Oluka 11

Eyesu a nye moare eshri ofaolu

1Ombakyeŋ nga Eyesu a gre okrokyeŋ okyku o fa olu. Ambla baŋ a fa a khwo nga, anwyeotum baŋ akyeŋ a nyuŋ ŋa a lu mi le, Adigi-odne, o nye gi eka moa a la a fa olu, eka ba Eyohana a mbo a nye moanwyeotum baŋ. 2Eyesu a nye mo ma moa a fa olu a lu mi le,

Aŋo Adigi,

O da gi e sko eshko boŋ e zga la esesla.

O da Oreŋ boŋ o ba.

3Aŋo o shri algo bi e wo la alo ma mbo o da gi elulum pyeŋ.

4Aŋo o kyu gi abgo odlobi bi e la e kpo.

Eka ba agi e la e kyu areyaŋ a mbo la a ta akpu egi ayi bi abgo.

Nga o da obile la o gre gi eshri o hwiŋ gi mbo.

5Ambla he nga Eyesu a nyuŋ moanwyeotum baŋ a lu mi le, O wo ba akyeŋ eshki bimi a gre odne ba akyeŋ azba ekpatspe okyukyku nga a zhĩ ŋa a lu mi le, Akyemeazba aŋo o bmi le, o kʼpo me agbrotsa atra. 6Okyku eshi akyemeazba a zgi odzi a ba a gbu ohuhuhi, nga ame e wo la emakyeŋ ba o shri o zga egi ayi baŋ mbo! 7Ambo o wo ba akyeŋoazba he lo a dzu aku egi eshyẽ a lu mi le, O dzu me eso la odlo okyukyku hi mbo. Ame e sheŋ e klu ayizhẽ, nga ame e wo aku eshyẽ pa la moanwye me a mo. Ame é kso é shri emakyeŋ é doŋ ohuhuhi é gbu nga mbo. 8Ame e lu e da gimi, o wo ba alom lo a klo o kso angyeŋ o shri agbrotsa o doŋ okyku boŋ o wo akyeŋazba mbo, ambo ekakahelo, á kso nga á shri ekployaŋ a mbo boŋ o klo á shri á doŋ, okyku eshi aŋo o bre ayi o la o vẽ ŋa. 9Okyku eka he ame e lu ka la gimi, Aŋo o vẽ, nga aŋo ó yga, aŋo o klo, nga ó hwiŋ. Aŋo o ta enzi, nga moa á hwile ŋo ayizhẽ. 10Okyku eshi areyaŋ a mbo la a la a vẽ, á yga, nga areyaŋ a mbo la a la a klo, á hwiŋ, areyaŋ a mbo la a la a ta enzi nga, moa á hwile ŋa ayizhẽ. 11Akyeŋ eshki bimi adimoanwye á shri emabi á da anwye baŋ o wo baŋ a vẽ ŋa atsa? 12O mbo le, o wo baŋ a vẽ ŋa ezhi enu á shri enaŋ á shri á daŋ? 13Agimi e wo moarehwi ba eda ebi, ambo ekakahelo agimi e yi eka bimi e shri ayakplo la a wo adzi e shri e da moanwye bimi. O wo ba agimi adaŋ moanwye la e wo eda ebi e yi eka bimi e shri ayakplo adzadzi e da moanwye bimi le, o sa o tsi Adigimi la a wo Ongyeŋ á shri Ogbgaodzi á da areyaŋ a mbo la a vẽ ŋa mbo?

Eyesu ta la Ebilazabuba

14Eyesu a se ogbgabi la o kpla egba o gbu mbo. Omba ba ogbgabi o zgi o sku alom lo o khwo nga, alom lo a zga osi a kpla egba. Moare a ka egbregbre. 15Moakyeŋ eshki mo a lu mi le, Ebilazabuba areŋ egbgabi angyiŋ a shri ekʼpo a da Eyesu a daŋ a se egbgabi. 16Moakyeŋ moa a klo o kpyi ŋa okyku eka he moa a klo baŋ a kpo ekplokyeŋ egbregbre, la é ba e dzu egŋe baŋ a zgi okro Ahogbrẽ angyiŋ a ba. 17Ambo Eyesu a yi aga mo pyeŋ, okyku eka he a nyuŋ mo a lu mi le, Obiŋyaŋ a mbo la o gʼba eŋa egʼba nga o kpo ambgu ta la eŋa le, ó tspi ma-me mbo. Ogu la o gʼba eŋa aha le, ó tspi mbo. 18Okyku eka he o wo ba oreŋ ba Eshitaŋ o gʼba eŋa nga o kpo ambgu ta la eŋa le, o kpo anyu ó ba o tspi? Agimi e lu mi ma ame e se egbgabi okyku ba Ebilazabuba angyiŋ a shri ekʼpo a da me eshri mo. 19O wo ba ame e se egbgabi ozhẽ he lo angyiŋ le, moa la a lu gimi ma a la a se mo ozhẽyaŋ angyiŋ? O wo eka he le, moa la a lu gimi ma moa a tsa eka bimi e wo la akpu! 20O mbo, ame e se egbgabi la ekʼpo Ahogbrẽ angyiŋ. Ohe lo o tsa eka ba Oreŋ Ahogbrẽ o sheŋ o ba okro bimi bgu.

