Suluet 6

Ŋutu a toroŋdya parik

1 # Eyo 1.6; 2.1 A ko gwe sona nagon Ŋutu ajesuluja ŋdi i kak, a ŋwajik wate iŋge yuŋweki se nu, 2a ŋwajik ti Ŋun ko meddi adi ŋwajik ti Ŋutu a nakwe kwelen, a se yemakiŋdye ’börik wate gwoso na ’deggi se na. 3A MATAT kulyani adi. Mulökötyo lio mo ti si ’da ko Ŋutu i mugunya ŋupi, kogwon lepeŋat gwon ko mugunya na ’bu ’burön, ama lepeŋat mo gwolor ko kiŋajin mia geleŋ ko merya murek. 4#Ken 13.33 A i diŋit nagon ŋwajik ti Ŋun a mora ko ŋwajik wate ti Ŋutu a se iŋge yuŋwekiŋdyö lepeŋat ŋwajik nu, a Ŋutu lojo lo lilimba gwolore i kak suluja i nu diŋit. Lepeŋat a walan ti ’beron ko a Ŋutu lokukwön.

5 # Mat 24.37; Luk 17.26; 1 Pet 3.20 A MATAT ko meddi adi Ŋutu a toroŋdya parik i kak, a ŋo liŋ na yeye töilyet kase ko na kakatim se kune yeŋe gwon a narok tuŋ. 6MATAT iŋge delya kogwon nye a gwekiŋdya Ŋutu i kak, a kine kulya iŋge tomi töili lonyit. 7a MATAT kulyani adi, Nan mo seyara Ŋutu logon nan a gweyun i na kak kulo kaŋo; kweja adi, Ŋutu, ko toro ’bo, ko ŋo lo gwögwöŋtu kak se ko kwen ti ki; kogwon nan a delya i gweja niŋ na lepeŋat. 8Ama a Noa iŋge ryö ’busan ko MATAT i komor.Noa a teteŋdya ki ’bo

9 # 2 Pet 2.5 Kulo a nyakwariat ti Noa. Noa a ŋuto lo rigwo a gwe ’bak yuyuket i toberon nase; a Noa wöröni ko Ŋun. 10A Noa yuŋuŋdye ŋwajik musala, karin kase a ko Seme, ko Ama, ko Yapete.

11A kak iŋge körö ko Ŋun i komor, a kak iŋge jore ko ryaggu. 12a Ŋun meddi adi kak na aje körö, kogwon Ŋutu liŋ aje köŋu gwiliŋisi kase i na kak. 13A Ŋun kulyani ko Noa adi, ’Duddyö na Ŋutu lio a ’dur köyö i komor; kogwon kak na ajore köryaggu kogwon kulya kase; nyena mete, nan de tutukar se ko kak liŋ i pirit na geleŋ. 14Tetenakiŋdye mugun ki ’bo logon a kaden ti göper; nyena i ki ’bo lukata yu lolokote loloköt, a do woyöji lukata ko kaŋo ko meme. 15Nyena ti do teteŋdi lepeŋ sona; ti tojolan na ki ’bo gwe a lokiliŋan miajin musala, ti tugalaŋ nanyit gwe a lokiliŋan merya mukanat, ti tojolan nanyit ki gwe a lokiliŋan merya musala.

16A do mo tetenakiŋdye kwiliset i ki ’bo, a do mo tutupökiŋdye lepeŋ ki ko lokiliŋ geleŋ, a do tiŋdi kötumit na ki ’bo i merete lonyit; a do teteŋdi kadijik na ’du ’dulu, ko na kak, ko tomurek, ko tomusala. 17Mete, nan mo jojon bar i kak i tukaŋu na ŋo liŋ lo gwon jörun i na kak kulo; a ŋo liŋ lo gwon i na kak kulo mo tatuani tatua. 18Ama nan mo tetenakin do tomoret niŋ nagon gwo ’dan go; a do mo lupöni i ki ’bo, do se ko ŋwajik kulök, ko nara kwan inot, se ko wate ti ŋwajik kulök. 19A do mo joŋgi gweyarijin liŋ ti ŋo liŋ lo gwon jörun i ki ’bo kata, anyen do tiju se jörun ko do i pirit na geleŋ, kweja adi gweyarijin liŋ murek murek, mönik ko nakwan. 20a do mo joŋgi gweyarijin liŋ murek murek ti kwen, ko ti kijakwa, ko ti ŋo liŋ lo gwögwöŋu kak, a se mo iti konut pini anyen do tiju se jörun. 21Barakiŋdye mugun gweyarijin liŋ ti kinyojin, ko ’de ’yi se; a kilo mo gwe a kinyojin kulök ko a ti lepeŋat. 22#Eb 11.7 A Noa koŋdi ŋo liŋ gwoso na sarakiŋdye Ŋun nye nu.

Currently Selected:

Suluet 6: BBE

Highlight

Copy