Oluka 15
15
Ekylu la e blu
1Ombakyeŋ moare nzenze la a yga ewaŋ, pa la moare ba moa a tla mo eshki okyku moa a kpo odlobi, moa a ba okro Eyesu okyku o daŋ a nye mo. 2MoaEfarisi, pa la moa la a nye odaŋ a lu ahihĩ a lu mi le, O ka, are he lo a yga moare ba moa a tla mo eshki okyku moa a kpo odlobi, nga a la a ri algo pa la mo a mbo! 3Eyesu a ka eka he nga a ta egŋe a ygi mo a lu mi le,
4O wo ba arekyeŋ eshki bimi a wo la ékylu endgaekyeŋ nga ekyeŋ eshki mo e blu le, are he lo á kpo eshi? O dzu omgbybi baŋ á ba a dzu ékylu ekʼpoetronyi la etronyi ehwõ á ba a zga a da mo a taŋ aso nga á yi á klo ekylu ekyeŋ la e blu o tsa baŋ á hwiŋ lo. 5Omba baŋ a hwiŋ lo á gno oraŋ á gre eshri, nga á shri lo á lom andze, 6nga á ba odne. Á gbu odne ta la alo, á bzi moakyeŋazba, pa la moaekpazhi baŋ á lu mi le, Agimi e kpo ovye pa la me, okyku eshi ame e hwiŋ ekylu me la e blu! 7Okyku eka he ame e lu e da gimi, moa á kpo ovye nzenze Ongyeŋ okyku are la a tsu a gbu, ambo a sa a ka a bmye, nga a ghwo obiŋ odlobi baŋ, á gre ovye moa á kpo okyku moare ekʼpoetronyi la atronyi la a ka a bmye mbo okyku o ghwo obiŋ.
Eyiamgbaŋ la e blu
8Eyesu a zhĩ a lu mi le, O wo ba ashekyeŋ a wo eyiamgbaŋ okʼpo ma, nga ekyeŋ e blu le, á kpo eshi? Á ta ovo emgbuovo nga á ta eso obiŋ á heŋ emvygi odne lo adzadzi. Á klo lo ma-me o tsa baŋ á hwiŋ lo. 9Omba baŋ a hwiŋ lo, á bzi moaekpazhi baŋ, pa la moakyeŋazba, nga á lu mi le, Agimi e kpo ovye pa la me, okyku eshi ame e hwiŋ eyiamgbaŋ la e blu! 10Ekakahelo angyiŋ, ame e lu e da gimi, moanwyeadga ba Ahogbrẽ a la a kpo ovye Ongyeŋ, o wo ba arekyeŋ la a tsu a bgu, a ba a ghwo obiŋ odlobi baŋ.
Anwye la a blu
11Eyesu a lu mi le, Alomakyeŋ a wo ma, a wo la moanwye aha ma. 12Andetse eshki moaha he lo a kso a nyuŋ adaŋ a lu mi le, Adugu, o shri ogʼba me eshki ba angyiŋ boŋ o shri o da me. Adaŋ a gʼba moaha lo angyiŋ baŋ. 13Ambla fi nga, andetse a shri ogʼba baŋ a gbmo nga, a shri amgbaŋ lo a gre obiŋ-okyeŋ la o gyuŋ o gre eshri, nga a tpi amgbaŋ lo pyeŋ ayi. 14A tpi ekployaŋ a mbo baŋ a wo la alo ma ayi. Ambla fi nga agu embyle a gbu obiŋ hi lo, nga ekplo ayiekŋe, anwyealom he lo a wo la emakyeŋ ma mbo. 15Okyku eka he nga, a gre a yi a dzu ta la arekyeŋ ba obiŋ hi lo. Are he lo nga a daŋ a kpaŋ okóko baŋ. 16A hwiŋ algo a ri mbo, okyku eka he, a kpo ekhwo o taŋ angʼbu ebyekpmre moa a kpo a ygi okóko lo, ambo arekyeŋ a fa lo a daŋ mbo. 17A kpo ma-me nga eso baŋ a tne aga a lu mi le, Eshi eka he moanwye-odne adugu mvye a la a hwiŋ algo a ri a gbu agbambgu la alo, ambo ame e kpu embyle ahe! 18Okyku eka he, ame é kso é yi okro adugu nga é vẽ ŋa é lu mi le, Adugu, ame e kpo Ahogbrẽ ka la ŋo odlobi. 