Oluka 22

Moa a fu eshri eshri Eyesu

1Omba moa a ri abgo ba agbrotsa la a nyom mbo, o wo osusku a mo. Moa a bzi abgo he lo ma Apaska. 2Moandakʼpo olu ba Ahogbrẽ pa la moa la a nye odaŋ, moa a klo ozhẽ okyku o vu Eyesu o bga, ambo moa a kpo eyli moarehwi.

Eyahuda a bmi a yla Eyesu

3Ambla he nga Eshitaŋ e gre eso Eyahuda la a ri Eskariyoti. A wo akyeŋ eshki moanwyeotum otsko. 4Eyahuda a zgi a gre okro moandakʼpo olu ba Ahogbrẽ pa la moandakʼpo moanwyeakyuŋ la a la a kʼpu Anyuŋ-akulu. A hwim pa la mo eka baŋ á ba a vu Eyesu á shri á da mo. 5Moa a gno oraŋ ta la Eyahuda a gre eshri, nga moa a hwim okyku o hre ŋa amgbaŋ. 6Eyahuda a bmi pa la mo. Okyku eka he nga, a klo ozhẽ okyku o daŋ a vu Eyesu a shri a da mo esisi.

Eyesu a nyuŋ a kpo okyku o ri Apaska

7Onda ba Oriabgo ba Agbrotsa la a nyom mbo o kpo. Omba he lo moa a la a bga anwye ékylu ba Apaska. 8Eyesu a hom Ebitru, ta la Eyohana otum a lu mi le, E yi e nyuŋ algo bi ba Apaska e kpo okyku o da gi e ri. 9Moa a zhĩ ŋa a lu mi le, Aŋo o klo bi e ri lo ayaŋ? 10A nyuŋ mo a lu mi le, Agimi e ngli atuŋ e gno! O wo bimi e gre osku lo bgu le, agimi é ka arekyeŋ la a shri eshyẽ ami. E lu are he lo ma e yi odne baŋ a gre lo. 11E nyuŋ are ba odne he lo e lu mi le, Are la a nye a zhĩ a lu mi le, Okro ba ame pa la moanwyeotum me é ba e ri abgo ba Apaska o wo ayaŋ? 12Á tsa gimi aku ba ongyeŋ ba moa a shri anzho odzuma a shki ma. E nyuŋ aku he lo e vu abgo. 13Moa a gre a khwo nga moa a hwiŋ ekployaŋ a mbo eka ba Eyesu a lu a da mo. Ambla he nga moa a kpo algo ba Apaska.

Abgoeku ba Adigi-odne

14Omba lo o kpo nga, Eyesu pa la moa la a nyum oshpa baŋ moa a gre a yi a dzu amgbla ba orialgo. 15Nga a nyuŋ mo a lu mi le, Ame e zga eso okyku o ri abgo ba Apaska ka la gimi ayga o tsa ba ewu é hwiŋ me! 16Ame e lu adlidzi angyiŋ e da gimi, ame é ri lo mbo o wo le onda ba moa á ka eshyẽ lo a bmye Oreŋ Ahogbrẽ dne a mo. 17Ambla he nga, Eyesu a sko etku ami, a vye la Ahogbrẽ nga a lu mi le, Agimi e sko etku ami he lo e wa otsotse. 18Ame e lu e da gimi, ame é wa etku ami he lo mbo, o wo le onda ba Oreŋ Ahogbrẽ o ba dne a mo. 19Ambla he nga a sko agbrotsa a khwo nga a vye la Ahogbrẽ, nga a kplu lo, a shri a da mo nga a lu mi le, Alo a dzu egʼba me angyiŋ, [ba moa a shri lo a di okyku gimi. Agimi e tne aga me omba bimi e kpo ohe lo. 20Ambla he nga a sko etku ami a shri a da mo. Omba ba moa a taŋ agbrotsa a khwo nga, a lu mi le, Etku ami hi e dzu ohwihwim olohe ba Ahogbrẽ. Alo o bli eshri amanzhli me ba moa a zhiŋ a ygi a bi okyku gimi.]

21Agimi e ka! Are la a yla me, aŋa a mbo a wo okro amgbla ba orialgo pa la me! 22E ka, Anwye Aíehwĩ á kpu eka ba Ahogbrẽ a sheŋ a hwim eso baŋ. Ambo o wo ekplo ba ayiekŋe angyiŋ ta la are la a yla ŋa hi lo! 23Ambla he nga, moa a zhĩ emo a lu ma ayi eshki mo á ba a kpo edgu ekplo he lo!

