Oluka 13
13
Agimi é nyiŋ odzudzu bimi mbo le, agimi é jygi
1Omba he lo moarekyeŋ a wo ahe. Moa a lu a da Eyesu eka ba Ebilatu a bga moarehwi ba Egalili omba ba moa a shri oshriondba a ndba Ahogbrẽ. 2Eyesu a zhĩ mo a lu mi le, Eka bimi e ka, moa a bga moarehwi ba Egalili he lo eka he okyku ba odlobi mo o gre odlobi moahwõ ba Egalili angyiŋ? 3O mbo! Ame e lu e da gimi o wo bimi a mbo e nyiŋ odzudzu bimi mbo le, agimi mvye a mbo é kpu eka moa a kpu. 4Eshi e kpo pa la moarehwi okʼpofote ba Esiloyom? Ogli o kypi o pre mo nga moa a kpu. Eka bimi e ka ohe lo o kpo okyku moa a wo la odlobi a gre moahwõ la a wo Orushalima angyiŋ? 5O wo eka he angyiŋ mbo! Ame e lu e da gimi, o wo bimi e nyiŋ odzudzu bimi mbo le, agimi mvye a mbo é jygi eka moa a jygi.
Egŋe ba ebro la e fu agbro mbo
6Ambla he nga Eyesu a ta egŋe a lu mi le, Alomakyeŋ a wo la agbi ma. Agbi baŋ nga, esi ebro e wo ma. Alom he lo a gre okro esi lo okyku o klo agbro ma, ambo a hwiŋ emakyeŋ ma mbo. 7Okyku eka he a nyuŋ are la a kpo otum agbi a lu mi le, O ka, ame e kpo eyi etra ba ame e la e ba ahe okyku o klo agbro ebro esi ebro hi, ambo ame e hwiŋ mbo. Ame e klo boŋ o kplu esi ebro lo o ta a bi. 8Ambo are la a kpo otum agbi a lu mi le, Andakʼpo, o dzu lo o zga ma okyku eyi ekyeŋ o ka ayga. Ame é kpo okũ lo nga é shri ekro é ygi ma okyku eyi ekyeŋ ayga. 9O wo ba alo e fu agbro eyi la e ba hi le, ó wo odzi, ambo o wo ba alo e fu emakyeŋ mbo omba mi lo le, aŋo o kplu lo.
Eyesu a shaŋ ashe la a mom egʼba onda ba Asabat
10Onda ba Asabat nga, Eyesu a gre anwyeakulu nga a nyum oshpa ma. 11Ashekyeŋ ahe lo, ogbgabi o kpo ŋa ewu. O daŋ a no olo okyku eyi okʼpoefote. A buŋ ŋa osi nga a ndba lo a gbu mbo. 12Omba ba Eyesu a ka ŋa nga, a bzi ŋa nga a lu mi le, Ashe, ame é shaŋ ŋo ololo boŋ o la o no hi! 13Eyesu a shki ashe lo abgo a khwo nga, a shaŋ nga a kso a hlu Ahogbrẽ eshko. 14Andakʼpo anwyeakulu a kpo olom ta la Eyesu okyku baŋ a shaŋ ashe he lo onda Asabat. Okyku eka he nga, alom lo a lu pa la moarehwi a lu mi le, Agi e wo la elum efĩ e ma okyku o kpo otum, okyku eka he agimi e ba omba he lo okyku o da mo a shaŋ gimi, ambo e ba onda Asabat angyiŋ mbo! 15Adigi-odne a tno ma a lu mi le, Agimi arehwĩ la e bile moare! Agimi e la e ngla andu o mbo le ashrishri okyku o da lo a yi a wa ami ehwlo onda ba Asabat. 16Agimi e ka are ba ogu ba Ebrahim hi, Eshitaŋ e vu ŋa e dze okyku eyi okʼpoefote a mo. O wo odzi angyiŋ ba moa a ngla ŋa ewu baŋ onda Asabat mbo? 17Otnoma baŋ a tno moafpu ŋa pyeŋ o ta mo anzi. Moahwõ pyeŋ nga a la a kpo ovye ta la ayakplo egbregbre baŋ a kpo.
