Oluka 24

Oksongybi

1La endigigiŋ onda Aladi nga, moashe lo a shri awargi la a shka efpi ba moa a kpo a shri a gre ibu ba ongybi lo. 2Omba moa a gbu ma, moa a ka, moa a sheŋ a byiŋ ayaŋ a sku anyu ongybi. 3Okyku eka he nga, moa a gre ma eshyẽ ambo moa a ka okom ba Adigi-odne Eyesu mbo. 4O so mo ayi, nga moa a tspi okro lo, nga moarealom aha la a ygi anzho la a shka ayi leleleŋ a ba a tspi egi ayi mo. 5Eyli e kpo moashe lo nga moa a kŋe a shki obiŋ, ambo moare lo a zhĩ a lu mi le, Okyku eshi agimi e klo are la a wo eso ma eshki moa la a kpu? 6A wo ahe nga mbo. A kso. Agimi e tne aga ekplo baŋ a lu omba baŋ a yi a wo Egalili. 7A lu mi ma o dzu omgbybi ba moa á shri Anwye Arehwĩ á da moaedlobi, nga moa á kũ ŋa okusa egŋe aki, nga Ahogbrẽ á kso ŋa ongybi onda ba otra. 8Ambla he nga moashe lo a tne aga odlo ba Eyesu a lu. 9Moa a zhiŋ ogbu a bla a gre okro moanwyeotum okʼpoakyeŋ lo pa la moahwõ, nga moa a lu ayakplo he lo pyeŋ a da mo. 10Moashe he lo a ri Emeri Amagadaliya, ta la Ojuwana ta la Emeri anaŋ Eyakubu. Moahi lo pa la moashe lo a dzi pa la mo, moa a shri oshpa he lo a shri a kom moa la a nyum oshpa. 11Ambo moa la a nyum oshpa a sko ekplo moashe he lo a lu a zga odlo ototno, nga moa a bmi ba adlidzi pa la mo mbo. 12Ambo Ebitru a kso a knye a gre okro ongybi lo, a gbyle obiŋ nga a ka aknye la a wo ongybi lo sha, a ka ekplokyeŋ a gre eka he mbo. Ambla he nga a bla a gre odne, a la a tne aga ogyugyuŋ eshri ekplo la e kpo he lo.

Ozhẽ ba Emoĩvasu

13O zgi Orushalima o yi Emowasu o wo emil efoha. Onda he lo moarehwi aha akyeŋ a yi Emowasu. 14Moa a lu odlo eshri ekplo la e kpo. 15Omba ba moa a kpla egba eshri ekplo la e kpo nga, Eyesu a gre a yi a dzi pa la mo. 16Moa a ka ŋa ambo moa a ka ŋa a bmye mbo. 17Eyesu a zhĩ mo a lu mi le, Agimi e la e kpla egba e lu ma eshi? Moa a tspi tki la eso la e bili. 18Akyeŋ eshki mo, moa a bzi ŋa Ekliyopa, a zhĩ a lu mi le, Aŋo sha angyiŋ osku ba Orushalima o yi eka ekplo la e kpo omba he mbo le? 19Eyesu a zhĩ a lu mi le, Eshi e kpo? Moa a tno ma a lu mi le, Ayakplo la a kpo ta la Eyesu ba Anazarata. A wo Arehwĩ ba Ahogbrẽ a hom ŋa otum. Ahogbrẽ, ta la moarehwi, moa a ka otum baŋ, ta la odlo baŋ o wo la ekʼpo ma nzenze. 20Moandakʼpo olu ba Ahogbrẽ bi, pa la moareŋ a shri ŋa a di, nga a da mo a sõ ŋa ombgu ba eku. Nga moa a gŋe ŋa egŋe aki. 21Agi e ka ayi ozhẽ baŋ angyiŋ á ba a shla moarehwi ba Esrayila. Ambo egyagi a mbo, olum ba otra angyiŋ o wo anye ba ohe lo o kpo. 22Moashekyeŋ eshki bi a lu ekplo la e wo egbregbre a da gi. Moa a gre ongybi lo endigigiŋ, 23ambo moa a ka okom Eyesu mbo. Moa a bla a ba nga, moa a lu a da gi a lu mi le, Agi e ka okoka, okoka moanwyeadga ba Ahogbrẽ a lu a da gi a lu ma Eyesu a kso ongybi. 24Moakyeŋ eshki bi moa a gre ongybi lo nga, moa a ka ekployaŋ a mbo eka moashe a lu, ambo moa a ka Eyesu mbo.

25Eyesu a shrom mo a lu mi le, Agimi moarehwi la a wo la okaobmye ma mbo! Agimi la e fu oha ta la odlo ba moarehwi ba Ahogbrẽ a hom mo otum a lu! 26O dzu omgbybi ba Emisiya á kpo ewu eka he nga á hwiŋ odzudzu ba ekʼpo baŋ mbo? 27Eyesu a lu ekployaŋ a mbo moa a ta Akpa ba Ahogbrẽ eshri baŋ a da mo. A zga esĩ ta la Akpekpa ba Omusa a ta, nga a gre akpekpa pyeŋ moarehwi ba Ahogbrẽ a hom mo otum a ta.

