Ageini 13

Aburam Opokere kede Lot

1Aburam oko yai ki Misiri di eko dok Negeb, en kede dako mere, karacel kede Lot kede jamini dedede kame en bin etie kede. 2Aburam oudo obaro twatwal kede dok, siliba kede saabu. 3En eko ot di ekokobo akokob, yai ki Negeb kiton tuno Betel kakame en oudo bin esipo iye eema i agege. Kanono oudo tie i dierediere me Betel kede Ai, 4kakame en bin egero iye alutari i agege. Aburam di oko woro Rwot i kanono.

5Lot da ngat kame bin tie ot karacel kede Aburam, oudo tie kede romini, diegi, dok kede jo kame bin bedo kede en. 6Pi mano, lobo me kwat oudo likame karuno romo gi ka gin dedede kibedo karacel; pien leini kame bin kitie kede oudo tot twatwal, oko mino likame kikaruno bedo karacel. 7Manono omio oudo lok maro bedo tie i dierediere me jokwat ka Aburam kede jokwat ka Lot. I kare nono oudo jo me Kanan kede jo Perisi tie bedo i lobo nono.

8Aburam di oko waco ne Lot be, “Mito lok kur bed tie i dierediere nango kedi, akadi da i dierediere me jokwat nin kede mega; pien wan wade. 9Mam lobo lung tie i nyimi? Pokere kibuta. Ka in iyero ot i bad tetu ngodal, ango abino ot tetu cam; arabo ka in ioto i bad tetu cam, ango abino ot tetu ngodal.”

10 # Ageini 2.10 Lot oko tingo wange malo di eko neno aputon me Yorodan, dok tetu Soar; pii oudo tie iye kiber kabedo dedede bala poto ka Rwot, arabo bala lobo me Misiri. Man bin otimere di pwodi Rwot likame omuducaro Sodoma kede Gomora. 11Lot di oko yero aputon me Yorodan en gire kene, di eko yai ot tetu kide. Epone no en kame gin kiko pokere kede. 12Aburam oko donyo bedo i lobo me Kanan, do Lot oko ot bedo i bomban kame bin tie i Aputon, di eko sipo eema mere i nget bomba me Sodoma. 13Jo me Sodoma bin obedo jo areco, jo kame otimo dub atot i nyim Rwot.

Aburam Odak Keburon

14Di do bin Lot otieko pokere kede Aburam, Rwot oko waco ne Aburam be, “Ting wangi malo di iko neno ki kakame itie iye no, tetu malo kede tetu piny, tetu kide kede tetu tim; 15#Tice 7.5pien lobo dedede kame in ineno nono, ango abino mino buti kede but ikwae ni atwal. 16Abino mino ikwae ni bedo tot bala asinge me lobo; tetekeny ka ngatamoro karuno maro wel me asinge me lobo, udo ikwae ni da kokaruno maro wel gi. 17Yai, bei i lobo nono di iko wapo boro kede laco mere, pien abino mine buti.” 18Aburam di oko dak ekobo eema mere eoto bedo i nget ejinga me Mamure, kame tie Keburon; di eko gero alutari kuno me woro Rwot.

Currently Selected:

Ageini 13: BILKDC13

Highlight

Copy