Egŋe eshri ba amastad
18Eyesu a zhĩ a lu mi le, Eka bimi e ka, Oreŋ Ahogbrẽ o wo ekayaŋ angyiŋ? Ame é shri eshi é ba e ta egŋe ta la alo? 19O wo eka eyi ba amastad angyiŋ, ba alomakyeŋ a sko a yi a fu agbi baŋ. E zgi e khwo nga, e zhiŋ e dzu esĩ aki, nga awunu nga a ba a ta eygu mo embgu lo.
Egŋe eshri ba eyist
20Ambla he nga Eyesu a zhĩ a lu mi le, Ame é shri eshi é ba e ta egŋe ta la Oreŋ Ahogbrẽ? 21O wo eka eyist ba ashekyeŋ a sko a zhiŋ a rba lo ta la eko ambla he nga e nyom.
Ozhẽ la o fye
22Eyesu a gre esku, ta la anwye esku nga a nyum oshpa. Omba he lo a wo ozhẽ ba o yi Orushalima. 23Arekyeŋ a zhĩ Eyesu a lu mi le, Andakʼpo, moarehwi ple sha angyiŋ á ba a gro? Eyesu a tno ma a lu mi le, 24Agimi e zga gble okyku o da gimi e sõ ozhẽ la o fye kpate. Ame e lu e da gimi, moare nzenze á klo o sõ lo, ambo moa á sõ lo á gbu mbo.
25Are-odne lo á kso á shki ayizhẽ ba odne baŋ. O wo bimi e tspi ayizhẽ lo egi edzi, e ta enzi e lu mi le, Andakʼpo, o hwile gi ayizhẽ! Á tno gimi ma á lu mi le, Agimi e zgĩ ayaŋ e ba? Ame e yi gimi mbo! 26Agimi é tno ma é lu mi le, O ka, agi e ri e wa otsotse ka la ŋo, nga o nye moare osku bi a mbo! 27Aŋa nga á lu mi le, Ame e yi okro bimi e zgi ma mbo. Agimi arehwĩ ba odlobi, e kye e sku me! 28Agimi é wu okũ é gre eshri, nga é taŋ azhga anyu omba ba agimi e ka Ebrahim, ta la Eshaku, ta la Eyakubu, pa la moarehwi ba Ahogbrẽ a hom mo otum, a dzu Oreŋ Ahogbrẽ, ambo moa á hwile gimi ayizhẽ mbo! 29Moare á zgi egi etne, ta la egi olum-ore, ta la egi osu, ta la egi ero á ba okyku odzu otsotse okro oriabgo ba Oreŋ Ahogbrẽ. 30Nga moarehwi ba ori, á dzu moarehwi ba ambla, nga moarehwi ba ambla á dzu moarehwi ba ori.
Oklo Eyesu okyku Orushalima
31Omba he lo nga, moaEfarisikyeŋ a ba okro Eyesu nga a nyuŋ ŋa a lu mi le, O raŋ o gre boŋ o zgi o sku okro hi, okyku eshi Ehirudu a klo o bga ŋo. 32Ambo Eyesu a tno mo ma a lu mi le, Agimi e yi e lu e da emgbashka mi lo e lu mi le, Ame e la e se egbgabi, nga e shaŋ moare. Ame é kpo ohe lo okyku anye ta la akyi, nga olum ba otra angyiŋ ame é ba e kpo otum é ba e khwo. 33Ekakahelo a mbo, ame é ta ozhẽ anye, ta la akyi, ta la eshri, ambo o wo odzi ba moa a bga arehwĩ ba Ahogbrẽ a hom ŋa otum okrokyeŋ ondundum mbo o wo le Orushalima sha.
34Orushalima, Orushalima! Aŋo o bga moarehwi ba Ahogbrẽ a hom mo otum. Nga aŋo o bga moanwyeadga ba Ahogbrẽ a hom mo otum okro boŋ la ézhim. Engyi oshushku ame e klo o ngla abgo me e shki moarehwi boŋ mvye eka ba enu e la e ngla angʼbo baŋ e shki moanwye baŋ. Ambo aŋo o tla me o ta! 35Okyku eka he, moa a dzu odne boŋ a zga aku. Ame e lu e doŋ, ó ka me ku-ku nga mbo, o wo le o lu mi le, Ahogbrẽ a shri owlama a da are la a ba eshko Adigi-odne ayga dne.
Currently Selected:
Oluka 13: EGONT74
Highlight
Share
Copy
Want to have your highlights saved across all your devices? Sign up or sign in
Eggon New Testament © United Bible Societies, 1974. Bible Society of Nigeria
