Eyohana 19

1Ambla he nga Ebilatu a da mo a bga Eyesu andzu. 2Moanwyeakyuŋ a ngybi azhli ba ezga a shri a zga ŋa eshri. Nga moa a ygi ŋa ariga la a wo abme mlemle. 3Nga moa a kye a ba okro baŋ nga moa a nyuŋ ŋa a lu mi le, Aŋo Anyuŋ-areŋ moaEyahuda, o ri edzi obiŋ hi! Moa a gre nga moa a taŋ ŋa andzu.

4Ebilatu a zgi edzi nga a nyuŋ eshki a lu mi le, Agimi e gno, ame é shri ŋa é ba okro bimi okyku o da gimi e yi ba ame e hwiŋ akpukyeŋ okro baŋ mbo. 5Eyesu a zgi edzi la azhli ba ezga eshri baŋ ta la ariga la a wo abme mlemle egʼba baŋ. Ebilatu a nyuŋ mo a lu mi le, E ka! Alom lo a wo ahi! 6Omba ba moandakʼpo olu ba Ahogbrẽ pa la moa la a kʼpu a ka ŋa nga, moa a ta akhi a lu mi le, E gŋe ŋa egŋe aki! E gŋe ŋa egŋe aki! Ebilatu a nyuŋ mo a lu mi le, O wo eka he bgu le, agimi e vu ŋa e gŋe ŋa egŋe aki. Ambo ame e hwiŋ akpukyeŋ ka la ŋa moa a bga ŋa mbo. 7MoaEyahuda a tno ma a lu mi le, Agi e wo la odaŋ la o bmi moa a bga ŋa okyku baŋ a sko eshri baŋ a zga Anwye Ahogbrẽ.

8Omba ba Ebilatu a gno eka he nga, eyli e kpo ŋa e ta ma-ma. 9A bla a gre ekpazhi baŋ nga a zhĩ Eyesu a lu mi le, Aŋo o zgi ayaŋ o ba? Ambo Eyesu a tno ŋa ma mbo ku-ku. 10Ebilatu a nyuŋ ŋa a lu mi le, Aŋo o tno me ma mbo? O ka, ame e wo la ekʼpo ma ba ame e kyu ŋo abgo, nga ame e sa e wo la ekʼpo ma ba ame e gŋe ŋo egŋe aki. 11Eyesu a tno ŋa ma a lu mi le, Aŋo o wo la ekʼpo eshri me, okyku eshi Ahogbrẽ angyiŋ a shri lo a shri a doŋ. Okyku eka he are la a vu me a shri a doŋ angyiŋ a kpo anyuŋ odlobi la o gre pyeŋ. 12Omba ba Ebilatu a gŋo eka he nga, a zga eso ba o kyu ŋa abgo. Ambo MoaEyahuda a ta akhi a lu mi le, O wo boŋ o kyu ŋa abgo tli le, aŋo o wo akyeŋazba ba Ekeza angyiŋ mbo! Areyaŋ a mbo la a sko eŋa a zga anyuŋ-areŋ le a wo afpu Ekeza angyiŋ! 13Omba ba Ebilatu a gno edgu odlo he nga, a da Eyesu a zgi edzi, nga Ebilatu a dzu emgbakyiŋ ba osõmbgu la e wo ibu ba moa a bzi lo la olom moaEyahuda ma Egabata.

14Ohe lo o kpo olulum onda oha ba moa á ri abgo ba Apaska. Ebilatu a nyuŋ moaEyahuda a lu mi le, E ka anyuŋ-areŋ bimi! 15Moa a ta akhi a lu mi le, E bga ŋa! E bga ŋa! E gŋe ŋa egŋe aki! Ebilatu a zhĩ mo a lu mi le, Agimi e klo ba ame e gŋe anyuŋ-areŋ bimi egŋe aki? Moandakʼpo olu ba Ahogbrẽ a tno ma a lu mi le, Ekeza sha angyiŋ a wo anyuŋ-areŋ bi! 16Ambla he nga Ebilatu a shri Eyesu a da mo okyku o gŋe ŋa egŋe aki.

Moa a gŋe Eyesu egŋe aki

Okyku eka he moa a kʼpu Eyesu. 17A zgi la egŋe aki baŋ. Aŋa angyiŋ a shri lo a gre Okro ba Amgbatku Eshri. La olom moaEyahuda moa a la a bzi lo ma Oglogota. 18Moa a gŋe ŋa egŋe aki ahe lo angyiŋ. Moa a gŋe moare aha egŋe aki ka la ŋa. Ahwõ a wo evom ahwõ, ahwõ a wo evom ahwõ. Eyesu a wo agʼbaha mo. 19Ebilatu a ta engla a da mo a bre lo egŋe aki. A ta a lu mi le, Eyesu ba Anazarata Anyuŋ-areŋ moaEyahuda. 20MoaEyahuda nzenze a tsi lo a ka, okyku eshi okro ba moa a gŋe Eyesu egŋe ma lo o gyuŋ ta la osku lo mbo. Moa a ta engla la olom moaEyahuda ta la olom moaOroma, ta la olom moaEgrise. 21MoaEyahuda la a wo moandakʼpo olu ba Ahogbrẽ, a nyuŋ Ebilatu a lu mi le, Aŋo e mbi o ta o lu mi le, Anyuŋ-areŋ moaEyahuda mbo, ambo e mbi aŋo o ta o lu mi le, Alom hi a lu mi le, Ame angyiŋ e wo Anyuŋ-areŋ moaEyahuda. 22Ebilatu a tno mo ma a lu mi le, Ekplo ba ame e sheŋ e ta, ame é nyiŋ lo nga mbo.

