Marako 8
8
Yesu a tunyeju ŋutu alipan iŋwan
(Köti Matayo 15.32-39)
1A i kilu perok i diŋit nagon ŋutu jore parik köti aje momoruŋdya i pirit na geleŋ nu, a se gwe ’bak ŋo lo nyenyei. A Yesu lupundye ŋutu kanyit logon a kajujumuk kulo kanyit ni, a kulyani ko lepeŋat adi, 2Konyen kwe wowon lodir lo ŋutu, kogwon yi aje si ’da i pirit na geleŋ ko perok musala, ŋo lo nyenyei gwe ’bayin; 3a ko nan a son lepeŋat kase i midijik ko magor, a se mo dosakiŋdye i kiko; kulye kase po pajo. 4A ŋutu kanyit kajujumuk kulo pije lepeŋ adi, Kinyo bubulö rye ya ni i yobu anyen tunyörikin kulo ŋutu? 5A nye pije lepeŋat adi, Ta gwon ko ambatajin muda? A se waddi adi, Yi gwon ko ambatajin buryo. 6A nye saŋi lodir lo ŋutu anyen si ’da kak; a kirut nye ’dumuŋdye ambatajin buryo kune, a tiŋdi Ŋun tinate, a nye pipiŋdye pipiŋdya, a tiŋdi ŋutu kanyit kajujumuk kulo, anyen tikin ko ŋutu i komor; a lepeŋat koŋdi sona. 7A se köti gwe ko somot ku ’dik nagon a na ’di ’dik, a nagon Yesu aje ’boroja kine somot nu, a nye saŋi adi, ti kine somot köti tikine ko ŋutu i komor.
8A se nyesi nyesu a iŋge yimönö. A lepeŋat iŋge ’du ’dumun kupöjin dumalak buryo ti ambatajin na pipinya na pituŋdyö nagon a ko nyei. 9A ŋutu gwe gwoso alipan iŋwan. 10A nye torekiŋdye lepeŋat, a ’de ’de nye se ko ŋutu kanyit logon a kajujumuk kulo kiyaddi i ki ’bo lukata, a iti i jur lo Dalamanuta.
Ŋutu ’dek meddya kweyet
(Köti Matayo 16.1-4; Luka 12.54-56)
11 #
Mat 12.38; Luk 11.16 A Parusijin poŋdi po a suluje rerenya ko Yesu, ’dekan lepeŋ kwekindya se kweyet na po ki, kogwon se ga ’yu temba lepeŋ. 12#Mat 12.39; Luk 11.29A nye ’duani ’dua parik kanyit i töili, a pije adi, Ko nyo ŋutu ti na toberon ga ’yu kweyet? ’Diri ’diri nan takiŋdya ta adi, ŋutu ti na toberon mo ti kweki kweyet. 13A nye kölökiŋdye lepeŋat nyu, a kije i ki ’bo kata, a nye laŋaddi i nu pele na tör na Galilaya.
Kape ti Parusijin se ko ti Erode
(Köti Matayo 16.5-12)
14Nyena a ŋutu kanyit logon a kajujumuk kulo iŋge böŋö i joŋga na ambatajin, a se gwe ko ambata geleŋ tuŋ i ki ’bo kata. 15#Luk 12.1A nye poki i kukuju na lepeŋat adi, Kunyar ta, meddi ta ’bura kogwon kape ti Parusijin ko ti Erode. 16A se tokulyaki ko ’börik adi, Lepeŋ a jambu kine kulya kogwon yi ’bak ambatajin. 17A Yesu iŋge den ŋo na jam se kune, a pije lepeŋat adi, Ko nyo ta tokulyakin ko ’börik adi, Yi ’bak ambatajin? Ta a ko nyuŋ gwulu kode kuruŋdyö kine kulya le? Toilyet kasu nyuŋ a iŋgo le? 18#Yer 5.21; Ejk 12.2; Mar 4.12Ta gwon ko konyen, ama a ta tine meddya le? Ta gwon ko swo, ama a ta tine yiŋga le? Ta ŋona aje böŋö le? 19I diŋit na pipiŋdye nan ambatajin mukanat a ti ŋutu alipan mukanat nu, kupöjin muda logon a jore ko ambatajin na pipinya nagon ta a ’du ’dumun? A se waddi adi, Kupöjin puök wot murek.
20Koti, i diŋit nagon nan a pipiŋdya ambatajin buryo a ti ŋutu alipan iŋwan nu, kupöjin dumalak muda logon a jore ko ambatajin na pipinya nagon ta a ’du ’dumun? A se waddi adi, Kupöjin dumalak buryo. 21A nye pije lepeŋat adi, Ta nyuŋ a ko kurun kine kulya le?