Moa a kla ogbueshko

24Moanwyeotum a sla emo a kla are la a ba a wo la ekʼpo a gre mo pyeŋ. 25Eyesu a nyuŋ mo a lu mi le, Moareŋ ba obiŋ hi, moa a la a ri ekʼpo eshri moarehwi mo. Nga moa a bzi mo la a ri ekʼpo ma moakyeŋazba moare. 26Okro bimi o wo ondundum. O dzu omgbybi ba are la a wo ekʼpo a gre pyeŋ eshki bimi, a dzu eka anwye afifi, nga o dzu omgbybi ba andakʼpo a sa a dzu eka anwye-odne. 27Ayaŋ angyiŋ a wo ekʼpo a gre, are la a dzu amgbla ba orialgo okyku o ri algo le, are la a shri algo a ndba amgbla ba orialgo? Are la a dzu amgbla ba orialgo a wo ekʼpo a gre. Ambo ame e wo ka la gimi eka ba are la a shri algo a la a ndba angyiŋ.

28Agimi angyiŋ e dzu pa la me ombayaŋ a mbo ba moa a mbga me. 29Nga eka ba Adugu a shri ekʼpo a da me okyku o da me e ri ekʼpo, ekakahelo ame é ba e kpo ka la gimi. 30Agimi é ri nga é wa amgbla ba orialgo me Oreŋ me. Nga agimi é dzu emgbakyiŋ oreŋ okyku o sõ egu otsko ba Esrayila ombgu.

Eyesu a lu eka ba Ebitru a kpo evom baŋ

31Esima, Esima! O ngli atuŋ o gno! Eshitaŋ e yga ekʼpo okyku o mbga ŋo eka ba areagbi a la a sla eyi esekʼpa a la a sku asusku. 32Ambo ame e sheŋ e fa olu okyku ŋo Esima, okyku o da obmi ba adlidzi boŋ o sheŋ o nye ozhẽ mbo. Ambla boŋ o bla o ba okro me le, aŋo o shĩ moanóŋ. 33Ebitru a tno ma a lu mi le, Adigi-odne, ame e wo la eso ekyekyeŋ okyku o yi aku ka la ŋo, o mbo le o kpu ka la ŋo! 34Eyesu a tno Ebitru ma a lu mi le, Ebitru, a me e lu e doŋ, anye hi aŋo ó dzu evom me engyi etra ayga engo é tko.

Abre amgbaŋ, pa la emgbu, pa la akõ

35Ambla he nga Eyesu a nyuŋ mo a lu mi le, Agimi e ka, omba ba ame e da gimi e zgi e gre otum, agimi e shri abre amgbaŋ ta la emgbu, ta la akpadga a mbo mbo, ekplokyeŋ e sheŋ gimi e nye omba hi lo? Moa a tno ma a lu mi le, Ekplokyeŋ e sheŋ gi e nye mbo. 36Eyesu a nyuŋ mo a lu mi le, Ambo ohuhuhi areyaŋ a mbo la a wo la abre amgbaŋ, o mbo le emgbu o raŋ o gre baŋ a sko lo. Areyaŋ a mbo la a wo la akõ ma mbo le, a shri ariga baŋ a gbmo nga a yi a gbmo akõ. 37Ame e lu e da gimi eka he okyku eshi odlo Ahogbrẽ o lu mi le, Moa á tsi ŋa a ghwo eshki moa la a gre abgo. O dzu omgbybi ba ohe lo o bli eshri me. Ekplo moa a ta eshri me, e la e bli angyiŋ. 38Moanwyeotum a nyuŋ ŋa a lu mi le, Adigi-odne, o ka! Akõ aha a wo ahe! A tno mo ma a lu mi le, O tse ma bgu!

Eyesu a fa olu

39Eyesu a zhiŋ ogbu a gre Akũ ba Olivi eka baŋ a la a kpo. Moanwyeotum nga a gre ka la ŋa. 40Omba baŋ a ba okro lo nga a nyuŋ mo a lu mi le, Agimi e fa olu okyku o da gimi e tsu e gbu ombambga mbo. 41Ambla he a kye a gre la odzodzõ eka moa a ta ezhim a gbu ma, nga a kʼpu obiŋ nga a fa olu. 42A fa olu a lu mi le, Adugu, o wo boŋ o bmi le, o sko ewu he lo o sku me. O kpo ekplo ba ame e klo angyiŋ mbo, ambo ekplo boŋ o klo. [ 43Anwyeadga ba Ahogbrẽ a zgi Ongyeŋ a ba nga a kũ ŋa. 44Okyku eso e bmye ŋa nga a zga ayi ngre a fa olu ma-me ekyim e zgi egʼba baŋ eka anyuŋ ekyi amanzhli e ygi obiŋ.]

45Ambla baŋ a fa olu a khwo nga, a bla a gre okro moanwyeotum nga a hwiŋ mo enu okyku eshi eso e tpi mo ayi e gre eshri. 46Eyesu a nyuŋ mo a lu mi le, Agimi e ndze enu okyku eshi? Agimi e kso e fa olu okyku o da gimi e tsu e gbu obile mbo.

