Jipoxolo 7
7
O kufunda kua Xitevá
1Nganga ia dikota uibhula Xitevá, uixi: Imʼ iii iedi kiebhi? Ia kidi? 2Kuala Xitevá: Enu jiphange mu akuetu, ni enu mu jitata, ivenu: O Nzambi ia fuma, ua tukulukidile kukululuʼetu Mbalahamu, kia kexile mu Mezopotâmia, kuila kiluua a tunga mu Halane. 3Nzambi anga u mu ambela, uixi: Tunda mʼoxi ié, ni mu jindandu jé, uize mʼoxi ioso i nga kà ku idikiza Eme. 4Kieniokio muène a nga u tunda mʼoxi ia akua Kaladeia, hé u tunga mu Halane. Bhenhobho ki afu tatʼâ, Nzambi ua mu tauisa dingi katé mʼoxi iii i mu tungu leluʼidi. 5Nzambi muène, Mbalahamu ka mu bhana-mu kibatu kia kulundula, né kia soko ngó kujika o dikanda diê dia dinama. Maji Nzambi anga u ta kikutu kia ku mu bhana-iu ku ivua, ni ku i bhana o mbutu iê ku i lundula. Sumbala Nzambi ki a te o kikutuʼiki, Mbalahamu ka moneka luua mona. 6Nzambi anga u mu tangela kiki, kuma: Mbutu ié a kà kala mu inhunginu mʼoxi iengi, kuenioko a kà a bhikisa, ni ku a bhanga phulu mu hâma jiuana ja mivu. 7Nzambi anga uila dingi, uixi: Akua ʼxi ioio-phe oso a kà a bhikisa, nga kà a bhana kaxtiku, eme ngi Nzambi, o ki ki zubha o kubhita, a kà tunda mʼoxi omo, hé a kéza ku ngi sedivila bhu kididi kiki. 8Nzambi anga u bhana Mbalahamu o kikutu kia kusaia, mu umbangi ua ioso ia mu tangela. O mu kumbidila kikutuʼiki, Mbalahamu iú ua vuala monʼê Izake, anga u mu saia, ki ala ngó mu nake dia izuua. O Izake kia vuala Jakobo, ua mu saie ue. O Jakobo u vuala kuinhi dia kukululu ni kiiadi, hé u a bhanga kiòmuene.
9O jikukululu kia kuata dixinga dia Zuze, a mu sumbisa mu Ijitu. Nzambi-phe u kala-nê, 10Hé u mu kudila mu malamba mê moso. O Zuze kia tukuluka kua Falaó, Nzambi u mu muesa ujitu ni unjimu bhu pholo ia Falaó sobha ia Ijitu. O Falaó anga u mu bhanga nguvulu ia Ijitu, ni ia ku tumina dibhata diê dioso. 11Kieniokio-phe kukala nzala i bhita mʼoxi ioso ia Ijitu, ni ia Kaná, ni phaxi iavulu! Jitata jetu kà muene kudia. 12Mu kubhita thembu, Jakobo-phe ki evu kuila sai masa mu Ijitu, u katula jitata jetu njila iadianga. 13Ku njila ia kaiadi Zuze u di tukulula ku jiphange jê, o Falaó anga uijiia o muiji ua Zuze. 14Zuze anga u tuma kutakana tatʼâ Jakobo, ni ndandu jê joso, mbé eze mu Ijitu. Ene a kexi makuinhi sambuadi a mienhu ni kitanu. 15Jakobo anga u kulumuka mu Ijitu, o muène anga u fila momo ni jitata jetu. 16Imbi iâ anga a i ambata hé eza na-iu mu Xikeme. Anga a a funda mu mbila ia sumbile Mbalahamu, mu kitadi kia phalata kua anʼ a Hamolo, mu Xikeme. 17Kia zukama-phe mu thembu ia Nzambi kukumbidila o kikutu kia tele ni mulôko bhu kaxi kê ni Mbalahamu, o mundu uetu u kula anga u sokoloka kiavulu mu Ijitu. 18Hé a kala kieniokio katé ki eza-ku sobha iengi mu Ijitu, kejiia Zuze. 19Sobha muenʼiú anga u dimukina muiji uetu, u bhanga jitata jetu usueia, hé u a bhangesa kutexi tuana tuâ, phala ka kole muenhu. 20O mu thembu ieneʼ oio, muene mua vuala Mozé, anga u kala mona ua uabha kiavulu. O jitata jê hé a mu sasa mbeji jitatu mʼ onzo. 21Maji o kia mu texi, monʼ a Falaó, ua muhatu, u mu bonga, anga u mu sasa kuma monʼ ê. 22Kieniokio Mozé anga a mu longa unjimu uoso ua akua Ijitu, anga u kala mesene mu ima ioso ia zuela, ia bhanga.
