Yoane 13

Yesu wafula alondeshi amulu

1Ngi nkolelo ya wanda ukulu uwa Pasaka, Yesu wamanile fino amanda yaakwe iyasila akufuma kuno ukushi ukuya kuli Tata, nawe wakunda antu yaakwe kimo ukushi, wayakunda chimwi. 2Na pa chakulya amangushi, chiwa walile atatela Yuda umwana wi Simoni Iskaliote um-mweso, ukuti amfime. 3Na Yesu wamanile fino Tata wampa fyoshi um-makasa yaakwe, na fino wafumile kuli Leesa nawe ayile kuli Leesa. 4Watinile apa chakulya, wawika imyenda yaakwe uku mbali, watola ichitambala, wanyepa umu nsana. 5Nga atela mansi un-chogelo, atampa ukuyafula mulu alondeshi nu kuyapulukusa ni chitambala chino walile watanyepa umu nsana. 6Nga awisa kuli Simoni Petlo. Wene wannena, waati: “Mwene, wewe unfule nene amulu?” 7Yesu wannena, waati: “Chino nduchita li kwene utachimanyile, leelo uluchimanya ichisila.” 8Petlo wannena, waati: “Wewe utangi unfule amulu nanti uche.” Na Yesu wannena, waati: “Ngi ntakufusile, usi ninkula ponga nene.” 9Simoni Petlo wannena, waati: “Mwene, nfula asa mulu yane mpela, leelo na makasa yane nuntwe wane kwene.” 10Yesu wannena, waati: “Wino watafulala asi na chimwi, siku ukufula amulu mpela, leelo umwili wonsi uswefile Nemwe mwaswepa, leelo asi mwensi.” 11Kimo wamanile wino alumfima; ichino wafwasile ukuti: “Asi mwensi yano mwaswepa.”

12Nga pano wayafula amulu nu kutola imyenda yaakwe nu kwikala kaili, wayanena, waati: “Chene! mwamanya chintu chino namuombela? 13Mwemwe mulungita muti: ‘Kasambilisha,’ nu: ‘Mwene.’ Mulutaka ningo, kuno ifino ndi. 14Ali ngi nene ndi Mwene na Kasambilisha namufula amulu, chingamusipila nemwe kwene ukufulana amulu. 15Kuno namupa ichilangililo, ukuti ndi fino nene namuombela, ifino nemwe ombangi. 16Umwenemo, umwenemo, ndumunene: Umuofi atangi alute umwene wakwe, nanti katumwa atangi alute wino amtumile. 17Ngi mwamanya ifintu fi, muli ni nkata ngi mwafiomba.

18“Ntalumufwangila mwemwe mwensi; manile yaya yano nasolwile, leelo kuti Ilyandiko lifikilile ukuti: ‘Wino alile ichakulya chane, wankatusisha akantunta kakwe.’ 19Kufuma li kwene ndumunena lino chichili chiloleke, ukuti pano chaloleka, musumile fino nene ndi wenewe. 20uMwenemo, umwenemo, ndumunena: Uwacha wapokelela untu wensi wino ntumile, aluwa atampokelela nene, nuwa mpokelela nene aluwanga atampokelela wino wantumile.”

Yesu walanga Yuda Iskaliote

(Mt 26:20-25; Mk 14:17-21; Lk 22:21-23)

21Nga pano wafwanga ifintu fiyo, Yesu asima ummweso, alanda ukuti: “Umwenemo, umwenemo, ndumunena: Umwi pali mwemwe wanfima.” 22Alondeshi yalolana nanti kumanya ngalutaka wini. 23Nga kwali unnondeshi waakwe wenga wino Yesu wakunda, wasekamile apa chifuwa chi Yesu. 24Nga Simoni ansinisha, annena, ati: “Tondosha, alutaka wini?” 25Nga nawe wino wasekamila apa chifuwa chi Yesu, wamtondosha, waati: “Mwene, uwini?” 26Nga Yesu wannena ukuti: “Untu wino nasondela itonje nu kumpa.” Wasonda itonje, wapa Yuda, umwana wi Simoni Iskaliote. 27Pano walya itonje, Shetani amwingila. Nga Yesu, wannena, waati: “Chino uluomba, ombanga suwa.” 28Nga pali yano yali apa chakulya, kusi wino wamanile kuno ichani wannena fiyo. 29Kuno yamwi yaatile, fino Yuda akulusenda imbokosi, Yesu wannena ukuti: “Ukale fino tulusita uku wanda ukulu,” nanti: “Ukupa apina chimwi.” 30Nga wene pano wapokelela itonje liyo, amfuma liyo kwene; nao wali usiko.

Chilangaso chipya

31Nga pano wafuma, Yesu ati: “Li kwene watensiwa uMwana-ntu, na Leesa watensiwa munali. 32Ngi Leesa nawe watensiwa muli wenewe, Leesa aluntensha munali umwisikikulu, nawe wamtensha liyo kwene. 33Mwe yana yanono, nchili ndipo uche ponga nemwe, mulunsitai, ndi fino nanenile aYudea, ukuti: ‘Kuno nduya, mwemwi mutangi mukwise,’ ifino nemwe kwene namunena.

34“Ichilangaso chipya namupa: mukundane; ndi fino namukunda mwemwe, nemwe kwene ifino mukundane. 35Apano na antu yoshi yalumanya fino mwawa alondeshi yane, ndi mwakundane.”

Yesu walanda fino Petlo wammkana

(Mt 26:31-35; Mk 14:27-31; Lk 22:31-34)

36Simoni Petlo wamtondosha, waati: “Mwene, nga wanja kwi?” Yesu wannena, waati: “Kuno njile, utangi undondele apa kasalaka, leelo ulundondela apa chisila.” 37Petlo wannena, waati: “Mwene, kimo ichani ntangi nkulondele apa kasalaka? Ichakuti chikulye wewe, chikundya nene.”

38Yesu wannena, waati: “Chene! Wewe wanfima upuma wako pali nene? Umwenemo umwenemo, ndukunena: Nkolwe asulamula kufika lino wewe wankana amaila yatatu.

Currently Selected:

Yoane 13: FNT1988

Highlight

Copy