Luka 20

Kutondosha Yesu apa maka yaakwe

(Mt 21:23-27; Mk 11:27-33)

1Walangi uwanda umwi pano wasambilishanga antu un-ng'anda-nkulu-iyi-Leesa, nu kusundi Iswi-sipe, ayikolo iyakapela na yakaandika yaile ponga nakombe. 2Yannena, yaati: “Utunene, aluomba ifintu vi uku maka chi? Kaili uwini wino wakupa amaka ya?” 3Ayanena, ati: “Nene namutondosha iswi lyonga, mnene. 4Ulubatisho lyi Yoane, Chene! lwafumile ukwiyulu nanti uku antu?” 5Yatondosyana akola na akola, yaati: “Ngi twati: lwafumile umwiyulu, akuti: ‘Nga uku chani mutansumile?’ 6Na ngi twati: ‘Lwafumile uku antu,’ antu yoshi yakututama na mafinga, kuno yasumile Yoane fino ilau.” 7Nga yaati: “Tutamanyile kuno lwafumile.” 8Yesu ayanena, wati: “Nene kwene nsumunena uku maka chi yano nduchita ifintu fi.”

Alimi ni chalo cha mizabibu

(Mt 21:33-46; Mk 12:1-12)

9Nga atampa ukunena antu unnumbe u wati: “Untu wenga wapesile ichalo cha mizabibu; awika alimi, nga apita um-masi; ayawikala manda tupu kweneko. 10Ngu um-macha atuma umuofi uku alimi yao, ukuti yampe ifisêke fimwi ifya mizabibu; leelo alimi yamuma, yamwinga minwe. 11Atuma umuofi unji; yamuma nawe kwene yamsekelisha, yamwinga minwe. 12Kaili atuma uwa utatu; nawe kwene yamuma uluma, yamkwesela ukushi ya chalo.

13“Ngu nkola chalo cha mizabibu wati: ‘Nanchita uli? Nantuma uMwanane wino nakunda; palumwi wene yalumchindika.’ 14Leelo walangi pano alimi yannola, yamba uku mbali yonga, yaati: ‘Alawi uli mpyani; Ali! tumumole; ukuti tupyane.’ 15Nga yamsumba ukushi ya chalo cha mizabibu, yamumola. Ali unkola-chalo cha mizabibu aluyachita uli? 16Alwisa nu kuumola alimi yao, ni chalo icha mizabibu alupa anji.”

Walangi pano yapulika fiyo, yaati: “Awe, chipelele ukutali.” 17Ayakundwila amanso, wati: “Nga fwandi, ukulikuti chani iswi li, lino lyandikwa:

‘Ifinga lino yakakula yasula

ilino lyawa ifinga ikulu ilya kumbali?’

18Untu wensi wino waponela apifinga liyo, alufunekafuneka, na wensi wino lyaponela, alushika swe.”

19Nga yakaandika na ikolo iyakapela yakasime ukunnema liyo kwene, leelo yopa antu. Kuno yamanyile fino unnumbe uo ayumile akola.

Kulipa Kaisali ikodi

(Mt 22:15-22; Mk 12:13-17)

20Nga yantya, yatuma antu kuyunengula, yano yauchisile fino antu ya kapanga, ukuti yapulike chino walanda, nga yamtwale kuno kuli amaka nu ukulu wa nnâsi. 21Nga yamtondosha, yaati: “Kasambilisha, tumanyile fino ululanda nu kusambilisha ningo, utalondile ukulu wa antu, leelo ulusambilisha insila yi Leesa, iya kapanga. 22Chili ningo ukupa Kaisali ikodi nanti awe?” 23Leelo wene wamanyile uchenjesu wao, ayanena, wati: 24“Ndangini ulupia. Luli ni chata na maandiko yini?” Yannena, yaati: “Ayi Kaisali.” 25Nga ayanena, wati: “Ifyi Kaisali, mpini Kaisali, ni fyi Leesa, mpini Leesa.” 26Nga yatachili yanneme uku maswi yaakwe apa antu. Yasunguka uku mifwangile yaakwe, yantusha.

Apa ututuluko

27Nga aSadukeo yamwi yaya kunali, yano yakuluti kusi ukututuluka kwa antu, nga yamtondosha. 28Yaati: “Kasambilisha, Mose watwandikile fino untu ndi wafwilwa unnina nawe ali nu nchi, leelo asi nu mwana, atole umwanachi wiyo, kuti afyale nawe. 29Nga kwali antu saba, anda yonga; uwa ntangulo wapindwile, afwa nanti mwana. 30Nu wa uwili atola unchi wiyo, afwa nanti mwana. 31Fika nu wa utatu wamtola, apalinji yoshi saba yafwa nanti kusha ana. 32Ichisila nu mwanachi kwene afwa. 33Nga apa kututuluka aluwa inka wini? Kuno wasasilwe na yoshi saba.”

34Nga Yesu ayanena, ati: “Ana ya nsi yi yakulupindula nu kupindukwa. 35Leelo yano yasanwa yasipila ukufika uku nsi ilye, nu ku kututuluka kwa afwi, yatalupindula nanti ukupindukwa. 36Kuno yatalufwa kaili, kuno yaluwa wi yamalaika, nayo ana yi Leesa kuno ana ya kututuluka. 37Leelo uku nnandu wa afwi fino yalututuluka, na Mose kwene walansile apa katûtu, pano watasile uMwene, ati: ‘Leesa wi Ablahamu na Leesa wi Isaka na Leesa wi Yakobo.’ 38Wene asi Leesa wa afwi, leelo uwa apuma, kuno yoshi yatensi kunali.” 39Yakaandika yamwi yannena, yaati: “Kasambilisha, walanda ningo.” 40Nga yatesishe kumtondosha chimwi ichisila cha ifintu fi.

Mwana nu Mwene wi Daudi

(Mt 22:41-46; Mk 12:35-37)

41Ayanena, wati: “Yakulutuli antu, fino Klisto umwana wi Daudi? 42Kuno Daudi unkola kwene un-chitabu cha Sabuli afwansile, wati:

‘Mwene wanenile uMwene wane:

Uwikale ikasa lyane ilya kwilunji.

43Fika na lino nduwika asiluembu yako,

yawe ichisumbi apa kuwikila amulu yako.”

44Ali ngi Daudi alumwita uMwene, wawa umwanakwe uli?”

Yesu wasokesha antu kuli yakaandika

(Mt 23:1-36; Mk 12:38-40)

45Na pano antu yoshi yampulikisyanga, anena alondeshi yaakwe, wati: 46“Chenjelelini yakaandika, yano yakunda ukupitana yaswite nkanjo intali, nu kulaulwa um-masokoni, nu kwikala uku nkolelo un-ng'anda shi Leesa, na pa fisumbi fya nkolelo apa fyakulya. 47Yalulya inganda sha asimbe, nu mu ufi wao yauchita fino aya chumi, yalumbulula apa kupepa; wene yao yalunwamilwa nuputusi.”

Currently Selected:

Luka 20: FNT1988

Highlight

Copy