Luka 10
10
Yesu a soŋdu ŋutu merya buryo wot murek i tokuoddu
1A mukök na nina, a MATAT wuluŋdye kulye nutu merya buryo wot murek, a sonyoddi lepeŋat murek murek kanyit nerot i köjinö liŋ ko i piritön liŋ nagon lepeŋ ko mugun nanyit ’de ’dekan tu kata kunu. 2#Mat 9.37, 38A nye kulyani ko se adi, Kinyojin aje yone parik, ama kaŋerak ku ’dik. Nyena mo ’yi ta Monye melesen anyen soŋdu kulye kanerak kanyit i melesen. 3#Mat 10.16iti ta; nan nilo soŋdu ta gwoso yisi i kiden na lujin. 4An ta ko jonga ta likitiat ti gurut, kode jurakan, kode kamuka; an ta ko roman ta ko nutu i kiko. 5A ko ta a lupo i nan kadi, a kokwe kulyani ta adi, Ti taliŋ gwe i na kadi. 6a ko ŋuto lo taliŋ gwon nyu a taliŋ nasu mo poki ko lepeŋ, ama ko ’bayin, a nina taliŋ mo yitwene bot kasu ni.
7 #
1 Kor 9.14; 1 Tim 5.18 Si ’dani ta i nina kadi, nyesi ta ko möji ta po nagon a tiki ta kune, kogwon kakitanit ködyö roröpaki kita nanyit. An ta ko wöröji abur i midijik. 8A ko ta a lupö i nan köji a nutu wuji ta, nyesi ta no nagon se a tikin kasu i komor kune. 9Toke ’yi ta nutu lo gilö lo gwon nyu; kulyani ta ko lepeŋat adi, Ŋun aje yepuŋdya kasu ni i tumatyan. 10#Kon 13.51A ko ta a lupö köji a nutu tine wu ta, iti ta i kikolin ti ŋina köji, ko kulyani ta adi, 11#Mat 10.7-14; Mar 6.8-11; Luk 9.3-5Kune kujöŋ ti köji nasu nagon yi a ryoryok kune yi a nanaara kaŋo anyen wi ’ya ta, ama dene ta den adi Ŋun aje yepuŋdya i tumatyan. 12#Sul 19.24-28; Mat 11.24; Mat 10.15Nan takiŋdya ta adi, i lor ’duŋet, kulya ti Sodoma mo ’duŋöki pölilyö lwölwöŋ ’duŋöki na na köji.
Köjinö nagon ŋutu kase ti ’bön yubbö Yesu
(Köti Matayo 11.20-24)
13 #
Yis 23.1-18; Ejk 26.1—28.26; Yoe 3.4-8; Amo 1.9, 10; Jak 9.2-4 Wöidiö Korajina! Wöidiö Betesaida! ko ködyö kitajin sörösi nagon a kona kasu kiden kune ködyö a kona Turo se ko Sidona a ŋutu kase ködyö aje ’beron löpuggö töilyet, a si ’dani i delya a jupu boŋgwat terekesi ko a we ’ya ’börik ko kurök. 14Ama kulya ti Turo se ko Sidona mo ’duŋöki putet pölilyö lwölwöŋ ’duŋöki nasu. 15#Yis 14.13-15Ama do Kaperanauma, do yeyeju adi do ŋona mo totodumala tojo i ’diko le? ’Bayin, ama do mo jojoŋa kak i pirit na mulökö.
16 #
Mat 10.40; Mar 9.37; Luk 9.48; Yoa 13.20 Ŋuto lo yiŋga ta lo yiŋga nan; nye lo renya ta lo renya nan; a ko ŋa lo renya nan lepeŋ renya nye lo sunyuŋdyö nan lo.
Yitwe na ŋutu merya buryo wot murek lo sonyo kulo
17A ŋutu merya buryo wot murek kulo yitwene bot ko lyöŋön, a kulyani adi, MATAT, koyi a ’diŋdya karin kunök a ma ’di mulökö lorok twöji yi. 18A nye waddi se adi, Nan a met Satani a gube kak ki yu adi wulek gwoso meme ’dekta na ki. 19#Sau 91.13Mete ta, nan aje tikin ta kido anyen ryoggi munuö ko kitoni, ko anyen te ’ya riŋit ’bukuluŋ na miriku, a nene ŋo gwe ’bayin na böŋöddu ta. 20Ama an ta ko lyöŋön ta kogwon mulökö twötwö ta, ama lyöŋi ta kogwon karin kasu aje wurö ki yu.
