Yoane 3

Yesu na Nikodemo

1Pali untu wenga uwa aFaliseo, isina lyaakwe i Nikodemo, uwikolo wa a Yudea. 2Wene waile. ushiku kunali, wannena, waati: “Labi, tumanyile fino we Kasambilisha wafuma kuli Leesa; kuno kusi untu wino angachita ifipeshamano fi fino uluchita wewe, ndi Leesa asi ponga nawe.”

3Yesu wannena, waati: “Umwenemo, umwenemo, ndukunena: untu ndi atafilwe amaila yaili, atangi alole uwene-wi-Leesa.” 4Nikodemo wamtondosha, waati: “Angafyalwa uli untu ndi wawa uwikolo? Angingila un-nda yi nyina afyalwe ilya uwili?” 5Yesu wannena, waati: “Umwenemo, umwenemo ndukunena: untu ndi atafilwe uku mashi nu ku Mweso, atangi awingile um-wene-wi-Leesa. 6Chino chafyalwa uku mwili, umwili; na chino chafyalwa uku Mweso, umweso. 7Utachisyunguka fino nakunena, nati: Mungale mufyalwe lya uwili. 8Unsa ukulusuma na kuno ukasime, nunsumo waakwe kuupulika, leelo angi utamanile kuno ufumile na kuno uyile: ifiyo kwene nuntu wino wafyalwa uku Mweso.”

9Nikodemo wannena, waati: “Chingawela uli ukuwa fiyo?” 10Yesu wannena, waati: “Newe we Kasambilisha wa Islaeli, ni ifintu fi utafimanile? 11uMwenemo, umwenemo, ndukunena: fino lili lino tulimanile, tukululivwanga, na lino twalola tukululilanda, nu kulanda kwitu mutalukusumila. 12Ngi namunena ifya kunsi, mutalusumila, mulusumila uli ngi namunena ifya mwiyulu? 13Kusi untu wino watana wakwela umwiyulu, siko wino wika ukufuma umwiyulu, ali Mwana-ntu.

14“Ndi fino Mose wimike insoka yiyi unnusanga, ifino nu Mwana-ntu kwene awimikwe. 15Ukuti chila ntu wino wasumila, awe nupuma wa manda ti mnali. 16Kuno yiyo Leesa wakundile aya munsi, ichaleka wafima uMwana waakwe wafilwe wenga, ukuti chila ntu wino wamsumila, atalowa, leelo awe nupuma wa manda ti. 17Kuno Leesa atatumile uMwana ukuya munsi ukuti ayaputula imilandu, leelo aya munsi yafyukile kuno ali. 18Wino wamsumila ataluputwilwa imilandu; wino atasumile wataputulwa undandu, kuno atasumile isina lya Mwana wi Leesa, wafilwe wenga. 19Nau uli uputusi wa milandu, kuno umwengelela wisa ukunsi. na antu yakunda ichanda ukuluta umwengelela, kuno ifintu fino yaluchita fyawipa. 20Kuno chila ntu wino aluchita ifiipe, akulutuwa umwengelela, atangi awise uku mwengelela, kuno atakasi milimo yaakwe iloleke apatiswe. 21Leelo wino aluomba ifya chumi akuluwisa uku mwengelela, ukuti imilimo yaakwe iloleke apatiswe fino iluombeka muli Leesa.”

Yesu na Yoane Kabatisha

22Ichishila cha ifintu fiyo, Yesu na alondeshi yaakwe yapita ukuya un-nsi ya a Yudea; alinda kweneko ponga nayo, angi alubatisha. 23Yoane nawe wabatishanga uku Ainoni, apipi ni Salimu, kuno kuwo amasi yafusile; na antu yaya kunali, yabatisiwa. 24Kuno Yoane walile achili anyepwe.

25Nga yumanya ulupaka alondeshi yi Yoane nu mYudea wenga uku nnandu wa kufulala, 26Yaya kuli Yoane, yaati: “Labi, wino wali ponga newe umbalama yi Yordani, wino wamtakanga, lolini, alubatisha, na antu yoshi yaluya kunali.” 27Yoane wayanena, waati: “Untu atangi apokelele chimwi, siko ndi wapiwa ukufuma umwiyulu. 28Mwemwe mwe yakola mululanda fino nafwansile, inti: ‘Inene asi ne Klisto, leelo ntumilwe uku nkolelela.’ 29Wino ali na nawinga ali siwinga; leelo chinsindi wi siwinga wino alwimilila nu kumpulika, aluchimbila nkani iswi li siwinga. 30Ichino fi ukuchimba kwane kukufika. Wene mpaka andushe, nene nchepe.”

31Wino aluwisa ukufuma umwiyulu, alusile yoshi; wino uwa munsi, wene uwa munsi, alufwanga ifya munsi. Wene wino alwisa ukufuma umwiyulu, alusile yoshi. 32Fino wawine nu kufipulika ifino alulanda, leelo kusi umwi wino alupulika amaswi yaakwe. 33Wino wasumila amaswi yaakwe, watela akamanyililo fino Leesa uwa chumi. 34Kuno wino watumilwe na Leesa, akululanda amaswi yi Leesa, kuno atakufumya uMweso uku kulinganya. 35Isi wakunda uMwana, nawe wampa fyoshi um-makasa yaakwe. 36Wino asumila uMwana ali nupuma wa manda ti; wino atasumile uMwana, atalulola upuma, leelo ukali wi Leesa umwikalile.

Currently Selected:

Yoane 3: FNT1988

Highlight

Copy