase, kogwon ŋilo dyaŋ gwe a loron parik kase. Nyena a kak gwe a na Paro. 21A ko gwe gwoso kulu Ŋutu, a nye tokitaji se a ’dupi suluja i lokökorit lo Ejipeto tojo ko ’dutet nanyit. 22Tuŋ a Yosepa tine gwöruŋdyö kak jin ti koanejin, kogwon koanejin wuwuju koret gwoso i koret nagon Paro a tikin se na; a se nyesi nu koret nase nagon Paro lo korakiŋdya se na, nyenagon a se tine tugwör meleseno kase.

23A kirut Yosepa kulyani ko kulu ŋutu adi, Mete ta, i lo lor nan a gwöruŋdyö ta ko kak jin kasu a ti Paro. Makulo nyomot kasu anyen ta ’yutukin kak. 24A mo gwe sona i diŋitan ŋeresi, a ta mo tiŋdi swöt geleŋ na mukanat a na Paro, a swötön Iŋwan ti mukanat gwe a kasu; a kilo mo gwe a nyomot logon ta ’yu ’yut ko a kinyo losu ko a lo midijik kasu, ko a kinyo lo lupudiet kasu. 25A se kulyani adi, Do aje lwöggu ru nikaŋ; ko do duma likaŋ met kine kulya a na ’but, a yi de gwe a ’dupi ti Paro. 26Nyena a Yosepa tiŋdi kine kulya i wuröki kak a saret i kulya ti jur lo Ejipeto, a yigu yiŋun tojo ko lo lor, adi Paro ködyö wuju swöt togeleŋ lo mukanat; tuŋ kak jin ti koanejin ka ’de nagon a ko tugwöröki Paro.

Yakobo a saŋu Yosepa a ’dutet

27A Yisaraele gwolore i jur lo Ejipeto i jur lo Gosene, a Ŋutu kanyitoge ryeju tukwörienjin kata, a se yuŋweni yuŋwe, a ŋdine ŋdi parik. 28A Yakobo gwolore i jur lo Ejipeto kiŋajin puök wot buryo; nyena a Yakobo iŋge gwolor ko kiŋajin mia geleŋ ko merya Iŋwan wot buryo.

29 # Sul 49.29-32; 50.6 A diŋit nagon twan na Yisaraele mimiju nyona nu, a nye luggi ŋuro lonyit Yosepa, a kulyani ko lepeŋ adi, Böŋö nan mo ’yu do, sukiŋdye könin ilot köyö i ŋeti, milyeju adi do mo konakiŋdya nan ’bura ko to ’diri. An do ko nugga nan ni Ejipeto, 30ama na dotori öpu nio gwoso merenyejin kwe nu, a do mo ’dokoddi nan kaŋo i Ejipeto, a tu nuŋge nan i pirit na nukari se nu. A nye waddi adi, A na ’but, nan mo kökon gwoso na kulyari do na.

31A monye kulyani adi, Nyöki nan milye; a nye milyekiŋdye lepeŋ milye. A Yisaraele dulakiŋdye mugun kak i kwe na dotoet.

Currently Selected:

Suluet 47: BBE

Highlight

Copy