28Moa a gbu osusku ta la anwye osku moa a yi lo, ambo Eyesu a kpo eka baŋ a bre a yi egi ehwõ. 29Moare he lo a nyuŋ Eyesu a lu mi le, O tspi ahe ka la gi, okyku eshi okyukyku o kpo o hwihwĩ a mo. A bmi nga a tspi pa la mo. 30A dzu okro o ri algo pa la mo otsotse nga a sko agbrotsa nga a vye Ahogbrẽ, a kplu lo a shri a da mo. 31A kpo eka he a khwo nga, ayi mo a hwile nga moa a ka ŋa a tspi. Ambo a blu egi ayi mo. 32Moa a lu ta la emo a lu mi le, Agi e gno oraŋ e gre eshri omba baŋ a lu odlo ba Ahogbrẽ a da gi ozhẽ mbo?

33Moa a kso nga moa a bla a gre Orushalima, nga moa a gre okro moanwyeotum okʼpoakyeŋ lo. Moa a pla emo a shki okrokyeŋ otsotse pa la moahwõ. 34Moanwyeotum okʼpoakyeŋ he lo a nyuŋ moaha lo a lu mi le, Adigi-odne a kso adlidzi angyiŋ! Esima a ka ŋa! 35Moaha he lo a lu a da mo eka ekplo la e kpo ozhẽ, nga eka moa a ka Adigi-odne a tspi omba baŋ a kplu agbrotsa.

Moanwyeotum a ka Eyesu

36Omba ba moa a la a lu oshpa a da mo eka he nga, Adigi-odne eshrishri eŋa a zgi a tspi agʼbaha mo. A lu mi le, Opyapyaŋ o dzu ka la gimi. 37Omba he lo moa a bli la eyli nzenze. Moa a ka ma o dzu mbo ma amu angyiŋ moa a ka. 38Ambo Eyesu a zhĩ mo a lu mi le, Okyku eshi agimi e da eso e ngʼba gimi? Nga okyku eshi agimi e fu oha eka he? 39Agimi e ka abgo me, ta la adga me, ame Eyesu angyiŋ. Agimi e tka me abgo e ka-ka. Amu a wo la ebyi egʼba ta la akukʼpu eka ba ame e wo la alo ma he mbo. 40A lu eka he a khwo nga a tsa mo abgo baŋ, ta la adga baŋ. 41Ekakahelo a mbo moa a bmi ba adlidzi mbo, okyku eshi moa a ka egbregbre nga moa a wo la ovye ma nzenze. Eyesu a zhĩ mo a lu mi le, Agimi e wo la emakyeŋ ba oruri ma ahe? 42Moa a shri ela atsa ba moa a zga lo a shri a daŋ. 43Eyesu a sko lo nga a taŋ egi ayi mo.

44Ambla he nga, a nyuŋ mo a lu mi le, Ame e lu edgu ayakplo he angyiŋ e da gimi omba ba ame e yi e wo ka la gimi. Ekployaŋ a mbo ba moa a ta eshri me odaŋ ba Omusa, ta la akpekpa moarehwi ba Ahogbrẽ a hom mo otum, ta la Akpa ba Ohlueshko, o dzu omgbybi ba alo é bli. 45Ambla he nga a hwile mo eso mo okyku o da mo a ka Akpa ba Ahogbrẽ a bmye. 46A nyuŋ mo a lu mi le, Moa a ta akpa a lu mi le, O dzu omgbybi angyiŋ ba Emisiya á ba a kpo ewu nga ba moa á kso ŋa ongybi olum ba otra. 47Nga la eshko baŋ moa á nyum oshpa okyku oghwobiŋ, ta la okyuabgombgu okyku moarehwi ba obiŋ hi pyeŋ. Moa a zga esĩ Orushalima. 48Agimi e wo moaegŋe angyiŋ okyku ayakplo he lo. 49Ame é da ekplo ba Adugu a hwim a zga ma, é gile é ba eshri bimi. Ambo o dzu omgbybi ba agimi e dzu e bli ekʼpo osku he lo, o tsa ba moa á da ekʼpo lo e gile e zgi ongyeŋ e ba e gile eshri bimi.

Moa a sko Eyesu a gre Ongyeŋ

50Ambla he nga a da moa la a wo ka la ŋa a gre anwye osku ba moa a bzi lo Ebetanya. Ahe angyiŋ a si abgo baŋ ongyeŋ a fa anyuadzi a ygi mo. 51Omba baŋ a la a fa anyuadzi a ygi mo eka he lo, a ngʼba a sku mo nga moa a sko ŋa a gre Ongyeŋ. 52Omba he lo moa a bli la ovye. Moa a hlu ŋa eshko a khwo nga, moa a bla a gre Orushalima. 53Moa a gre Anyuŋ-akulu ombamba pyeŋ, nga moa a vye la Ahogbrẽ.

Currently Selected:

Oluka 24: EGONT74

Highlight

Copy