23Xitevá uambe dingi, uixi: O kia kala-phe mu kutenesa makuinhi a uana a muvu, kia mu iza ku muẋima o kuhindula phange jê, anʼ a Izalaiele. 24O kia sange-ku muthu ua tokala ku muiji uê ala ku mu bhanga usueia, u mu zokelela, u lungisa iú a mu mu bhikisa, mukua Ijitu u mu jibha. 25Mozé muene ua fikile kuma o phange jê a kʼijiia ue kuma Nzambi, ku lukuaku lua muène, uandu tuma ku a kudila; mbé ene-phe ka kʼ ijiia. 26Kukia ni kimene, u sanga dingi akua Izalaiele kiiadi ala kuzoka anga u sota ku a bheka ku paze, uixi: Enu jingana, muala mu jiphange, mu di bhangela-hi usueia? 27Iú-phe, ua kexi mu bhanga mukuâ o usueia, u mu baula, uixi: Eie nanhi ua ku bhange kukala u dikota dia ku tu fundisa etu? 28Kifua eie uandala u ngi jibha uila ki ua jibha mukua Ijitu mazá? 29Mozé anga u lenga ki evu o kizueluʼiki, hé u kala mutunganhi mʼoxi ia Midiiana. Kuenioko anga u vuala-ku anʼ aiadi.
30Kia zubha kubhanga-ku makuinhi a uana a muvu, kua mu tukulukila anju, mu mulengu ua túbhia tua mu uama mu kisasa, mu kikangalakata kia mulundu ua Sinai. 31Mozé kia ki mono, ua di uana kisuma! O kia sota kuzukama-ku mu kutalesa kiambote, ku tunda dizui dia Ngana, uixi: 32Eme ngi Nzambi ia jitata jenu, Nzambi ia Mbalahamu, ni Izake ni Jakobo. Mozé anga u teketa ni uôma, ka bhumina dingi kutalesa-ku. 33Bhenhobho Ngana u mu ambela, uixi: Zula o jisabhatu jé ku inama, kuma kididi ki uemana, mavu a kôla. 34Nga tongolola muene o phaxi ia mundu uami mu Ijitu, ngevu o kukema kuâ. Eme nga tuluka mu ku a kudila. Kiki eie nganda ku ku tuma ku Ijitu.
35Xitevá uamba dingi uixi: Mozé imoxi iii, a mu ditunine kuala anʼ a Izalaiele, exi: Eie nanhi ua ku bhange kukala u dikota dia ku tu fundisa etu? Muene Mozé a mu tumu kuala Nzambi kukala dikota, ni mukudi, ku lukuaku lua anju ia mu tukulukila mu kisasa. 36Muene muthu ua katula anʼ a Izalaiele mu Ijitu, iú ua endesa jinjila, kia zubha kubhanga madiuanu ni isuma mu Ijitu, ni mu Kalunga Kakusuka, ni mu kikangalakata, mu makuinhi a uana a muvu. 37Muene Mozé umoxiʼú u tangela anʼ a Izalaiele, uixi: Ngana hadia ua kà mi zangelekela mu ʼaxaxe ka jiphange jenu enu-enu, polofeta mukuâ ni eme. 38Mozé muene anga u di bhongolola ni mundu ua Izalaiele mu kikangalakata, anga u kala momo kumoxi ni jitata jetu ni anju ia mu zuelesa ku Mulundu ua Sinai. Mozé muenʼiú muene ua tambuile o mizambu ia muenhu kua Nzambi phala ku tu bhana na-iu etu.