23Ambla moanwyeakyuŋ a gŋe Eyesu egŋe aki a khwo nga, moa a tslo aknye baŋ a gʼba lo egʼba enyi, nga ayaŋ a mbo eshki moa anyi lo a sko ogʼba baŋ. Moa a sko anyuŋ ariga la a wo ashye akyekyeŋ, moa a pme lo mbo. 24Moanwyeakyuŋ lo a nyuŋ emo a lu mi le, Agi e dle lo mbo, ambo agi e fye emvye eshri lo okyku o da gi e ka are la á ba a ri lo. Ohe lo o kpo okyku o bli ekplo ba Odlo Ahogbrẽ o lu. O lu mi le,

Moa á gʼba anzho me ta la emo.

Moa á fye emvye okyku anyuŋ ariga me.

Moanwyeakyuŋ a kpo eka he lo.

25Anaŋ Eyesu ta la anáŋ anaŋ Eyesu alashle, ta la Emeri ashe Okilopa, ta la Emeri Amagadaliya, moa a tspi osusku ta la okro ba moa a gŋe Eyesu egŋe aki ma. 26Eyesu a ka anaŋ, ta la anwyeotum la a wo a ba eso baŋ, moa a tspi ahe lo. Nga Eyesu a nyuŋ anaŋ a lu mi le, Ashe, o ka anwye boŋ he. 27Nga a zhiŋ a nyuŋ anwyeotum he lo a lu mi le, O ka anoŋ. A zga omba he lo nga, anwyeotum he lo a daŋ a gre a yi a dzu ka la ŋa odne baŋ.

Eku ba Eyesu

28Eyesu a yi ba omba he lo ekployaŋ a mbo e sheŋ e bli bgu. Okyku o da ekplo ba Odlo Ahogbrẽ o lu e bli, a lu mi le, Oŋo o kpo me. 29Eshyẽ ami e wo ahe lo. Ami abza la a wo amgbaŋ nzenze mbo a bli lo. Moa a ghwo asusku ami lo nga moa a tpi lo aki ba ehespo nga moa a shri lo a ghwo ŋa anyu. 30Eyesu a wa lo a khwo nga a lu mi le, Alo o khwo Ambla he nga a gbyle eshri baŋ nga a kpu.

Moa a fu Eyesu etazhi evom

31MoaEyahuda a vẽ Ebilatu okyku o daŋ a bmi a da mo e buŋ adga moarehwi ba moa a gŋe mo egŋe aki okyku o da me a gile mo a ba obiŋ. Moa a kpo eka he okyku eshi olum onda he lo o wo Ojuma angyiŋ. Nga moa a klo ba ekom e dzu egŋe aki onda ba Asabat mbo, okyku eshi Asabat he lo a wo anyuanyuŋ angyiŋ. 32Okyku eka he nga moanwyeakyuŋ a gre a yi a buŋ adga ba are ba oriori a khwo nga moa a gre a yi a buŋ adga are ba oha. Moa a gŋe mo egŋe aki ta le Eyesu otsotse. 33Ambo omba ba moa a gbu okro Eyesu moé a hwiŋ ŋa a sheŋ a kpu bgu, okyku eka he moa a buŋ adga baŋ o ko mbo. 34Ambo akyeŋ eshki moanwyeakyuŋ a fu Eyesu etazhi evom, nga ebuebu amanzhli, ta la ami a zgi. 35Are la a ka ekplo la e kpo he lo, a zgi egŋe eshri lo. Agi e yi ba ekplo baŋ a lu he lo e wo adlidzi angyiŋ. Aŋa eshrishri eŋa a yi baŋ a lu adlidzi angyiŋ, okyku o da gimi a mbo e bmi ba adlidzi. 36Ohe lo o kpo okyku o bli ekplo ba Odlo Ahogbrẽ o lu. O lu mi le, Moa á buŋ akʼpu baŋ akyeŋ a mbo mbo. 37Odlo Ahogbrẽ o sa o lu okrokyeŋ o lu mi le, Moare á ka are ba moa a fu ŋa etazhi.

Moa a ngybi Eyesu

38Ambla he nga Oyusufu la a wo a ba osku ba Arimatiya a yi a vẽ Ebilatu okyku o daŋ a sko okom Eyesu. Oyusufu a wo a la a lu Eyesu ma angyiŋ, ambo a ghre eshri baŋ okyku eyli ba moaEyahuda. Ebilatu a bmi a daŋ, okyku eka he Oyusufu a gre a yi a sko lo. 39Enikodimo la a gre ibu ba Eyesu okyukyku ombakyeŋ, a gre ta la Oyusufu. A shri awargi la a shka efpi. Alo a wo alaba endgaekyeŋ. Moa a kpo lo la emri ta la aloso.#Esĩ afpu ba moa a shri ami lo a khwa okom. 40Moarehwi aha he lo a sko okom Eyesu nga moa a bʼbu lo oknye okyekyle, moa a shri awargi a ygi oknye lo. MoaEyahuda a la a kpo ta la okom eka he ayga a ngybi lo. 41Agbikyeŋ a wo osusku ta la okro ba moa a gŋe Eyesu egŋe aki ma. Ongybi ba moa a ngybi arekyeŋ ma a ka mbo o wo agbi he lo. 42Onda he lo o wo Ojuma angyiŋ. Onda oha nga o wo Asabat ba moaEyahuda. Okyku eka he moa a gre a yi a ngybi Eyesu ongybi la o wo osusku he lo.

Currently Selected:

Eyohana 19: EGONT74

Highlight

Copy