Eyohana 17
17
Eyesu a fa olu okyku moanwyeotum baŋ
1Ambla ba Eyesu a lu odlo eka he a khwo nga, a ka Ongyeŋ nga a lu mi le, Ada, omba lo o bli bgu. O shri Ohlueshko o da Anwye boŋ, okyku o da Anwye a mbo a shri Ohlueshko a doŋ. 2Okyku eshi aŋo angyiŋ o shri ekʼpo o daŋ eshri moarehwi pyeŋ, okyku o daŋ a shri eso ba gbagbuamo a shri a da moarehwi boŋ o shri o daŋ. 3Eso ba gbagbu-amo angyiŋ e wo okyku o da moarehwi a yi boŋ angyiŋ la o wo Ahogbrẽ ba adlidzi akyakyeŋ, nga okyku o da mo a yi Eyesu Ekristi are boŋ o hom ŋa otum. 4Ame e tsa obiŋ hi ayimom esesla boŋ, nga ame e kpo otum boŋ o shri o da me e khwo. 5Ada! O shri ayimom ba esesla o shri o da me eyayi boŋ ohuhuhi. Ayimom ba esesla he lo angyiŋ ame e wo la alo ma ka la ŋo ayga moa a kpo obiŋ hi.
6Ame e da moare boŋ o shri o da me obiŋ hi a yi ŋo. Moa a wo a boŋ, nga aŋo angyiŋ o shri mo o da me. Moa a bmi ta la odlo boŋ. 7Nga ohuhuhi moa a ka a bmye ba aŋo o shri ekployaŋ a mbo ba ame e wo la alo ma o shri o da me. 8Okyku eshi ame e shri odlo boŋ o shri o da me e shri e da mo, nga moa a yga lo. Moa a bmi ba adlidzi ba ame e zgi okro boŋ angyiŋ e ba, nga moa a bmi ba adlidzi ba aŋo angyiŋ o hom me otum.
9Ame e fa olu okyku mo. Ame e fa olu okyku obiŋ hi angyiŋ mbo, ambo ame e fa olu okyku moarehwi boŋ o shri o da me okyku eshi moa a wo moarehwi boŋ angyiŋ. 10Ekployaŋ a mbo la e wo e me, e wo e boŋ angyiŋ. Nga ekployaŋ a mbo la e wo e boŋ, e wo e me angyiŋ. Nga moanwyeotum me angyiŋ a da moarehwi obiŋ hi a ka ayimom ba esesla me. 11O ka, ame é ba okro boŋ a mo. Ame é dzu obiŋ hi nga mbo, ambo moa á ra á dzu obiŋ hi. Ada ba esesla! O kpaŋ mo la ekʼpo ba eshko boŋ, eshko boŋ o shri o da me, okyku o da mo a dzu okyekyeŋ eka boŋ pa la me e wo okye-kyeŋ. 12Omba ba ame e wo pa la mo, ame e kpaŋ mo la ekʼpo eshko boŋ. Eshko he lo, aŋo o shri o da me. Ame e kpaŋ mo nga akyeŋ a mbo eshki mo a tpi ayi mbo, o wo le are ba o baŋ o sheŋ o wo baŋ a tpi ayi dne, okyku o da Odlo Ahogbrẽ o bli. 13Ohuhuhi ame e ba okro boŋ. Ame e lu odlo he obiŋ hi okyku o da mo a wo la ovye me eso mo, okyku o da mo a wo la alo ma nzenze. 14Ame e lu odlo boŋ e da mo, nga obiŋ hi o tla mo okyku eshi moa a wo a ba obiŋ hi angyiŋ mbo, eka ba ame a mbo e wo a ba obiŋ hi mbo. 15O ka, ame e klo boŋ o ngʼba mo o sku obiŋ hi angyiŋ mbo, ambo ame e klo boŋ o kpaŋ mo nga o ngʼba mo o sku abgo Areabi. 16Eka ba ame a mbo e wo a ba obiŋ hi mbo, moa a mbo a wo a ba obiŋ hi mbo. 17Aŋo o zhiŋ mo o da mo a dzu moarehwi boŋ ozhẽ ba adlidzi, okyku eshi odlo boŋ o wo adlidzi angyiŋ. 18Ame e hom mo otum obiŋ hi eka boŋ a mbo o hom me otum obiŋ hi. 19Okyku mo angyiŋ ame e shri eshri me e doŋ, okyku o da mo a mbo a zhiŋ a dzu moarehwi boŋ.
20Ame e fa olu okyku mo sha angyiŋ mbo, ambo ame e fa olu okyku moa la a bmi ba adlidzi pa la me okyku oshpa ba moa a nyum. 21Ame e fa olu okyku o da mo pyeŋ a dzu okyekyeŋ. Ada! O da mo a dzu eso bi eka boŋ o wo eso me, nga ba ame e wo eso boŋ, okyku o da obiŋ hi o bmi ba adlidzi boŋ angyiŋ o hom me otum. 22Ame e shri ekʼpo e shri e da mo. Ehi lo e wo edgu ekʼpo boŋ o shri o da me, okyku o da mo a dzu okyekyeŋ eka boŋ pa la me o wo okyekyeŋ. 23Ame e wo eso mo, nga aŋo o wo eso me, okyku o da mo a dzu okyekyeŋ, okyku o da obiŋ hi o yi boŋ angyiŋ o hom me otum, nga okyku o da mo a yi boŋ o klo mo eka boŋ o klo me.
24Ada! Aŋo o sheŋ o shri mo o da me bgu, okyku eka he ame e klo mo á dzu okro ba ame é dzu ma okyku o da mo a ka ayimom ba esesla me, ibu ayimom ba esesla boŋ o shri o da me okyku eshi aŋo o klo me ayga moa a kpo obiŋ hi. 25Ada ba odlodzi! Obiŋ hi o yi ŋo mbo, ambo ame e yi ŋo, nga moahi a yi boŋ angyiŋ o hom me otum. 26Ame e da mo a yi ŋo. Ame e kpo eka he lo e yi-yi e yi, okyku o da oklo boŋ o wo la alo ma okyku me o dzu eso mo, nga okyku o da me e dzu eso mo.
Currently Selected:
Eyohana 17: EGONT74
Highlight
Share
Copy
Want to have your highlights saved across all your devices? Sign up or sign in
Eggon New Testament © United Bible Societies, 1974. Bible Society of Nigeria
