Yoane 10
10
Lilim lo goro lo yidin
1’Diri ’diri nan takiŋdya ta adi, Ŋuto logon ti lupöri kötumit na goro lo yidin, ama a kije lukata i nene pirit lo, lepeŋ a kolanit ko a karyakanit;
2ama nye lo lupöri kötumit lo a kayukunit lo yidin. 3Katiyunit lo kötumit ŋaŋakin lepeŋ kötumit, a yidin yiŋge gworo lonyit; a nye luŋgi yidin kanyit kune ko karin, a nye meyaddi se kaŋo.
4A nagon lepeŋ aje meyuŋdya se liŋ kaŋo nu, a nye iti kase ŋerot, a yidin kebbi lepeŋ kogwon se deden gworo lonyit. 5A se tine kepoddu ŋuto logon a lepetyo, ama a se wöki wökön kaŋo ko lepeŋ kogwon se ti den gworolo ti ŋutu lepelok. 6Ŋilo lilim Yesu aje jamakin lepeŋat, ama a se tine kurun ŋo nagon lepeŋ jamakin se kune.
Yesu a kayukunit lo ’but
7Nyena a Yesu köti jamakiŋdye lepeŋat adi, ’Diri ’diri nan takiŋdya ta adi, Nan a kötumit na yidin. 8ŋutu liŋ lo po köyö ŋerot köju kulu a kolak ko a karyakak, ama a yidin gwe a ko yiŋ se. 9Nan a kötumit; ko lele ŋuto lupöri köyö ni a lepeŋ mo lwököni lwökö, lepeŋ mo lulupö lukata ko tutu kaŋo a mo ryeji pirit nyeŋ. 10Kolanit po tuŋ i koko ’ya, ko i tatuja, ko i tukaŋu. Nan aje po anyen lepeŋat böŋö gwon ko ru, ko anyen wuju abur. 11Nan a kayukunit lo ’but. Kayukunit lo ’but pakiŋdya ru nanyit kogwon yidin kanyit. 12ŋuto lo gwogwöröki i kita, logon ’bayin a monye yidin a yidin tine gwon a kanyit lo, ko meddi lujinte i po, a nye kö ’yi yidin kune, a wöki wökön, a kirut lujinte jekaddi nene a torekiŋdye se. 13A ŋuto lo wöki wökön kogwon lepeŋ gwögworöki i kita a tine yeye yidin kune. 14#Mat 11.27; Luk 10.22Nan a kayukunit lo ’but; nan deden yidin kwe, a yidin kwe deŋdi nan, 15gwoso nagon Baba deden nan na, nan deden Baba; a nan pakiŋdye ru nio kogwon yidin. 16Kunie yidin kwe kata nagon ’bayin a ti lo goro. Nan ködyö jojon se köti, a se mo yiŋge gworo liŋ, a se mo gwe a teŋ geleŋ ko kayukunit geleŋ. 17Baba nyanyar nan kogwon nan pakiŋdya ru nio anyen nan böŋö nyökuŋdyö nye. 18Lele ŋuto ’bayin lo ’dumaddu ru nio köyö, ama nan pakiŋdya ru nio gwoso nagon nan a wakun. Nan gwon ko kido nagon nan paji ru nio, a köti gwe ko kido anyen nyökuŋdyö nye. Ŋina a ŋo nagon Baba aje sarakin nan i koŋdya.
19Köti a Yudayaki koŋi koŋa kogwon kilo kulyaesi lo jam nye kilo.
20A jore kase kulyani adi, Lepeŋ ko mulökötyo loron, lepeŋ a mamala. Nyo ta yiyiŋ lepeŋ? 21Ama a kulye kulyani adi, Ŋuto lo gwon ko mulökötyo loron ti bulö jambu gwoso ŋilo. Mulökötyo loron ŋona bubulö ŋaju konyen ti ŋutu logon a mo ’dokeno?
Yudayaki a renya Yesu
22A i ŋinu diŋit a rorwe Yaŋanet iŋge kona Yerusalema. I nu diŋit kak lilik, 23a Yesu wöröni i Kadi na ŋun kata ko Solomona i baraŋöa. 24a Yudayaki dumökiŋdye lepeŋ kiden, a pije lepeŋ adi, Diŋit ŋornan nagon do möggi yi? Taki yi köke ko do a Masia.
25A Yesu waddi lepeŋat adi, Nan aje takin ta, ama a ta tine yubbö. Kitajin nagon nan kökon i karin ti Baba kune se na tökoŋu kulya kwe; 26ama a ta gwe a ko yuŋ kogwon ta ’bayin a yidin ti teŋ nio. 27Yidin kwe yiyiŋ gworo liŋ; nan deden se a se kebbi nan. 28a nan tiŋdi se ru na yeŋ nyin, a se tine twatwa kwöŋ; a lele ŋuto gwe ’bayin lo jekaddu se köyö i könin. 29Baba lo tiŋdu nan se lo a duma lwölwöŋ ŋo liŋ, a lele ŋuto gwe ’bayin lo jekaddu se ko Baba i könin.
30Yi ko Baba a ŋo geleŋ.
31A Yudayaki köti ’du ’dumbe ŋurupö anyen gumbe lepeŋ. 32a Yesu kulyani ko lepeŋat adi, Nan a kwekiŋdya ta kitajin jore na ’but nagon po ko Baba, ta gumba nan kogwon nan nase?
33 #
Lew 24.16
A Yudayaki waddi lepeŋ adi, Yi ti gumba do kogwon nene ŋo na ’but nagon do a kon, ama yi gumba do kogwon do a lauŋdya Ŋun; kweja adi do logon a ŋuto kana kon mugun a Ŋun.
34 #
Sau 82.6
A Yesu pije lepeŋat adi, A wurö kasu i Saresi adi, Ŋun lo kulya adi, Ta a ŋunyen. Ti gwon sona le? 35Ŋun luŋgu se a ŋunyen logon kulyaet lonyit a jamaki se kulo, a kulya kanyit na wurö kune tine yoŋaki a swöt. 36Nyena ko nyo ta kulya ko nan logon Ŋun Monye a gelun a iŋge sunyun i na kak lo, adi nan lauŋdya Ŋun kogwon nan a kulya adi nan a Ŋuro lo Ŋun? 37Nyena ko nan ti koŋdya kitajin ti Baba an ta ko yuŋ ta nan; 38ama ko nan kökon se, ma ’di ködyö ta ti yuŋ nan yubbe ta kitajin na kon nan kune, anyen ta ködyö gwugwulu ko deden adi Baba gwon ko nan, a nan gwe ko Baba i mugun. 39Köti a se ga ’yi morga lepeŋ; ama a nye iŋge pesaddu kaŋo kase i könisi.
40 #
Yoa 1.28
A nye köti yitöni i nu pele na Yardene, i pirit nagon Yöaŋe koju babatiddye nu. A nye mönuŋdye nyu, 41a ŋutu jore iŋge tu ko lepeŋ nyu. A se kulyani adi, Yoane ’diri a ko koŋdya kweyesi. ama ŋo liŋ nagon lepeŋ a kulyari i kulya ti lo ŋuto kune a gwak. 42a ŋutu jore iŋge yubbö lepeŋ nyu.
Currently Selected:
Yoane 10: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