21Omba ba are la a wo oshye a la a kʼpu odne baŋ la anzho eko baŋ, ekplokyeŋ é tka anzho baŋ a wo la alo ma mbo. 22Ambo o wo ba are la a wo oshye a gre ŋa a ba a gbu ŋa abgo, a kpo a gre ŋa, nga aŋa á ngʼga anzho eko baŋ a shri oshye baŋ a zga ma okyku lo, á shri lo á yi. Ambla he nga a gʼba angyiŋ baŋ a wo la alo ma a sku ŋa.

23Areyaŋ a mbo, la a wo a me mbo le, a wo afpu me angyiŋ. Nga are la a pla a shki pa la me mbo le, a som mo ayi o som angyiŋ.

Ogbgabi o bla o ba

24Omba ba ogbgabi o zgi o sku are le, o la o dzi ekro la e mom, okyku o klo okro odzudum. Ambo o wo ba alo o hwiŋ okrokyeŋ mbo, ó nyuŋ eŋa o lu mi le, Ame é yi eme odne ba ame e dzu lo e zga. 25Ambla he nga ogbgabi lo o bla o gre odne nga o hwiŋ ekployaŋ a mbo ma pyapyapyaŋ. 26Ambla he nga, o gre o yi o shri egbgabi efoha la e wo ebi e gre ŋa a mbo é ba. Moa nga á ba a dzu ka la ŋa. Ambla he lo odzudzu ba alom lo o sa ó tpi ayi ó ta ma-ma. Ó gre eka baŋ a wo oriori.

Oraŋ ba adlidzi

27Omba ba Eyesu a lu eka he a khwo nga, ashekyeŋ a zgi eshki a lu mi le, Are la a mbre ŋo nga a kpaŋ ŋo a wo la ovye ma nzenze! 28Eyesu a tno ma a lu mi le, Moare la a gno odlo me nga a kpaŋ lo, moa a wo la oraŋ nzenze e ma!

Moa a klo o ka ekplo egbregbre

29Omba moarehwi a ba a shki a ta Eyesu a kpaŋ nga Eyesu a lu mi le, Moarehwi ba ekplu hi moa a wo la odlobi a gre eshri! Moa a klo o ka ekplo egbregbre la e ba e tsa obibmi ba Ahogbrẽ. Ambo moa á tsa mo ekplokyeŋ a gre ekplo ba Oyunana á kpo mbo. 30Eka ba Oyunana a wo egŋe okyku moarehwi ba Eninive, ekakahelo angyiŋ Anwye Arehwĩ á ba a dzu egŋe okyku moarehwi ba ekplu hi. 31Onda ba Ombgu, anyuŋ-areŋ-alashle ba egi ero, á ba a shraŋ moarehwi ba ekplu hi, okyku eshi aŋa a dzi a zgi ogyugyuŋ a ba okyku o gno edgu onyenye ba okaobmye ba Osolomo. E ka, ekplokyeŋ e wo ahe, e la e wo egbregbre e gre edgu onyenye ba Osolomo. 32Onda Ombgu, moarehwi ba Eninive, moa á tspi nga moa á shraŋ gimi okyku eshi moa a nyiŋ odzudzu mo omba ba Oyunana a nyum oshpa a ygi mo. E ka, ekplokyeŋ e wo ahe, e la e wo egbregbre e gre Oyunana!

Ayimom ba egʼba

33Arekyeŋ a ta ovo emgbuovo nga a shri lo a ghre mbo, o mbo le a shri atku a la a shum lo mbo. Ambo, moa a kha lo eshum, okyku o da areyaŋ a mbo a ka ayimom omba baŋ a gre a ba eshyẽ. 34Ayi bimi a wo eka emgbuovo ba egʼba angyiŋ. O wo ba ayi boŋ a wo leleŋ le, egʼba boŋ é wo la ayimom ma nzenze, ambo o wo ba ayi boŋ a wo adzi mbo le, egʼba boŋ pyeŋ é dzu evbu. 35Okyku eka he, o nyuŋ o kpo-kpo, okyku o da ayimom la a wo egʼba boŋ a zhiŋ a dzu evbu mbo. 36O wo ba egʼba boŋ pyeŋ e bli la ayimom, nga ba okrokyeŋ a mbo o wo la evbu mbo le, ayimom a tra egʼba lo pyeŋ eka ba ayimom ba emgbuovo a la a tra egʼba boŋ.

