Yoane 21

Yesu kuli yemba wa Tibelia

1Ichisila cha ifintu vi Yesu auswelula kali uku alondeshi yaakwe pali yemba wa Tibelia, Nawe wauswelwile vi. 2Simoni Petlo na Toma wino yatangi Ipasa, na Natanieli wa ku Kana ya Galilea, na ana yi Zebedeo na alondeshi anji yaili yali pali ponga. 3Simoni Petlo wayanena, waati: “Naya ukuyuwela inswi.” Nayo yannena, yaati: “Neswe kwene twanja ponga newe.” Nga yankatuka ukupita yankwela um-wato. Leelo usiku uo yatapasile chimwi. 4Nu ntondo pano kwacha, Yesu wimilile umbalama, leelo alondeshi yatamanyile fino i Yesu. 5Nga Yesu wayanena, waati: “Yanane, muli ni nyenyi?” Yaati “Awe!” 6Wayanena, waati: “Sumbini isumbo ukwi lunji lya wato, nemwe mwannonda.” Nga yasumba, nga kaili yapotwa ukuukwesa kuno inswi zyavula. 7Nga unndondeshi wiwi wino Yesu wakunda, wannena Petlo, waati: “Umwene!” Nga nawe Simoni Petlo pano wapulika fino uMwene, wanyepa umwenda waakwe (kuno wali tupu) aitivya muli yemba. 8Na alondeshi yanina yiza um-wato, kuno yatali ukutali nu mbalama, yangawa makasa imyanda ili, na kuno yalukwesa isumbo lino lili ni nswi. 9Nga pano yika ukalusele-senga, yalola umoto wa makala ni nswi itipanikwa penepo nu nkate. 10Yesu wayanena, waati: “Letini pa inswi zimwi zino mwafuma mwela li kwene.” 11Nga Simoni Petlo aya um-wato, akwesela isumbo undusele-senga, lizyuzile inswi inkulu, umwanda na makumi yasano na zitatu; nanti fino zyavula fiyo isumbo litachili lilepuke. 12Yesu wayanena waati: “Nguni mutisye indoto.” Leelo kutali umwi apa alondeshi yaakwe wino wezizye kumtondosya, ati: “We weni?” Kuno yamanyile fino uMwene. 13Yesu awiza atola unkate ayapa, ninswi kwene.

14Liyo ilya utatu Yesu ukuuswelula uku y alondeshi yaakwe, ichisila cha kuzyuka uku yafwi.

Yesu wavwanga na Petlo

15Nga pano yalya, Yesu wanena Simoni Petlo, waati: “Simoni, mwana wi Yoane, wewe wankunda ukuluta ya?” Wannena, waati Endita Mwene, wewe umanyile fino nakukunda,” Wannena, waati: “Upaye ana ya nfwele zyane ichakulya.”

16Wannena kailiilya uwili; waati: “Simoni, mwana wi Yoane; wankunda? Wannena, waati: “Endita, Mwene, wewe umanyile fino nakukunda.” Wannena, waati: “Uchemanga infwele zyane.”

17Wannena ilya utatu, waati “Simoni, mwana wi Yoane, wankunda?” Petlo alola malanda, kuno wannena ilya utatu, Waati: “Wankunda?” Wannena, waati: “Mwene, wewe umanyile vyonsi, wewe umanyile fino nakukunda.” Yesu wannena, waati: “Upae infwele zyane ichakulya. 18Umwenemo, umwenemo, ndukunena: Pano wali unnumendo, waunyepanga wenkola nukuya kuno ukasime, leelo pano wacha wawa nkombo, ulukatusya makasa yako, nunji alukunyepa nu kukusenda kuno utakasime.” 19Wavwanzile fiyo ukummanyisya infwa chi yino alufwa, nu kutensya Leesa kuli yeneyo. Nga pano wavwanga fiyo, ati: “Ndondela.”

20Petlo asenuka, alola unndondeshi wino wakundikwa na Yesu alondile; (Nawe uwino wasekime apa chifuwa chakwe pano yalyanga ichakulya cha manguzi, ati: ‘Mwene, uwini wino alukufima?’) 21Uwino Petlo walola, wanena Yesu Waati: “Mwene, nga nawi?” 22Yesu wannena, waati: “Ngi kasime ukuti angalipo ukufika lino nacha niza, ungakanila chani? Wemwi ndondela.” 23Nga iswi liyo lilumbuka unjanina fino unndondeshi wiyo atalufwa. Leelo Yesu atannenile fino atalufwa, leelo waatile: “Ngi nkasime ukuti angalipo ukufika lino nacha niza, ungakanila chani?”

Kumalila

24Alawi alu nnondezi wino wimikila, uwino waandike ifintu vi, neswe tumanyile fino usyuta waakwe uwa kapanga.

25Nga kuli ni ifintu ivinina tupu fino Yesu Wachisile; fino ngi vyandikwa chonga chonga, ndwelengula palumwi ni nsi yachepa, vitangi vilimbe ivitabu fino vingaandikwa.

Currently Selected:

Yoane 21: FNT1988

Highlight

Copy