19Ame e tse ma moa a bzi me anwye boŋ mbo. Okyku eka he, aŋo o sko me o zga eka akyeŋ eshki moanwye-odne boŋ. 20A tne aga eka he a khwo nga, a kso a gre okro adaŋ. Omba baŋ a yi a wo ogyugyuŋ adaŋ a ka ŋa la eyayi ba ayiekŋe. Okyku eka he nga, adaŋ a knye a gre, nga a ta ŋa a kpmye a vye la ŋa nzenze. 21Anwye lo a nyuŋ adaŋ a lu mi le, Adugu, ame e kpo odlobi egi ayi ba Ahogbrẽ ta la egi ayi boŋ. Ame e tse ma ba moa a bzi me ma anwye boŋ nga mbo ku-ku. 22Adaŋ a wo la ovye a gre eshri, okyku eka he a bzi moanwye-odne baŋ a lu mi le, E shri ariga adzadzi akyeŋ e shri e ba e ygi anwye me he. E shri arika e ba e ghwo ŋa evgo, nga e shri akpadga e ba e ghwo ŋa adga shoshoŋ. 23Ambla he nga, e yi e sla andu la a gbrẽ adzadzi e shri e ba, e da mo a bga okyku o da gi e kpo ovye nga e ri abgo, 24okyku ba anwye me a bla a ba odne! Anwye me he a tpi ayi ambo a sa a ka a bmye ohuhuhi. O dzu eka baŋ a blu ambo agi e sa e hwiŋ ŋa. Nga moa a zga esĩ o kpo abgo.
25Omba he lo anwye ori a yi a wo agbi. Omba baŋ a wo ozhẽ o ba odne nga a gno akyuŋ moa a la a bmmi ama, nga a la a zhga ara. 26Anwye lo a dzu a bzi akyeŋ eshki moanwye-odne nga a zhĩ ŋa a lu mi le, Moa a la a kpo eshi eka he? 27Anwye-odne lo a tno ŋa ma a lu mi le, Anóŋ mi a bla a ba odne, okyku eka he angyiŋ adoŋ a da mo a bga anyuŋ andu okyku baŋ a bla a ba odne osheshye. 28Eso e tpi anáŋ andakʼpo ayi nzenze nga, a tla o yi odne. Okyku eka he adaŋ a ba a vẽ ŋa okyku o daŋ a yi odne. 29Anwye lo a tno adaŋ ma a lu mi le, Aŋo o ka, eyi eshushku ame e la e kpo ŋo otum eka awaghrẽ, nga ame e dzĩ ŋo ondakyeŋ ku-ku mbo. Aŋo o shri ekplokyeŋ o shri o da me o ka? Aŋo o shri anwye ebme a mbo o da me okyku o da me e kpo ovye pa la moakyemeazba mbo! 30Ambo anwye boŋ hi la a shri angyiŋ boŋ a yi a tpi ayi pa la moashe eshra, omba baŋ a bla a ba odne nga, aŋo o bga ŋa anyuŋ andu! 31Adaŋ a tno ma a lu mi le, Anwye me aŋo o wo odne pa la me ombamba pyeŋ, nga ekployaŋ a mbo ba ame e wo la alo ma, e wo e boŋ angyiŋ. 32Ambo o wo odzi angyiŋ bi e kpo abgo nga e kpo ovye, okyku eshi anóŋ a tpi ayi ambo ohuhuhi a sa a ka a bmye. O dzu eka baŋ a blu ambo agi e sa e hwiŋ ŋa.
Currently Selected:
Oluka 15: EGONT74
Highlight
Share
Copy
Want to have your highlights saved across all your devices? Sign up or sign in
Eggon New Testament © United Bible Societies, 1974. Bible Society of Nigeria