39Muenʼiú-phe jitata jetu ka ẋikinine ku di tuma-nê, maji a mu tènde a-nga ku miẋima iâ enda a vutuka ku Ijitu. 40Hé a tangela Alá, exi: Tu bhangele jinzambi, jinzambi ji tu songuela ku pholo. Kuma o Mozé muenʼiú, ua tu songuela mu ku tunda kʼ oxi ia Ijitu, ki tuejiia kioso kia mu bhiti. 41Anga a bhanga kidifua kia monʼ a ngombe mu izuuʼomo, hé a jibha ibhaku mu satela o kiteka. Anga a bhanga fesa mu kubhana ujitu ni mu sangulukila o kimbamba kia kalakala ene ni maku mâ. 42Maji o Nzambi-phe ua a sondoloka, iú ua ehelela kusedivila o kifuẋi kia jithethembua ja diulu, kala kia ki soneka mu divulu dia jipolofeta, exi:
Kifua Eme-muene mua ngi bhakuilile jixitu jojibhe ni jisata,
mu makuinhi a uana a muvu mu kikangalakata,
enu dibhata dia Izalaiele?
43Oko mua nhata jinga o balaka ia Moloko,
ni thethembua ia nzambi ienu Lefani,
o iteka i mua bhangele phala kubheza.
Mu kiki-phe ngi mi balakala katé kuema dia Babilonia.
44Jitata jetu ja kexile ni balaka ia kikutu kia Nzambi mu kikangalakata. Balaka ieneʼoio a i kalakala kala kia lekela muène Nzambi anga u tangela Mozé kuma a i bhange, isokela ni kidifua kia mu idikiza. 45O iene kia i lundula o jitata jetu, eza na-iu ni Josuué kia bokona mu bhingana mʼoxi mumu mua kaiesa Nzambi o matumbu ku pholo ia jitata jetu. Anga a kala kienʼiki katé mu izuua ia Davidi. 46Davidi iú, anga u mona kuzediua ku mesu ma Nzambi, hé u bhinga kua Ngana phala ku mu ehela kuila Nzambi ia Jakobo u mu tungila dibhata. 47Maji Salomá-phe muène ua tungu onzo ia Nzambi.
48Sumbala Ió Uasuka ku Ukota kene kutunga mu jinzu jokalakale ni maku ma muthu, uila kia tange o Polofeta, uixi:
49Diulu kiandu kiami,
oxi bangu iami ia kutula inama.
Enu-phe mu ngi tungila onzo ia kidifua kiahi?
Kididi ki kuebhi ki ngi tula phala dinhohenu?
50Manhi lukuaku luami ki luene lua bhange o imbamba ioso iii?
51Mu kuzumbuka Xitevá, uixi: Enu mua thathamena-hi kiosuʼiki, tata! Mua kolela-hi kinéne o muẋima, matui a mi xiluka, mua lémbua kuivua o maka ma Nzambi! Enu izuua ioso mua di bhange kala o jitata jenu, nuka mu kamba kuẋinukina o Nzumbi Ikôla! 52Polofeta kuẋi jitata jenu ja kambele ku mu zukutisa? Ene a jibha jinga o akunji a Nzambi, ió oso a tuamene kuidikiza mʼ ukulu kianda kuiza o Muthu Uaiuka. O Muène kiki enu mua mu bhakula, enu mua mu jibha; mu ijibhanganga iê. 53Enu mua tambula o Kitumu mu kusedivila kua ji-anju, ku ki kumbidila-phe mua ki tokoka!
O kufua kua Xitevá
54Kienʼiki ene oso a tokala ku Kionge kia Jitata ki evu o makʼ ama, a saluka dingi kiavulu, hé a mu kokotela ku mazu. 55Maji muène-phe uezala ni Nzumbi Ikôla, u tonginina mu diulu anga u mona o kubenha kua Nzambi. Ua mono ue ni Jezú uemana ku madilu ma Nzambi. 56Bhenhobho uixi: Talesenu! Nga mono diulu dia jikuka, ni Monʼ a Muthu uemana ku madilu ma Nzambi!
57Ene-phe matui a ma jika, a di kola bulukutu, hé a di lukula muenhu umoxi ku thandu diê. 58A mu kukila ku kanga dia mbonge, anga a mu bûba ni matadi. O jimbangi anga ji tula izuatu iâ bhu inama ia munzangala dijina diê Saúlu. 59Ene kioso kia mu bûba Xitevá ni matadi, muène-phe iú hingila Ngana Jezú, uixi: Ngana Jezú, tambula nzu mbi iami! 60Anga u fukama, u di kola di dizui dia suina, uixi: Ngana, kana kuta kituxi kiki mu konda iâ! O kia zubha ku ki zuela, u batula muenhu.
Currently Selected:
Jipoxolo 7: KMB80
Highlight
Share
Copy
Want to have your highlights saved across all your devices? Sign up or sign in
Kimbundu Bible © United Bible Societies, 1980.