Eyesu a shraŋ moaEfarisi pa la moa la a nye odaŋ

37Ambla ba Eyesu a lu odlo a khwo nga, alom ba Efarisikyeŋ a bzi ŋa okyku o daŋ a ri algo ka la ŋa. Eyesu a gre a dzu obiŋ okyku o ri algo. 38Alom ba Efarisi a ka egbregbre a gre eshri okyku ba Eyesu a ndza abgo ayga a ri algo la abgo mbo. 39Okyku eka he nga, Adigi-odne a nyuŋ ŋa a lu mi le, O ka, agimi Efarisi e la e ndza etku bimi e la e wa ami ma egi edzi, ambo agimi e dzu egi eshyẽ e zga. Egi eshyẽ nga, engre ta la odlobi sha e bli lo. 40Agimi adrodro! E ka, Ahogbrẽ angyiŋ a kpo edzi ta la eshyẽ mbo? 41Agimi e shri ekployaŋ a mbo la e wo etku ta la akplékpka e shri e da moaekŋe. Agimi é kpo eka he lo le, ekployaŋ a mbo e wo tsetsetseŋ ka la gimi.

42A ba eshri bimi Efarisi! Agimi e la e shri ogʼba okyeŋ eshki egʼba okʼpo ba enyiŋ-emgbo ta la afre, ta la anzho enyiŋ ehwõ a mbo e shri e da Ahogbrẽ, ambo agimi e dzu adlidzi e zga, nga agimi e klo Ahogbrẽ mbo. Ambo o dzu omgbybi ba agimi e kpo edgu ayakplo he lo, ta la ahwõ a mbo.

43A ba eshri bimi Efarisi! Agimi e la e klo emgbakyiŋ ba moandakʼpo angyiŋ anwyeakulu, nga agimi e klo e da mo a ka gimi la anyuanyuŋ ekyku. 44A ba eshri bimi! Agimi e wo eka ba engybi moare a ka lo mbo, nga moa a la a dzi ma la efifĩ.

45Arekyeŋ eshki moa la a nye odaŋ a nyuŋ Eyesu a lu mi le, Andakʼpo, aŋo o dzi gi angyiŋ omba boŋ o lu eka he lo! 46Eyesu a tno ŋa ma a lu mi le, A ba eshri bimi are la e nye odaŋ a mbo! Agimi e la e shri oshri la o lbi o gre eshri e lom okũ moare. Agimi e bmi e ndba evgo a mbo e kpo e ghwo la mo mbo. 47A ba eshri bimi! Okyku eshi agimi e la e kpo engybi edzadzi okyku moarehwi ba Ahogbrẽ a hom otum ba moadigimi a bga mo. 48Agimi ababgo bimi e dzu egŋe, nga agimi e bmi ta la ekplo moadigimi a kpo. Moa a bga moarehwi ba Ahogbrẽ a hom mo otum, agimi nga e mbdzi engybi okyku mo. 49Okyku eka he, Okaobmye ba Ahogbrẽ o lu mi le, Ame e da moarehwi ba Ahogbrẽ a hom otum á ba, pa la moanwyeadga baŋ. Moare á bga moakyeŋ eshki mo, nga moa á kpo moakyeŋ ewu. 50Okyku eka he nga, moarehwi ba ekplu he lo, moa á kpo mo ewu okyku moa a bga moarehwi ba Ahogbrẽ a hom mo otum. Ohi o kpo omba ba moa a zga esi o kpo obiŋ hi lo angyiŋ. 51A zga omba ba moa a bga Ahabila, a ba omba ba moa a bga Azakariya agʼbaha ambgu ta la okro ba esesla. Ame e lu e da gimi pyeŋ, moarehwi ba ogʼba hi, moa á kpo mo ewu okyku ohi lo.

52A ba eshri bimi la e nye odaŋ! Agimi e shri emakuli ba moa a hwile ayizhẽ la a yi odŋe oyioyi e shri e ghre. Agimi eshrishri egimi nga e gre ma mbo. Moa la a klo o yi a mbo agimi e nyom mo.

53Ambla ba Eyesu a kso a sku okro he lo nga, moa la a nye odaŋ, pa la moaEfarisi moa a zga esi o shri ozhiozhĩ andandandim nzenze a shri a ba, okyku o so ŋa ayi la eso ovovre. 54Moa a klo o kpyi ŋa okyku o da mo a vu ŋa o wo baŋ a ta akpu ekplokyeŋ baŋ a lu.

Currently Selected:

Oluka 11: EGONT74

Highlight

Copy