Yesu a toke ’ya ŋuto mo ’doke Betesaida yu
22A se ’dure Betesaida, a kulye ŋutu joŋdi ŋuto logon a mo ’doke ko Yesu ni, a se mamaŋdi Yesu anyen ’bo ’yu lepeŋ. 23a nye morgi ŋuto mo ’doke lo i konin, a nyomöddi lepeŋ kaŋo i tur; a nagon nye aje yakakiŋdya kamulak ko ŋilo ŋuto i konyen, a sopakiŋdye könisi kanyit ko lepeŋ ki nu, a nye pije lepeŋ adi. Do ŋona memet nene ŋo? 24a ŋuto lo ’bi ’yi konyen ki a meddi meddya, a waddi adi, Nan memet ŋutu ama meta gwoso kaden lo wörö. 25a Yesu köti sopakiŋdye könisi kanyit ko ŋilo ŋuto i konyen, a ŋuto lo diŋe go, a iŋge tokela, a nye mete met ŋo liŋ ’bura.
26A Yesu soŋdi lepeŋ mede, a takiŋdye lepeŋ adi, An do ko girara i tur.
Petero a tuggö adi Yesu a Masia
(Köti Matayo 16.13-20; Luka 9.18-21)
27A Yesu se ko ŋutu kanyit kajujumuk kulo Iwoŋöddi i turön ti Kaisaria Pilipo. A i kiko a nye pije ŋutu kanyit kajujumuk kulo adi, ŋutu jambu adi nan a ŋa? 28#Mar 6.14, 15; Luk 9.7, 8a se waddi lepeŋ adi, Kulye ŋutu kulya adi, do a Yoane Kabatisanit, kulye adi, do a Eliya, kulye adi, do a lele lo nebijin. 29#Yoa 6.68, 69a nye köti pije lepeŋat adi, Ama ta ko ’börik kulya adi nan a ŋa? A Petero waddi lepeŋ adi, Do a Masia logon Ŋun a sunyun lo. 30a nye kukuji lepeŋat adi, An ta tukokin lele ŋuto kulya kwe.
Yesu a jambu kulya ti tatua nanyit
(Köti Matayo 16.21-28; Luka 9.22-27)
31A Yesu suluje todiŋdyö lepeŋat adi, Nan Ŋuro lo ŋuto ködyö ŋoŋga ŋo jore, a ŋutu temejik ko koanejin temejik se ko katodinök ti Saresi ti Mose mo renyani nan, a mo tatuje nan, a i perok musala a nan mo ŋine ŋien i twan. 32A nye jambi kine kulya köke a ko muk, a Petero joŋgi lepeŋ a swöt, a suluje ririŋga lepeŋ. 33Ama a Yesu wöriŋoni wöriŋo, a meddi ŋutu kanyit kajujumuk kulo, a nye riŋge Petero adi, Iŋgo Satani! Koloki nan. Kogwon do ti yeyeju gwoso na yeyeji Ŋun na, ama do yeyeju gwoso na yeyeji ŋutu na.
34 #
Mat 10.38; Luk 14.27 A nye lupundye lodir lo ŋutu se ko ŋutu kanyit kajujumuk kulo kanyit ni, a takiŋdye lepeŋat adi, Ko ŋuto logon ’de ’dekan gwon a kakeponit lio, a ti nye paji mugun, ko ti nye ’dumuŋdye ködini nanyit na görö a kepoddi nan.
35 #
Mat 10.39; Luk 17.33; Yoa 12.25 Kogwon ko ŋuto logon ’dek lwöggu ru nanyit a ŋilo ŋuto mo tolikiŋdye ru nanyit, ama ŋuto logon tolikiŋdyö ru nanyit kogwon kulya kwe se ko ti Loŋe Lo ’but lo, a nye mo lwöggi ru nanyit. 36Kogwon ’bulit a nyo i ŋuto logon a ryeju ŋo liŋ ti kak a kanyit a tolikiŋdye ru nanyit gwak? 37ŋuto kodyö tiŋdu nyo anyen dakuŋdya ru nanyit? 38Kogwon ko ŋuto logon kwe nanyit yuyu i kulya kwe, se ko i todinesi kwe i na toberon na ŋutu logon a paju Ŋun ko a lorok kulo, a kwe nio na Ŋuro lo ŋuto köti mo yune yu i kulya kanyit, na poŋdi nan ko malaikajin loke i pirit na geleŋ i minyo lo Baba nu.
Currently Selected:
Marako 8: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
