Otum 3
3
Moa a shaŋ abuŋadga
1Ondakyeŋ nga Ebitru ta la Eyohana moa gre Anyuŋ-akulu omba amgbaŋ atra ba olulum okyku o fa olu. 2Ayizhẽ Anyuŋ-akulu moa a bzi lo ma Ayizhẽ Adzadzi, moa a shri alomakyeŋ baŋ a buŋ adga omba moa a mbre ŋa, a zga ma. Moa a la a shri ŋa a yi a zga ayizhẽ he lo elulum okyku o daŋ a vẽ amgbaŋ ta la moa la a yi olu. 3Omba ba alom lo a ka Ebitru ta la Eyohana a yi olu nga, a vẽ mo okyku o da mo a shri emakyeŋ a daŋ. 4Moa a ka ŋa dzo, nga Ebitru a nyuŋ ŋa a lu mi le, Aŋo o ka gi! 5Alom he lo nga a zhiŋ ayi a ka mo, a la a ka ma moa a shri emakyeŋ a shri a daŋ. 6Ebitru a nyuŋ ŋa a lu mi le, Ame e wo amgbaŋ ma mbo, ambo ame e shri ekplo ame e wo alo ma e shri e doŋ. Eshko Eyesu ba Anazarata, ame e lu e doŋ, aŋo o kso! 7Nga Ebitru a kom ŋa obgori nga a daŋ a kso. Nga adga alom lo ta la ekplu adga baŋ e ndba nga a hwiŋ oshye. 8A kso nga a ta egba, nga a la a dzi a ta okro lo a kpaŋ. Nga a gre olu pa la mo nga a la a dzi a la a ta egba, nga a la a hlu Ahogbrẽ eshko. 9Eshki mvye e ka ŋa baŋ a la a dzi nga a la a hlu Ahogbrẽ eshko. 10Omba ba moa a ka ŋa a tspi baŋ angyiŋ a wo agrogro la a la a dzu Ayizhẽ Adzadzi a la a vẽ amgbaŋ, moare mvye a ka egbregbre ekplo la e kpo.
Ebitru a nyum oshpa Anyuŋ-akulu
11Omba ba alom lo a lu Ebitru ta la Eyohana ma la ovyevye a gre enjygu moa a bzi lo ma Enjygu ba Osolomo, moare mvye a knye a lu mo ma a gre lo. 12Omba ba Ebitru a ka eka he nga, a nyuŋ eshki a lu mi le, Agimi arehwĩ ba Esrayila, okyku eshi agimi e da ekplo he lo e dzu egbregbre ka la gimi nga e la e ka gi dzo? Eka bimi e ka, la ekʼpo bi o mbo okyku bi e wo moarehwi ba Ahogbrẽ angyiŋ agi e da alom hi a dzi? 13Ahogbrẽ ba Ebrahim, ta la Eshaku, ta la Eyakubu, Ahogbrẽ moadigi angyiŋ a shri ekʼpo baŋ a shri a da Eyesu Anwye-odne baŋ. Agimi e yga ŋa e shri e da moandakʼpo, nga agimi e tla ŋa egi ayi ba Ebilatu omba ba Ebilatu a klo o kyu ŋa abgo. 14Eyesu a wo esesla, nga a raŋ odlo a gre eshri, ambo agimi e tla ŋa, nga agimi e vẽ Ebilatu a daŋ a kyu are la a kpo ebga angyiŋ abgo o sku Eyesu. 15Okyku eka he, agimi e bga Are la a la a kpo eso. Ambo Ahogbrẽ a kso ŋa ongybi, agi nga e wo egŋe okyku ohe lo. 16Ekʼpo ba eshko Eyesu angyiŋ e shri oshye e da alom he lo. Ekplo bimi e ka, nga e yi, e kpo okyku obmi ba adlidzi eshko baŋ. Okyku obmi ba adlidzi ta la Eyesu angyiŋ, alom he lo a shaŋ egi ayi bimi.
17Agimi anáŋ, ame e yi ekplo bimi pa la moandakʼpo bimi e kpo Eyesu, agimi e kpo lo efĩ angyiŋ. 18Ogbyigbyi, moarehwi ba Ahogbrẽ a hom otum a lu mi ma Emisiya á kpo ewu. Ahogbrẽ nga a bli odlo lo. 19Agimi e ghwo obiŋ nga e ba egi ayi Ahogbrẽ, okyku o daŋ a kyu gimi abgo odlobi bimi, 20okyku o da gimi e hwiŋ oshye ba eso okro ba Adigi-odne, nga okyku o daŋ a hom Eyesu otum okro bimi, aŋa angyiŋ a wo Emisiya baŋ a sheŋ a sla okyku gimi bgu. 21O dzu omgbybi baŋ a dzu Ongyeŋ ayga o tsa baŋ a nyiŋ ekployaŋ a mbo, eka ba Ahogbrẽ a lu a da moarehwi baŋ a hom otum ogbyigbyi. 22Omusa a lu mi le, Adigi Ahogbrẽ á hom arehwĩ otum okro bimi eka baŋ a hom me, aŋa á wo a ba ogu bimi. O raŋ o gre bimi e ngli atuŋ e gno ekployaŋ a mbo baŋ a lu a da gimi. 23Areyaŋ a mbo la a ngli a gno ekplo baŋ a lu mbo le, moa á se mo a sku eshki moarehwi ba Ahogbrẽ nga á jygi mo. 24Eshki moarehwi ba Ahogbrẽ a hom otum, Asamuyila pa la moa la a ba ambla baŋ, moa mvye la a shri oshpa ba ayakplo la a ba a kpo omba he, a shri a ba. 25Ohwihwim ba Ahogbrẽ a hwim pa la moarehwi baŋ a hom otum okro bimi, o wo okyku gimi angyiŋ. Agimi e hwiŋ owlama okyku ohwihwim ba Ahogbrẽ a hwim pa la moadigimi. Aŋa a hwim ta la Ebrahim a lu mi le, Okro moanwye boŋ ame é da moarehwi obiŋ hi mvye á hwiŋ owlama. 26Okyku eka he, Ahogbrẽ a sla gimi nga a da Anwye baŋ a ba okro bimi ori, okyku o da gimi e kyu ayakplobi abgo nga e hwiŋ owlama baŋ.
Currently Selected:
Otum 3: EGONT74
Highlight
Share
Copy
Want to have your highlights saved across all your devices? Sign up or sign in
Eggon New Testament © United Bible Societies, 1974. Bible Society of Nigeria