Yesu a jore ko lögön
(Köti Matayo 11.25-27; 13.16-17)
21A i nu diŋit gwak a Yesu iŋge jore ko lyöŋön kogwon Mulökötyo Loke, a nye kulyani adi, Tinate pon Baba, MATAT lo ki ko lo kak, kogwon do aje ’de ’ya kine kulya i ŋutu lokoŋ ko i ŋutu lo kukurun kulya, a do iŋge kwekin se i lupudiet. Iŋkoi, Baba, do aje koŋdya sona kogwon meta a na ’but konut. 22#Yoa 3.35; Yoa 10.15Baba aje ’burukin nan ŋo liŋ; lele ŋuto a ko den ko nan Ŋuro a ŋa ama Baba ka ’de lo deŋdya, köti ŋuto a ko den ko Baba a ŋa, ama nan Ŋuro ka ’de lo deŋdya, se ko ŋutu logon nan ŋuro a wakun kwekiŋdya se Baba.
23A Yesu löŋuköjine ko ŋutu kanyit kajujumuk yu, a takiŋdye lepeŋat a lwön adi, Ŋutu logon a met ŋo nagon ta a met kune a kalyöŋök. 24Nan takiŋdya ta adi, nebijin jore se ko moran jore ’de ’dekan meddya ŋo na met ta kune, ama lepeŋat ti met se, a se ’deke yiŋga ŋo nagon ta a yiŋ kune ama a se tine yiŋ se.
Lilim lo Samariatyo lo ’but
25 #
Mat 22.35-40; Mar 12.28-34 Mete, a bodo lo Saresi ti Mose ŋine ki a ’deke möŋu lepeŋ pija adi, Katodinönit, nan koŋdya nyo anyen wuju ru na yeŋ nyin? 26A Yesu waddi pija lepeŋ adi, Ŋo a nyo nagon a wuröki i Saresi? Do a kenuŋdya nyo kata?
27 #
Nyö 6.5;
Lew 19.18
A ŋuto lo waddi adi, A wurö adi, Do ködyö nyanyar MATAT Ŋun ilot ko töili ilot liŋ, ko ködudwö inot liŋ, ko riŋit inot liŋ se ko yeyeesi kunök liŋ; köti adi, Do ködyö nyanyar marate ilot gwoso mugun inot. 28#Lew 18.5A Yesu kulyani ko lepeŋ adi, Do aje ruggö ’bura, kone kon kine ŋo a do mo gwe jörun.
29Ama a nye ’deke to ’buddya mugun, a nye pije Yesu adi, Ŋa logon a marate liŋ? 30A Yesu waddi adi, Lele ŋuto lururun Yerusalema tu Yeriko, a nye ’dorone ko karyakak i könisi, a se ryakuŋdye boŋgwat kanyit kune kaŋo a ’biddye lepeŋ, a se iti tu a kolokiŋdye lepeŋ gwe nyona ko twan. 31A gwe sona a lele koane tiri ŋilu kiko, a na meddi lepeŋ ŋilo ŋuto nu, a nye giraddi swöt. 32Köti jojo a Lewityo lo ’dure i ŋinu pirit, a na meddi lepeŋ ŋilo ŋuto nu, a nye giraddi swot. 33#2 Dek 28.15Ama a Samariatyo na jolöri nye nu ’dure i pirit nagon nye gwon kata nu, a na meddi nye ŋilo ŋuto nu, a nye wone konyen ko lepeŋ. 34a nye iti ko lepeŋ yu, a nye ’bukokiŋdye welet ko binyo i ’dikasin a doggi ko rubatan. A nye ’dukukiŋdye lepeŋ kanyit i kaine loki, a joŋgi lepeŋ i kadi na kömu, a meddi lepeŋ ’bura. 35a kotumalu a nye ’dumuŋdye podojin murek a tiŋdi monye kadi, a kulyani adi, Mete met lepeŋ ’bura, ko do a ’yalakiŋdya kunie a nan mo ropakiŋdye do ko nan a yitwe. 36Nyena, do yeyeju i kilo ŋutu musala lon lose logon a temakiŋdya a marate lo ŋuto logon a ’doro ko karyakak i könisi lo? 37A nye waddi adi, Ŋilo logon a won konyen ko lepeŋ lo. A Yesu kulyani ko lepeŋ adi, Iti, koŋdi sona koti.
Yesu a ’yö ’yu Marata se ko Maria
38 #
Yoa 11.1
A na jölöri Yesu se ko ŋutu kanyit kajujumuk nu, a nye ’dure i lele tur, a nene ŋuto na luŋu a Marata wuyuŋdye lepeŋ kanyit mede. 39a nye gwe ko kiaser na luŋu a Maria, nagon a si ’da ko Yesu i mokosi i yiŋga na kulyaesi logon lepeŋ jajam kulo. 40Ama a Marata taŋgi mugun ko kitajin jore; nyena a nye poŋdi ko Yesu ni, a pije lepeŋ adi, MATAT, do ti yeyeju adi kiaser nio aje kolökin nan i kita geleŋ le? Böŋö taki nye anyen po i parakiŋdya na nan.
41Ama a MATAT waddi adi, Marata, Marata, do wiwinya ko dedelya i kulya ti ŋo jore. 42Ŋo geleŋ na ’dekarikin tuŋ. Maria aje wuluŋdyö swöt lo ’but logon mo ti ’dumaji kaŋo kanyit kwöŋ.
Currently Selected:
Luka 10: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
