Ageini 19

Dub me Sodoma

1Imalaikan are nogo oko tuno Sodoma otieno, di gin kiko udo Lot tie bedo i erute me bomba. Kakame Lot oneno gi kede, en eko yai eoto riamo kede gi, di eko riebere piny. 2En eko waco be, “Jodongo na, ango akwao wu ibinunu i oda, ango ngatic wu, di ikounu lwoko tienu di ikounu buto; di do odiko ikounu dilo yai di ikounu meede kede ot wu.” Gin kiko waco be, “Li; wan oyaro buto kacokere me bomba.” 3Do Lot oko dino gi tetek omio gin di do kiko yei kop mere di kiko ot i ode. En eko tedo negi cam aber kede mugati kame arup li iye, di gin kiko camo. 4Do di pwodi gin likame kibuto, cuo me bomba oko bwote, awobe kede cuo adongo, cuo dedede, gin kiko luko ot; 5#Jongolkop 19.22-24di kiko lwongo Lot di kipenye be, “Cuo kame oudo obino buti otieno noni tie tuai? Kel gi ooko but wan kan, me wek wan obut kede gi.”

6Lot oko donyo ooko but gi di eko lokere eko cego ekeko. 7En eko waco negi be, “Imiegu na, ango akwao wu be kur itimunu gikarac kame rom kamano. 8Nenunu, ango atie kede anyira are kalikame pwodi ongeo icuo; wekunu ango akel gi ooko kan butu, di wun ikounu timo negi bala kame imitunu; kenekene kur itimunu gimoro i kom cuo gi, pien gin kitieko donyo i oda pi gwokere.” 9Do gin kiko waco ne be, “Orwa tenge! Kom in ibino kan bala ngakumbor, nan do imito be idok ngangolkop wan! Nan do wan oyaro timo nin gikarac kalamo gikame wan omito timo ne gin.” Di do gin kiko remoro Lot cen kitek di kiko nyiko i ekeko pi mito ture. 10Do cuo kame oudo tie i ot oko cwano cing gi di kiko wano Lot i ot but gi, di kiko cego ekeko. 11#2 Abakai 6.18Di gin kiko mino wang cuo kame oudo tie i ekeko oko to, awobe karacel kede cuo adongo, omio likame kiko karuno udo ekeko.

Lot Oyai ki Sodoma

12Di do cuo are nogo oko penyo Lot be, “In itie kede dano ni moro ace kan? Idwe awobe ni amoto idwe anyira, cuog anyira ni arabo ngatamoro ace kame in itie kede i bomba kan; yai kede gi tenge ki kabedo noni. 13Pien wan oyapuno muducaro kabedo noni, pi koko kame tie i kom jo mege dwong twatwal i nyim Rwot; en komio en ecwao wan pi muducaro en.”

14Di do Lot oko ot but awobe kame oudo oyaro nyomo anyira mege di eko waco negi be, “Yaunu awakawaka, ootunu tenge ki kan; pien Rwot oyapuno muducaro bomba noni.” Do gin kiko tero kop mere tukotuko.

15Kakame piny oru kede, imalaikan oko burakino Lot di kiwaco ne be, “Yai awakawaka, ter dako ni kede anyira ni are kame tie kan, tetekeny kur muducaro ida kede bomba noni.” 16#2 Petero 2.7Do Lot oko mono gal, Rwot kisa oko make kede, omio imalaikan oko mako cinge, cing dako mere kede me anyira mege are nogo, di kiko tero gi oko me bomba. 17Kakame gin kitieko kelo gi kede oko me bomba, ngat acel oko waco negi be, “Ringunu tetekeny ilakunu kuo wu; kur ngatamoro ngoloro cen arabo ecungi i elet. Ringunu i mori tetekeny kur muducaro wu.” 18Do Lot oko waco negi be, “Okwe, jodongo na, likame kamano. 19In itieko timo bero ne ngatic ni, doko in itieko nyuto nango mwolo adwong ilako kuo na; do ango likame akaruno ringo tuno i mori, pien lworo bino mino peko nono maka i yongayo di ako to. 20Neningo, bomba ca tie kakame iyapiyapi nango me ringo iye, doko en etitidi da. Wek ango aring kuno; bomba nono da gire titidi, ebino mino kuo na bwot.” 21En eko gamo be, “Mano ber, ango ayei kwac ni nono. Likame abino tuturo bomba kame in iwaco nono. 22Susunyo, ring kuno, pien ango likame akaruno timo gimoro tuno di in itieko tuno kuno.” Pi mano, oko do lwongo bomba nono be Soar.#19.22 Soar dwong mere en be katitidi.

Komuducaro Sodoma kede Gomora

23Kakame Lot otuno kede Soar, ceng oudo otieko wok. 24#Matayo 10.15; 11.23-24; Luka 10.12; 17.29; 2 Petero 2.6; Yuda 7Di do Rwot oko mino salupa kede mac kame wok ki malo bute oko cwei Sodoma kede Gomora; 25eko wango bomban nogo karacel kede elet, kede jo dedede kame oudo bedo i bomban nogo, kiton gi atui dedede kame oudo tie dongo kuno. 26#Luka 17.32Do dako ka Lot, ngat kame oudo tie lube ki cen, oko ngoloro cen di eko lokere edoko epir me munyo.

27Odiko sek oru mere, Aburaam oko ot kakame bin en oudo ecungo iye i nyim Rwot. 28En di eko ngoloro piny tetu Sodoma kede Gomora, kede bad dedede me elet di eko neno yiro me lobo nono duny malo bala yiro kame duny i epipa me cwako nyonyo. 29Manono en gikame oko timere i kare kame Rubanga omuducaro kede bomban kame oudo tie i elet, en bin eyutuno Aburaam di eko mino Lot obwot i kare nono kame en bin emuducaro kede bomban kame Lot oudo bedo iye.

Epone kame Jo me Moab kede Amon Owok kede

30Lot bin oko yai ki Soar, en karacel kede anyira mege are di eko ot bedo i abo i wi moru pien oudo elworo bedo Soar. 31Di nyako kao oko waco ne nyako atidi be, “Papa wa tie ti, aso di likame tie icuo moro i wi lobo kan kame bino buto kede wa di lubere kede itok me wi lobo. 32Bia omi papa wa mat bwini di wan oko buto kede, tetekeny onywal idwe kede papa wa.” 33Aso, iwor nono gin di kiko mino papa gi oko mato bwini di nyako kao oko buto kede papa mere. Papa mere bin likame oko ngeno gi kotimere. 34Oru mere nyako kao oko waco ne nyako atidi be, “Neningo, ango oki abuto kede papa na iwor. Mito nat bobo omie emat bwini iwor, di ida iko ot buto kede, tetekeny onywal idwe kede papa wa.” 35Aso, di gin kiko mino papa gi omato bwini bobo iwor nono, di nyako atidi da oko buto kede papa mere. Papa mere bin likame oko ngeno gikame oudo otimere. 36Iepone nono, anyira ka Lot bin oko yac kede papa gi. 37Nyako kao bin oko nywalo atin awobi di eko cako nyinge be Moab; en nono kame ebedo kwaru me jo Moab kiton tuno tin. 38Nyako atidi da bin oko nywalo atin awobi di eko cako nyinge be Benami; en nono kame ebedo kwaru me jo Amon kiton tuno tin.

Currently Selected:

Ageini 19: BILKDC13

Highlight

Copy