Moa a vu Eyesu

47Omba baŋ a la a kpla egba nga, moare nzenze a gbu. Eyahuda la a wo akyeŋ eshki moanwyeotum otsko a gre ozhẽ nga moahwõ a lu ŋa ma. A ba okro Eyesu nga a shri anyu baŋ a shri a tka a ba Eyesu. 48Ambo Eyesu a zhĩ Eyahuda a lu mi le, La edgu egŋe oklo hi aŋo o ba okyku o yla Anwye Arehwĩ? 49Omba ba moanwyeotum la a wo ta la Eyesu a ka eka ekplo la é ba e kpo nga, moa a zhĩ a lu mi le, Adigi-odne, o da gi e hli mo la akõ bi mbo? 50Akyeŋ eshki mo nga a hli otuŋ obgori ba awaghrẽ ba anyuŋ-andakʼpo olu ba Ahogbrẽ. 51Ambo Eyesu a tno ma a lu mi le, Agimi e kyu abgo a mo! Aŋa a tka otuŋ ba awaghrẽ lo nga a shaŋ ŋa.

52Ambla he nga, Eyesu a nyuŋ moandakʼpo olu ba Ahogbrẽ, pa la moandakʼpo moanwyeakyuŋ la a kʼpu Anyuŋ-akulu lo, pa la moandakʼpo la a ba okyku o vu ŋa, a lu mi le, Agimi e ba la ákõ, ta la amgbu api eka ba ame e wo are la a gre abgo? 53Ombayaŋ a mbo ba ame e wo ka la gimi Anyuŋ-akulu agimi e ka e klo ozhẽ okyku o vu me mbo. Ambo ekplu ba omba hi e wo okyku gimi ta la ekʼpo ba evbu.

Ebitru a kpo evom Eyesu

54Moa a vu Eyesu a khwo nga, moa a shri ŋa a gre odne ba anyuŋ-andakʼpo olu ba Ahogbrẽ. Ebitru a lu ŋa ma egi ambla ogyugyuŋ. 55Esheshyẽ ba ekpazhi odne lo nga, moa a kpoŋ ovo ma. Ebitru a gre a yi a dzu ma pa la moare la a ghre ovo. 56Omba ba akyeŋ eshki moanwyeshe ba odne lo a ka Ebitru a dzu obiŋ nga, a lu mi le, Alom he a mbo a wo ka la ŋa angyiŋ! 57Ambo Ebitru a dzu evom gaŋ a lu mi le, Ashe, ame e yi ŋa mbo! 58Ambla fi nga alomakyeŋ la a ka ŋa a tspi, a nyuŋ ŋa a lu mi le, Aŋo a mbo o wo eshki mo tli! Ambo Ebitru a tno ma a lu mi le, Alom, ame e wo eshki mo mbo ku-ku! 59Ambla ba awa akyeŋ a kpo nga alomakyeŋ a ba a lu mi le, O wo zheŋ ba are he lo a wo eshki mo, okyku eshi aŋa a mbo a wo a ba Egalili angyiŋ! 60Ambo Ebitru a tno ŋa ma a lu mi le, Alom! Ame e yi ekplo boŋ o la o lu odlo eshri lo mbo ku-ku! Omba ba Ebitru a wo odlo a lu nga, engo e tko. 61Adigi-odne a zhiŋ a ka Ebitru dzo. Omba he lo nga, Ebitru a tne aga odlo ba Adigi-odne a lu mi le, Aŋo ó dzu evom me engyi etra ayga engo é ba e tko anye hi. 62Ambla he nga Ebitru a zgi a gre edzi nga a yi a wu okũ la o vu olo nzenze.

Moa a lu ega a ygi Eyesu nga a yla ŋa

63Moare la a kʼpu Eyesu, moa a lu ega a ygi ŋa nga moa a bga ŋa andzu. 64Moa a shki ŋa ayi nga moa a zhĩ ŋa a lu mi le, O fu eha o ka! Ayi angyiŋ a yla ŋo andzu? 65Moa a lu odlo ba odzi a ygi ŋa nzenze.

Moa a sõ Eyesu ombgu

66La endigiŋ nga, moandakʼpo moaEyahuda, pa la moandakʼpo olu ba Ahogbrẽ, pa la moa la a nye odaŋ, moa a pla emo a shki a khwo nga moa a shri Eyesu a gre okro mo. 67Moa a zhĩ ŋa a lu mi le, Aŋo o lu o da gi, aŋo angyiŋ o wo Emisiya lo? Eyesu a tno mo ma a lu mi le, Ame é lu é da gimi a mbo, agimi é bmi pa la me mbo. 68Nga o wo ba ame e zhĩ gimi odlo le, agimi é tno me ma mbo. 69Ambo a zga omba he lo nga, Anwye Arehwĩ á dzu obgori ba Ahogbrẽ ba ekʼpo pyeŋ. 70Moa mvye a zhĩ ŋa a lu mi le, Aŋo o wo Anwye ba Ahogbrẽ angyiŋ? A tno mo ma a lu mi le, Agimi angyiŋ e lu ba ame e wo Anwye Ahogbrẽ. 71Ambla he nga moa a lu mi le, Agi e klo moa-egŋekyeŋ e gre eka he nga mbo! Agi e sheŋ e gno odlo baŋ pyeŋ bgu!

Currently Selected:

Oluka 22: EGONT74

Highlight

Copy